Read Falam Chin DAAN PEKSALNAK 8 Bible Online

DAAN PEKSALNAK 8 - Falam Chin bible

DAAN PEKSALNAK 8

¹“Tuihsun ih ka lo pekmi thukham hmuahhmuah hi feltein nan thlun thluh pei. Cutiih nan thlun asile nan nung ding, nan karhzai ding ih nan pupa hnenah BAWIPA ih a tiam ciami ram cu nan luah ding.

²Nelrawn ramṭhing ah kumpi kum sawmli sung BAWIPA nan Pathian in a lo hruai ih a thupekmi pawl nan thlun tum maw tum lo tiin nan thinlung sungih thuruahmi pawl theih duh ah nan hnenih harsatnak a thlenterzia pawl kha ruat uh.

³Rilrawng in a lo ret. Cuih hnuah nanmah le nan pupa pawl in nan ei dah lomi manna sang nan ei dingah a lo pek. Hitiih a tuahnak cu rawl lawngin nunnak a si lo; Pathian hmurka in a suakmi thu in nunnak a si sawn, ti nan theihnak dingah a si.

⁴Nan vahvaihnak kum sawmli sungah nan hnipuan a ṭet lo ih nan ke khal a thling lo.

⁵Pa in a faate pawl nun a sim ṭheu bangtuk in BAWIPA nan Pathian cun nun a lo sim ih hremnak tla nan tuar ṭheu kha hngilh hlah uh.

⁶Curuangah BAWIPA ih thupekmi bangin nung uh; a thukham bangtuk in nung uhla amah cu ṭihzah uh.

⁷BAWIPA nan Pathian in ram ṭha tiva le tikhur pawl an umnak, horkuam le tlangpar ihsin a putmi tiva le cirhti pawl an umnak,

⁸sangvut le barli sangvut, sabit, theipi, taleti, olif le khuaitizu pawl an suahnak ramah a lo thlenpi a si.

⁹Cutawk ramah cun rilrawng in nan um dah lo ding; hlawhsammi tla nan nei dah lo ding. Hi ramih lungto cun thir a suah ding ih tlang pawl ahcun dar an lai ding.

¹⁰Ei ding nan hiarmi hmuahhmuah nan nei ding ih a lo petu BAWIPA nan Pathian cu nan thangṭhat ding.”

¹¹“BAWIPA nan Pathian nan hngilh lonak dingah ralring uh; tuihsun ih ka lo pekmi a daan, a thupekmi le a thu pawl hmuahhmuah pakhat hman hrelh lotein thlun uh.

¹²Ei ding nan hiarmi hmuahhmuah nan ngah hnu, nan umnak dingah inn ṭhaṭha nan sak hnu,

¹³nan caw le nan tuu pawl, nan sui le nan ngun pawl le nan sumsaw hmuahhmuah an karhzai ih an tamzet tikah,

¹⁴puarthau tahrat in salih nan taannak Izipt ram sungin a lo suahtu BAWIPA nan Pathian cu hngilh hlah uh.

¹⁵Kha tluk a kaumi le ṭihnungza nelrawn, tur a neimi rul le varngen meipir pawl umnak sungin amah in a lo hruai. Kha tluk a caarmi le tidai um lonak ramṭhingah lungpi sungin nan hrangah tidai a putter.

¹⁶Nelrawn ah nan pupa pawl ih an ei dah lomi manna sang cu nan ei dingah a lo pek. Nehhnu-ih nan ṭhatnak dingah harsatnak in a lo hniksak hai a si.

¹⁷Curuangah kanmah ih cahnak le thazaang in kan lian a si, tiah ziangtik hmanah ruat hlah uh.

¹⁸Nan lennak dingah cahnak huham a lo petu cu BAWIPA nan Pathian a si kha thei ringring uh. Hitiih a tuahnak cu nan pupa hnenih thukamnak a tuahmi kha a kimter ruangah a si ih tuihsun khalah cuih thukamnak cu hngetter a duh a si.

¹⁹Khawzing dangdang biak duh ah le ren duh ah BAWIPA nan Pathian cu hngilh hlah uh. Nan hngilh asile, tuihsun ah fiangtein ka lo sim: siatsuah thluh nan si tengteng ding.

²⁰BAWIPA ih thu nan thlun lo a si ahcun hmailam nan nor deuhdeuh tikah hi ramih miphun pawl a hlohralter thluh vekin nannih khal hlohralter nan si ve ding.