Read Falam Chin JOHAN 1 Bible Online

JOHAN 1 - Falam Chin bible

JOHAN 1

¹A hramthokah Thu a rak um. Cuih Thu cu Pathian thawn a um ih Pathian a si.

²A hramthok ihsin cuih Thu cu Pathian thawn a um zo.

³Amah sung ihsin Pathian in ziang hmuahhmuah a seemsuah; seemsuah mi thil hmuahhmuah sungah hin amah tel loih tuahmi pakhatte hman a um lo.

⁴Cuih Thu cu nunnak ih hram a si ih cuih nunnak cun minung hnenah tleunak a run thlen.

⁵Tleunak cu khawthim sungah a tleu ih thimnak in a hmit thei dah lo.

⁶Pathian in a palai Johan a thlah ih,

⁷Johan cu mi hnenah cuih tleunak thu sim dingin a ra. A simmi hmuahhmuah in an theih ih an zumnak dingah a ra a si.

⁸Anih cu tleunak a si lo; tleunak thu sim dingah a rami a si sawn.

⁹Cuih tleunak cu tleunak taktak a si. Cuih tleunak cu leitlun ah a ra ih mi hmuahhmuah tlettu a si.

¹⁰Cuih Thu cu leitlun ah hin a um ih amah sung ihsin Pathian in leilung hi a tuah naón leilung in amah cu a thei lo.

¹¹A ram sungah a ra naón a minung pawl in an rak saang lo.

¹²Mi ṭhenkhat cun an saang ih an zum; curuangah Pathian ih faate cantheinak thu a pek.

¹³Pathian ih faate an cannak cu leilung daan, minung ih thi le sa in hrinmi in a si lo; Pathian amah rori kha an Pa a si.

¹⁴Cuih Thu cu minung ah a cang ih kan lakah a um; zaangfahnak le thutak in a khat. A sunlawinak kan hmu ih a Pa in a fapa neihsun hnenih a pekmi sunlawinak a si.

¹⁵Johan in cupa ih thu cu hiti in a sim: “‘Amah cu ka hnuah a ra; asinain kei hnakin a tum sawn, ziangahtile amah cu ka suah hlanah a rak um zo,’ tiih ka lo simmi kha amah ih thu hi a si,” tiah a ti.

¹⁶A famkim zetmi a zaangfahnak thawn kannih cu in thlawsuah zo ih a thlawsuah cu pakhat hnu pakhat in pek a si.

¹⁷Pathian ih Daan cu Moses hnen ihsin in pek; asinain zaangfahnak le thutak cu Jesuh Khrih sung ihsin a ra.

¹⁸Zohman in Pathian cu an hmu dah lo. A Pa ih Fapa neihsun, a ṭaang sungih a pommi, Pathian a si mi in a langter zo a si.

¹⁹Jerusalem ih Judah hotu pawl in puithiam ṭhenkhat pawl le Levi mi pawl kha Johan hnenah cun an thlah ih, “Nang hi zoso na si?” tiah an va sut.

²⁰Johan cun an thusuhmi cu pheh lotein a let ih, “Kei hi Messiah ka si lo,” tiah fiangtein zapi theih ah a sim.

²¹Annih in, “Asile zoso na si? Elijah na si maw?” tiah an sut. Johan in, “Ka si lo,” a ti. Annih in, “Profet na si maw?” an ti lala. “Ka si lo,” a ti thotho.

²²Annih in, “Cuti asile zoso na si, in simhnik. Na thu lehmi cu in thlahtu hnenah kan va sim sal a ṭul. Zo ka si, tiin so na ti awk?” tiah an sut.

²³Johan in Profet Isaiah ih simmi kha a vun lak ih, “Kei cu ‘Bawipa ih fehnak lamzin kha dingter uh,’ tiih ramṭhingih a au-mi aw kha ka si,” tiah a ti.

²⁴Farasi pawl ih an thlahmi palai pawl cun,

²⁵Johan cu thu an sut sal ih, “Messiah na si lo ih Elijah le Profet khal na si lo ahcun ziangah so baptisma na pek?” tiah an ti.

²⁶Johan in, “Kei cun tidai in baptisma ka pek, asinain nan lakah nan theih hrih lomi mi pakhat a um.

²⁷Amah cu ka dungah a ra lai; sikhalsehla kei cu a kedam hri phoihtu hmanah ka tlak lo,” tiah a ti.

²⁸Hitiih an suh awknak hmun cu Johan in baptisma a peknak Jordan tiva ihsin nisuah lamih a ummi Bethani[1] khua ah a si.

²⁹A thaisun ah Johan in Jesuh a hnenih a rat lai kha a hmu ih, “Leilung sualnak a phurtu Pathian Tuufa khi zohhnik uh!

³⁰‘Ka dungin mi pakhat a ra, asinain kei hnakin a tum sawn, ziangahtile ka suah hlanah anih cu a rak um zo,’ tiih a thuhla ka sim rero zo mipa cu amah hi a si.

³¹Amah hi zo a si ding ti ka rak thei lo. Asinain amah hi Israel mi pawl ih an theihnak dingah tidai in baptisma ka pek rero sannak a si,” tiah a ti.

³²Johan in, “Thlarau cu vancung ihsin thuro bangin a rung ih a parah a rung fut kha ka hmu.

³³Amah teu a si tihi ka rak thei thotho cuang lo, sikhalsehla tidai in baptisma pe dingih i thlahtu Pathian in ‘Thlarau a rung ding ih mi pakhat parih a fut kha na hmu ding; cupa cu Thlarau Thianghlim in baptisma petu ding a si,’ tiah i sim.

³⁴Cupa cu ka hmu ngah zo. Fiangtein ka lo sim: Amah cu Pathian Fapa a si,” tiah a hmuhmi le a theihmi kha a sim.

³⁵A thaisun ah Johan le a dungthluntu pahnih cu cutawk ah an ding sal ih,

³⁶Jesuh a rat kha an hmuh tikah, “Pathian Tuufa khi zohhnik uh,” tiah Johan in a ti.

³⁷Cutiih a timi cu a dungthluntu pahnih cun an thei ih Jesuh hnenah cun an feh ve.

³⁸Jesuh cu a dunglet a her ih an rak thlun kha a hmuh tikah, “Ziang so nan hawl?” tiah a sut. Annih in, “Rabbi, khui-ah so na um?” tiah an let. Rabbi ticu zirhtu Sayapa tinak a si.

³⁹Jesuh in, “Ra uhla ra zohhnik uh,” tiah a ti. Cuih tikcu cu zanlam nazi pali hrawng a si. An feh ih a umnak cu an va hmu ih cuih ni cu a hnenah an caam ta.

⁴⁰Cuih mi pahnih lakah pakhat cu Simon Piter ih naupa Andru a si.

⁴¹Hmakhatteah a u-pa Simon kha a va hawl ih a hmuh tikah, “Messiah cu kan hmu zo,” tiah a ti. Messiah timi cu Khrih tinak a si.

⁴²Cule Simon cu Jesuh hnenah a fehpi. Jesuh in amah cu a zoh ih, “Na hmin cu Johan fapa Simon a si; sikhalsehla Sefas tiah kawh na si thlang ding,” a ti. Sefas ticu Piter ti thawn a bang aw ih a tican cu ‘lungto,’ tinak a si.[2]

⁴³A thaisun ah Jesuh cu Galilee feh a tum. Filip kha a hmu ih a hnenah, “I thlun aw,” tiah a ti.

⁴⁴Filip cu Andru le Piter umnak Bethsaida khua mi a si.

⁴⁵Filip in Nathanael a tong ih a hnenah, “Moses in Daan cabu sungah a thuhla a nganmi le profet pawl khal in a thuhla an ngan mipa kha kan tong zo. Amah cu Josef fapa Jesuh, Nazareth khuami a si,” tiah a ti.

⁴⁶Nathanael in, “Nazareth khua in thil ṭha a suak thei pei maw?” tiah a ti. Filip in, “Ra zohhnik awla!” tiah a ti.

⁴⁷Jesuh in Nathanael a rat kha a hmuh tikah, “Israel mi taktak hi zohhnik uh! A thinlung ah zianghman hrawhhrawlnak a um lo,” tiah a ti.

⁴⁸Nathanael in, “Ziangtin so i theih?” tiah a sut. Jesuh in, “Filip ih a lo kawh hlan theipi kung hnuai ih na to lai ah khan ka lo hmu zo,” tiah a ti.

⁴⁹Nathanael in, “Sayapa, nang cu Pathian Fapa na si! Israel Siangpahrang na si!” tiah a ti.

⁵⁰Jesuh in, “Theipi kung hnuai ih na to lai ka lo hmu, ka ti ruangah i zum a si maw? Hi hnakih thil maksak tampi na hmu lai ding!” tiah a ti.

⁵¹Cule an hnenah, “Thungai in ka lo sim: vancung khi a ong aw ding ih Milai Fapa parah hin Pathian ih vancungmi an ṭum le an kai kha nan hmu ding,” tiah a ti.