Read Falam Chin DAAN PEKSALNAK 7 Bible Online

DAAN PEKSALNAK 7 - Falam Chin bible

DAAN PEKSALNAK 7

¹Cun Moses in, “BAWIPA nan Pathian cun nan luah dingmi ramah a lo fehpi ding ih miphun tampi a dawisuak ding. Nannih in nan nor deuhdeuh tikah nannih hnakih a tum deuh le a cak deuhmi miphun pasarih - Hit mi, Girgash mi, Amor mi, Kanaan mi, Periz mi, Hiv mi le Jebus mi pawl cu a dawi ding.

²BAWIPA nan Pathian in hi miphun pawl cu nan kut sungih a ret tikah le nan neh tikah an zatein nan that thluh ding. Anmah thawn ṭantlangnak thukam nan tuah lo pei ih zaangfahnak tla nan nei lo pei.

³Ṭhit-awk tonnak nan tuah lo pei ih nan faate pawl tla ṭhit-awk tonnak nan tuahsak lo pei;

⁴ziangahtile nan faale pawl cu BAWIPA bia lo dingin an hruai ding ih khawzing dangdang an biakter ding a si. Cuti a si ahcun BAWIPA cu nan parah a thin a heng ding ih hmakhatte-ah a lo siatsuah ṭheh hai ding.

⁵Hi miphun pawl hnenah cun hiti in tuah sawn uh: an biakṭheng pawl bal ṭheh uh, an biaknak lungphun pawl khuai ṭheh uh, an thingphun pawl ceek kuai ṭheh uhla an milem pawl cu ur ṭheh uh.

⁶Ziangahtile nannih cu BAWIPA nan Pathian ih minung nan si ih a hnenah mi phunthiang nan si. Leitlun mi hmuahhmuah sungin amah ih minung, a minung sunglawi si dingah a lo hril zo a si.

⁷“Midang hnakih nan tam deuh ruangah BAWIPA in a lo duh ih a lo hrilmi nan si lo; thungai ih ti ahcun leilung tlunah miphun fate bik nan si.

⁸Sikhalsehla BAWIPA in a lo duhdawt ih nan pupa pawl hnenih thukamnak a tuahmi kha kimter a duh ruangah a si. Curuangah a baan thacak in a lo run ih Izipt siangpahrang kuthnuai ih sal taannak in a lo luatter a si.

⁹Curuangah BAWIPA nan Pathian cu Pathian taktak a si ih, rintlak Pathian a si, ti kha thei ringring uh. A thukam cu a fekter ding ih amah a duhdawttu le a thupekmi a thluntu hmuahhmuah parah cun san thawng tampi tiang a cat lomi duhdawtnak a langter ding.

¹⁰Asinain a dodaltu le a huatu parah cun zamrangte in hremnak le siatsuahnak thlenter dingah a ṭhukṭhun hrimhrim lo ding.

¹¹Curuangah nan zirmi hmuahhmuah thlun uh; tuihsun ih ka lo zirhmi daan hmuahhmuah cu thlun ṭheh uh.

¹²“Hi thupekmi pawl nan ngai ih feltein nan thlun a si ahcun nan pupa pawl hnenih thu a tiam bangin BAWIPA nan Pathian cun a thukam a fekter ding ih a hmunmi a duhdawtnak cu nan parah a langter ding.

¹³Nan pungzai ih tefa tampi nan neihnak dingah a lo duhdaw hai ding ih a lo thlawsuah ding. Rawl le sabit le olif siti nan neihnak dingah nan lo par khalah thlawsuahnak a pe ding; caw le tuu tampi bawngmal a lo sawm ding. Nan co dingah nan pupa hnenih thu a kammi ram sungih nan um tikah hi thlawsuahnak pawl cu a lo pe ding a si.

¹⁴Nanmah bangtuk ih thlawsuahnak famkim a cotu hi leilung tlunah zohman an um lo ding. Nanmah lakah zokhal fa nei thei lo le facing nan um lo ding ih nan ṭilva lak khalah fa nei thei lo le a cing an um lo ding.

¹⁵Natnak hmuahhmuah sungin BAWIPA in a lo hum ding. Izipt ramih nan ton zomi natsia pawl kha nan parah a thlenter lo ding; asinain nan ral pawl parah a thlenter thluh ding.

¹⁶BAWIPA nan Pathian in nan kut sungih a retmi miphun hmuahhmuah cu siatsuah ṭheh uhla, zaangfah hlah uh. An khawzing pawl tla bia hlah uh; nan biak asile nan cemral ding.

¹⁷“Hi miphun pawl hi kannih hnakin an tam ngaingai ih ziangtinso kan dawi thei ding, tiah nan lak khalah rel hlah uh.

¹⁸Annih pawl hi ṭih hlah uh; BAWIPA nan Pathian in Izipt siangpahrang le a minung pawl parih a tuahmi thil pawl kha ruat sawn uh.

¹⁹An parih a thlengmi, nan mit rori ih nan hmuhmi ṭihnungza natsia pawl, mangbangza le khawruahhar pawl, BAWIPA nan Pathian in a baan thacak le a huham makzet in a lo luatternak pawl kha vun ruat uh. Izipt mi pawl a siatsuah thluh vek thotho in hi miphun pawl, nan ṭihzetmi pawl hi a siatsuah thluh ve ding.

²⁰Khuaingal hraang a thlah ding ih thlaphannak le tuksumnak an hnenah a thlenter pei ih a ṭhekdarh awmi le a relh reromi pawl hman a siatsuah thluh hai ding.

²¹Curuangah himi pawl cu ṭih hlah uh; BAWIPA nan Pathian nan hnenah a um; Amah cu huham tummi Pathian a si ih amah ṭih sawn ding a si.

²²Hmaiih nan nor deuhdeuh tikah hih mi pawl cu nuamtete in a dawi ding; asinain hmakhatte ahcun nan that ṭheh thei lo ding. Hmakhatteih nan that ṭheh a si ahcun ramsa an karhzai ciamco ding ih nan hrangah phan ding a um lala ding.

²³BAWIPA in nan ral pawl cu nan kut sungah a ret ding ih siatsuah ṭheh an si hlan lo thlaphang in a umter ding.

²⁴An siangpahrang pawl tla nan kut sungah a ret ding. Nan that ding ih an hmin cu a hloralta ding. A lo kham theitu zohman an um lo ding; an zatein an ci nan hmit thluh ding.

²⁵An milem pawl ur ṭheh uh; cuih milem parih sui le ngun pawl tla daw hlah uh; nan hrangah lak hlah uh. Nan lak asile a lo awk pang ding; ziangahtile milem biak cu BAWIPA ih huatmi a si.

²⁶Hi milem pawl cu nan innsungah thlenter hlah uh; nan thlenter asile siatcammi an si bangin nan parah siatcamnak a thleng ding. Hi milem pawl cu nan huat ding le nan fih dingmi an si; ziangahtile BAWIPA ih siatcammi an si.”