Read Falam Chin JOHAN 11 Bible Online

JOHAN 11 - Falam Chin bible

JOHAN 11

¹Bethani khua ih a ummi Lazaras an timi pa cu a na. Bethani cu Mari le a u Martha an umnak khua a si.

²Hi Mari cu Bawipa ih ke ah zihmui a toih ih a sam in a hnawttu nu kha a si. A na mi Lazaras cu a ṭa a si.

³An unau in Jesuh hnenah, “Bawipa, na duhdawtmi na rualpa a na a si,” tiah thu an hei cah.

⁴Cumi cu Jesuh in a theih tikah, “Hi natnak cu Lazaras ih thihnak ding natnak a si lo. Hi natnak cu Pathian sunlawinak langter dingah le Pathian Fapa in sunlawinak a ngahnak ding khalah a si,” tiah a ti.

⁵Jesuh in Martha le a nau nu le Lazaras cu a duhdawt zet.

⁶Asinain Lazaras a na ti thu a theih hnuah cuih a umnak ahcun a hlei in ni hnih a caam ta.

⁷Cule a dungthluntu pawl hnenah, “Judea ah va feh sal uhsi,” tiah a ti.

⁸Dungthluntu pawl cun, “Sayapa, kan dung rei lote ah mipi in cutawkah lungto in den an lo tum zo; atu na va feh sal ding maw?” tiah an ti.

⁹Jesuh in, “Ni khatah nazi hleihnih a um a si lo maw? Zokhal sun vangih a fehtu cu a bah dah lo, ziangahtile leilungih a ummi tleunak a hmu.

¹⁰Sikhalsehla khawthim sungih a feh ahcun a bah, ziangahtile tleunak a nei lo a si,” tiah a ti.

¹¹Cumi a sim ṭheh in Jesuh cun, “Kan rual Lazaras cu a itthat zo; asinain ka feh ding ih ka va ṭhang ding,” tiah a ti.

¹²Dungthluntu pawl in, “Bawipa, a it a si ahcun a dam ko ding,” an ti.

¹³Jesuh ih sim duhmi cu Lazaras a thi, tinak kha a si ih dungthluntu pawl cun itthat menmen a ti si hmang, tiah an ruat.

¹⁴Curuangah Jesuh in fiangtein a sim ih, “Lazaras cu a thi zo;

¹⁵asinain nan hrangah nan zum theinak dingah a hnenih ka rak um lo cu ka lung a awi a si; tho uhla a hnenah kan feh pei,” tiah a ti.

¹⁶Thomas (Faphir an timi pa) in dungthluntu a rualpi pawl hnenah, “Sayapa thawn thi tlang dingah feh uhsi,” tiah a ti.

¹⁷Jesuh a va thlen tikah Lazaras an phumnak ni li a si zo.

¹⁸Bethani cu Jerusalem ihsin peng hnih kim deuh lo a si ih,

¹⁹Judah mi tampi cu an ṭapa ih thih sanmi Martha le Mari topi dingah an ra.

²⁰Jesuh a ra lai rero ti kha Martha in a theih tikah amah hmuak dingah a feh, asinain Mari cu inn ah a um.

²¹Martha cun Jesuh hnenah, “Bawipa, hinah rak um ta cila ka ṭapa cu a thi lo ding naón!

²²Sikhalsehla atu hmanah hin Pathian in na dilmi cu a lo pe ko ding ti ka thei,” tiah a ti.

²³Jesuh in, “Na ṭapa cu a nung sal ding,” tiah Martha cu a ti.

²⁴Martha in, “A si, ni neta bikah cun a tho sal leh ding ti cu ka thei,” tiah a let.

²⁵Jesuh in a hnenah, “Kei cu thawhsalnak le nunnak ka si. Zokhal keimah i zumtu cu thi hmansehla an nung ding.

²⁶Zokhal keimah sungah a nungmi le i zumtu cu an thi nawn lo ding. Himi hi na zum maw?” tiah a sut.

²⁷Martha in, “A si Bawipa, nang cu leilung ah a ra dingmi Pathian ih Fapa Messiah na si ti ka lo zum,” tiah a ti.

²⁸Cutiih a sim hnuah Martha cu a vung kir ih a thupte in a nau Mari kha a ko. “Sayapa hinah a um ih a lo hlam a si,” tiah a ti.

²⁹Cumi cu Mari in a theih tikah a pok ih hmuak dingah zamrangin a va feh.

³⁰Jesuh cu khawsungah a ra thleng hrih lo; Martha ih a tonnak hmun ah khan a um lai hrih.

³¹Mari a topitu le a hnemtu pawl cu Mari a pok ih zamrangin a feh kha an hmuh tikah amah cu an thlun ve. Thlaan ah a va ṭap hmang ding tiah an ruat.

³²Jesuh umnak ahcun Mari cu a va thleng ih Jesuh a hmuh vete in a ke hramah cun a khuk a bilh ih, “Bawipa, hitawk ah rak umta cila ka ṭapa a thi lo ding naón!” tiah a ti.

³³Jesuh in Mari le a topitu mipi pawl tla an ṭah kha a hmuh tikah a thin a na ih a lung a hno.

³⁴“Khuitawkah so nan phum?” tiah a sut. Annih in, “Bawipa, ra awla ra zoh aw,” tiah an ti.

³⁵Cule Jesuh cu a ṭap.

³⁶Mipi in, “Lazaras cu a va duhdawt lawmmam so!” tiah an ti.

³⁷Asinain mi ṭhenkhat in, “Mitcaw pa mit a vangter a si lo maw? Lazaras hi thi loin ziangah so a tuah ve lo?” tiah an ti.

³⁸Jesuh cu a ning a hang ngaingai ih thlaan ah a va feh. Cuih thlaan cu lungkua a si ih a ka cu lungpheng pakhat in an khar.

³⁹Jesuh in, “Lungpheng hi ṭhawn uh,” tiah thu a pek. Mithi pa ih farnu Martha in, “Bawipa, a nam zo ding. Kan phumnak ni li a si zo!” tiah a ti.

⁴⁰Jesuh in a hnenah, “Na zum taktak a si ahcun Pathian sunlawinak na hmu ding, tiah ka lo sim zo a si lo maw?” tiah a ti.

⁴¹Cule lungpheng cu an ṭhawn. Jesuh in tlunlam a hun zoh ih, “Ka Pa, ka simmi i ngai ruangah na parah ka lung a awi.

⁴²Ka ṭong i theih sak ringring ti ka thei, asinain hitawk ih a ummi pawl hin nangmah thlahmi ka si kha an zum theinak dingah anmah ruangah hiti ih ka lo simnak hi a si,” tiah a ti.

⁴³Cutiih a sim hnuah aw ring zetin, “Lazaras, ra suak aw!” tiah a au.

⁴⁴Lazaras cu, a kut le a ke ruaktuamnak puan in an tuam ih a hmai tla an tuam; cutiih an ṭemnak thawn a ra suak ngaingai. Jesuh in, “Phoih uhla feh seh!” tiah a ti.

⁴⁵Mari topi dingih a rami Judah mi tampi in Jesuh ih thil tuahmi cu an hmuh tikah amah cu an zum.

⁴⁶Asinain mi ṭhenkhat cu Farasi pawl hnenah an kir ih Jesuh ih thil tuahmi cu an sim ṭheh.

⁴⁷Curuangah Farasi pawl le puithiam upa pawl cu Khonsil pawl thawn an tong aw ih, “Ziangtin so kan tuah ding? Hi pa ih hmuhsaknak a tuah vivomi hi zohhnik uh!

⁴⁸Hitiih kan zoh men ringring a si ahcun mi hmuahhmuah in amah hi an zum ding ih cutikah Rom Acozah thuneitu pawl in kan Biakinn le kan miphun an siatsuah ṭheh ding a si,” tiah an ti.

⁴⁹Anmah lakih mi pakhat, Kaiafas an timi, cuih kumah Puithiam Saang a ṭuantu in, “Nan va aa so!

⁵⁰Mi tampi ai-ih mi pakhat thih cu miphun phunkhat a pumpi ih siatral ṭheh hnak cun a ṭha deuh a si, ti nan thei lo maw si?” tiah a ti.

⁵¹A ngaingai ti ahcun cutiih a ṭong cu a palungih ṭongmi a si lo; cuih kum cu amah Puithiam Saang a si vekin Judah miphun ai-ah Jesuh cu a thi ding, tiah profet bangin a rak simsungmi a si.

⁵²A thihnak ding cu anmah hrang lawngah si loin hmun kipih a ṭhekdarh awmi Pathian minung pawl pumkhat ih finkhawmnak ding khalah a si.

⁵³Cuih ni thok ihsin Judah mi hotu pawl cun Jesuh that dingah thu an phiar.

⁵⁴Curuangah Judea pengah Jesuh cu zapi hmuh in khual a tlawng nawn lo; cutawk ihsin a suak ih ramṭhing kiangih a ummi Efraim an timi khua ah a feh ih cunah a dungthluntu pawl thawn an um.

⁵⁵Judah mi pawl ih Lantak Puai caan a nai thlang ih mi tampi cu puai tuah hlan thianfaiter awknak tuah dingah an khawte ihsin Jerusalem ah an feh ciamco.

⁵⁶Annih in Jesuh cu an hawl; Biakinn sungih an tonkhawm awk tikah pakhat le pakhat, “Ziangtin nan ruat? Puai tuahnak ahcun a ra ngai pei maw?” tiah an sut aw.

⁵⁷Puithiam upa le Farasi pawl in, “Jesuh umnak a theitu nan um ahcun kan kaih theinak dingah in sim pei,” tiah thu an than.