Read Falam Chin JOHAN 12 Bible Online

JOHAN 12 - Falam Chin bible

JOHAN 12

¹Lantak Puai hlan ni ruk ah Jesuh cu Bethani ah thihnak ihsin a thawhter sal mi Lazaras te ih inn ah khan a va feh.

²Cutawkah a hrangah zanriah an suang ih Martha in rawl pek a bawm. Jesuh thawn cabuai ih rawl a eitu lakah Lazaras cu a tel ve.

³Cule Mari in a phun a ṭha zet le a man a khung zetmi zihmui thawl khat a lak ih Jesuh ih ke ah a toih hnuah a sam in a hnawtsak. Cuih zihmui rim cu inn sung a khat ṭheh.

⁴Jesuh dungthluntu lakih pakhat, Jesuh a zuartu ding Judas Iskariot in,

⁵“Ziangah so hi zihmui cu tangka zathum ah zuar in cuih tangka cu mi farah an ṭhen sawn lo?” tiah a ti.

⁶Hitiih a sim tikah mi farah pawl zawn a ruah ruangah a si lo; rukru a si ruangah a si sawn. Tangka bawm kha amah in a keng ih cuih tangka cu amah hrangah a hmang ṭheu.

⁷Sikhalsehla Jesuh in, “Hi nu hi mawhthluk hlah uh! Ka ruak phum ni hrangih a tuah dingmi cu tuah ko seh.

⁸Mifarah cu nan lakah an um ringring ko ding; asinain kei cu nan lakah ka um ringring lo ding,” tiah a ti.

⁹Judah mi tampi in Bethani ah Jesuh a um ti an theih tikah cutawkah cun an feh. Jesuh hmuh duh lawngah si loin Jesuh in thlaan ihsin a thawhter salmi Lazaras hmuh duh hrimhrim ah an feh.

¹⁰Curuangah puithiam upa pawl in Lazaras khal thah ve dingah thu an ruat.

¹¹Ziangahtile Judah mi tampi in Lazaras ruangah hin anmah puithiam upa pawl cu hnon an tong ih Jesuh sawn kha an zum ruangah a si.

¹²A thaisun ah Lantak Puai ih a rami miburpi in Jesuh cu Jerusalem ah a ra ding, ti kha an thei.

¹³Cuhrangah tuum hnah an lak ih amah hmuak dingah feh phah in, “Pathian cu thangṭhat uh! Bawipa ih hminin a ratu cu Pathian in thlawsuahnak pe hram seh! Pathian in Israel Siangpahrang cu malsawm hram seh!” tiah an au ciamco.

¹⁴Jesuh in laak note pakhat a hmu ih a parah a to; Ca Thianghlim in:

¹⁵“Maw Zion khawpi, Na thinphang hlah; Na Siangpahrang cu laak note parah to-in a ra lai a si,” tiah a ti bangtuk in a kim a si.

¹⁶A dungthluntu pawl in culaiah cun hi thu ih tican hi an rak thei lo. Asinain Jesuh kha sunlawinak ih thawhter sal a si tikah amah thu-ah hin Ca Thianghlim in hi bangtuk in a rak sim ih amah hrangah hi bangtuk in an tuah a si, ti kha an vun mang sal.

¹⁷Jesuh in Lazaras kha thlaan ihsin a ko suak ih thihnak ihsin a thawhter laiih a rak hmu vetu mi tampi in cuih thu cu midang tampi an sim sin.

¹⁸Cubangtuk hmuhsaknak a tuah a si ti kha an theih ruangah miburpi in an rak hmuahnak a si.

¹⁹Cutikah Farasi pawl cun, “Kan ti tho lo maw; kan kham thei nawn lo hi! Zohhnik uh, leilung pumpi in a thlun zo hi!” tiah pakhat le pakhat an ti aw.

²⁰Cuih puai ih Pathian bia dingah Jerusalem ih a hung fehtu mi tampi lakah cun Grik mi tla an tel ve.

²¹Filip hnenah an feh ih, “Sayapa, Jesuh hmuh kan duh,” tiah an va ti. Filip cu Galilee peng Bethsaida khuami a si.

²²Filip cu Andru hnenah a feh ih a va sim; cule an pahnih in Jesuh hnenah an va feh ih an va sim.

²³Jesuh in an hnenah, “Milai Fapa in sunlawinak a ngahnak caan a ra thleng zo.

²⁴Thungaite in ka lo sim: sangvut ci fangkhat cu lei lung sungah tuh ih a thihta lo ahcun amah keel in a taang ringring. A thihta hnu lawngah ci tampi a suahter.

²⁵Cubangtuk in zokhal amah ih nunnak a duhtu cun a nunnak cu a sung ding; asinain zokhal hi leilung ah amah ih nunnak a huatu cun kumkhua hrangin a nunnak cu a neita ding.

²⁶Zokhal keimah i rian duhtu cun i thlun hrimhrim a ṭul ding ih ka umnak ah a um ve ding. Cule zokhal keimah i riantu cu ka Pa in upatnak a pe ding,” tiah a ti.

²⁷Jesuh in, “Ka thinlung a baang tuk; ziangso ka sim ding? ‘Ka Pa, hi caan hi ka parah thlenter hram hlah aw,’ ka ti ding maw? Asinain hi tuarnak sungih thleng dingah leilung tlunih ka rat sannak cu hihi a si fawn!

²⁸Ka Pa, na hmin cu sunloih ko aw,” tiah a ti. Cule van ihsin aw a rung thang ih, “Ka sunloih zo ih ka sunloih sal hrih ding,” tiah a ti.

²⁹Cuih aw cu cutawkih a dingmi miburpi in an theih tikah mi ṭhenkhat in, “Khua a ri,” tiah an ti; a ṭhen in, “Vancungmi in a run bia a si,” an ti.

³⁰Sikhalsehla Jesuh in an hnenah, “Hi aw a rung than hi keimah ih hrangah a si lo, nanmah ih hrangah a si sawn.

³¹Hi leilung hi thuṭhennak a ton caan a kim zo; atu-ah hi leilung uktu cu dawi hlo a si ding.

³²Leilung ihsin khai ka si tikah mi hmuahhmuah ka hnenah ka hiip thluh ding,” tiah a ti.

³³Hitiih a ti tikah ziangbangtuk thihnak a tuar ding ti kha a langternak a si.

³⁴Miburpi in, “Kan Daan in Messiah cu kumkhua in a nung ding, tiah in sim. Cuti asile ziangtinso Milai Fapa cu khai a si ding tiah nang in na ti? Hi Milai Fapa hi zoso a si?” tiah an ti.

³⁵Jesuh in, “Tleunak cu nan hnenah tikcu malte sung a um hrih ding. Tleunak nan neih sungah nan fehnak lamzinah cun feh hrih ko uh; cuti cun thimnak in a lo man lo ding; ziangahtile khawthim sungih a feh pawl cun khuilamah kan feh ti an thei lo.

³⁶Cuhrangah tleunak nan neih laiah cun, tleunak ih minung nan si theinak dingah, tleunak cu zum uh,” tiah a ti. Cutiih Jesuh in a sim hnuah a suak ih an hmuh thei lonak hmun ah a relh.

³⁷An mithmuh rori ah hmuhsaknak tampi a tuah naón amah cu an zum lo.

³⁸Cumi cu profet Isaiah in: “Bawipa, kan thu simmi cu zo in so an zum? Zo hnenah so Bawipa in a huham a langter?” tiah a rak timi a kimnak dingah a si.

³⁹Cule an zum thei thotho lo, ziangahtile Isaiah thotho in:

⁴⁰“Pathian in an mit a cawtter ih, An thinlung khal a pitter. Cuti a si lo ahcun an mit in an hmu pang ding ih, An thinlung in an thei pang ding; Ka lam an hoi pang ding ih, A dam tla ka damter pang ding, tiah Pathian in a ti,” tiin a rak sim fawn.[14]

⁴¹Isaiah in hiti a simnak cu Jesuh sunlawinak kha a rak hmu cia zo ih a thu khal a rak sim zo ruangah a si.

⁴²Cutiin a si ruangah Judah mi hotu tampi in Jesuh cu an zum; Sikhalsehla Farasi pawl in sinakok ihsin in suah pang ding ti phan ah Jesuh an zumnak cu langhngan in an sim ngam lo.

⁴³Pathian hnenih sunlawinak ngah hnakin minung hnenih sunlawinak ngah an duh sawn.

⁴⁴Jesuh cun aw ring zetin, “Zokhal keimah i zumtu cu keimah i zum lawng a si lo, i thlahtu khal a zum a si.

⁴⁵Zokhal keimah i hmutu cu i thlahtu khal a hmu a si.

⁴⁶Zokhal keimah i zumtu cu khawthim sungih a um lonak dingah hi leilung tlunah hin tleunak in ka ra zo.

⁴⁷Zokhal ka thu simmi a thei ih a thlun lotu cu kei cun a thu ka ṭhen lo ding. Leilung thuṭhen dingah ka ra lo, rundam dingah ka ra.

⁴⁸Zokhal i hnongtu le ka thu simmi a pom lotu cu thuṭhentu pakhat a nei. Ka ṭongmi hi ni neta bik ni ah a thuṭhentu ah a cang ding!

⁴⁹Ziangahtile keimah thuneihnak huham ih ka simmi a si lo, i thlahtu ka Pa in ka ṭong ding le ka sim ding kha thu i pek vekin ka sim a si.

⁵⁰Cule a thupekmi cu kumkhua nunnak a si ti ka thei. Curuangah ka simmi hi ka Pa in sim dingih i fialmi a si,” tiah a ti.