Read Falam Chin JOHAN 13 Bible Online

JOHAN 13 - Falam Chin bible

JOHAN 13

¹Lantak Puai ni a thlennak ding ni khat lawng a duh thlang. Jesuh in hi leilung fehsan in a Pa hnenih a fehnak tikcu a ra thleng zo ti kha a thei. Leilung tlunih a ummi amah ih ta a si mi pawl cu a duhdawt zet ringring ih a netnak tiangin a duhdawt.

²Jesuh le a dungthluntu pawl cu zanriah an hil tlang. Satan in Jesuh zuarnak ding ruahnak cu Simon Iskariot ih fapa Judas thinlung sungah a umter zo.

³Ka Pa in thuneihnak hmuahhmuah i pe zo ti kha Jesuh in a thei; Pathian hnen ihsin ka ra ih Pathian hnenah ka feh sal ding ti khal a thei.

⁴Curuangah cabuai ihsin a tho ih a angki fual a phoih hnuah taaingerh puante a taai ah a vel.

⁵Cule kheng kuumpi sungah tidai a thlet hnuah a dungthlun pawl ih ke a kholhsak ih a taai ih a velmi puante in a hnawt vivo.

⁶Simon Piter hnen a thlen tikah anih in, “Bawipa, ka ke i kholh ngaingai ding maw?” tiah a sut.

⁷Jesuh in, “Hitiih ka tuahmi hi atu ahcun a sullam na thei lo, asinain neh hnuah na thei sal leh ding,” a ti.

⁸Piter in, “Ka ke cu ziangtik khalah i kholhsak hrimhrim lo ding,” a ti. Jesuh in, “Na ke ka lo kholh lo a si ahcun ka hnenah na tel thei nawn lo ding,” tiah a ti.

⁹Simon Piter in, “Bawipa, cuti a si ahcun, ka ke lawng i kholh hlah! Ka kut le ka lu khal i kholh aw,” tiah a ti.

¹⁰Jesuh in, “Zokhal tikholh cia a si mi cu a pumpuluk in a fai zo; a ke dah ti lo cu a kholh awk sal a ṭul lo. Nan zatein nan fai ṭheh zo, pakhat siar lo cu!” tiah a ti.

¹¹Jesuh in zo in so i zuar ding, ti a thei cia. Curuangah nan zatein nan thiang a si, pakhat siar lo cu, tiah a tinak a si.

¹²Jesuh cu a dungthluntu pawl ih ke a kholhsak hnuah a angki fual cu a hruk sal ih a tonak cabuai ah a to sal. “Atu nan parih ka tuahmi thil hi a tican nan thei maw?

¹³Nannih in, ‘Sayapa,’ tile ‘Bawipa,’ tiin in ko ih nan dik a si, ziangahtile in ti vekin ka si ngaingai.

¹⁴Nan Bawipa le nan Sayapa keimah in nan ke ka lo kholh zo. Curuangah nannih khal pakhat le pakhat nan ke nan kholh aw ve pei.

¹⁵Nan hrangih thil ka tuahmi vek cekci in nan tuah venak dingah nan mithmuh ah zohṭhim ding ka tuah zo.

¹⁶Thungaite in ka lo sim: sal cu a bawipa hnakin a tum sawn lo; tirhthlahmi khal thlahtu hnakin a tum sawn dah lo.

¹⁷Hi thu pawl nan thei zo ih nan thlun ngaingai a si ahcun ziangtluk mi lungawi so nan si ding?

¹⁸“Hitiih ka ṭong tikah nan zate ih thu ka rel lo. Ka hrilmi pawl cu keimah in ka thei. Sikhalsehla Ca Thianghlim in ‘Keimah thawn rawl a ei tlangtu pa in i dodal a si,’ a timi cu a kim a ṭul a si.

¹⁹Hi thil cu a kim hlanah ka lo sim: cutiin a hung kim ngaingai tikah ‘Keimah cu Keimah a si mi ka si’ tihi nan zum leh ding.

²⁰Thungaite in ka lo sim: Keimah ih ka tirhthlahmi zokhal a rak pomtu cu keimah khal i pom a si; cule keimah i pomtu cu keimah i thlahtu khal a pom ve a si,” tiah a ti.

²¹Cutiin Jesuh in a sim hnuah a thin a nuam lo ngaingai ih langhngan in, “Thungaite in ka lo sim: nanmah lakah pakhat in i zuar ding,” tiah a ti.

²²Dungthluntu pawl cu pakhat le pakhat an zoh aw ih a tisanmi hi zo a si pei tiah mangbang awloksong in an um.

²³Dungthluntu lakih pakhat, Jesuh ih a duh zetmi pa cu Jesuh kiang ah a to.

²⁴Simon Piter in cupa cu a kut a hei zaap ih, “A tisanmi zo a si, sut hnik,” tiah a ti.

²⁵Curuangah dungthluntu cun Jesuh a hei naih deuh ih, “Na tisanmi hi zoso a si, Bawipa?” tiah a sut.

²⁶Jesuh in, “Sang hi kheng sungah ka hnim pei ih ka pek dingmi pa hi a si,” tiah a ti. Cutiin Jesuh in saang hlom khat a lak ih a hnim hnuah Simon Iskariot ih fapa Judas hnenah a pek.

²⁷Judas in cuih sang a lak vete in a sungah Satan a lut. Jesuh in a hnen ah, “Na tuah dingmi cu zamrangin tuah hmen!” tiah a ti.

²⁸Cabuai kiangih a totu dang zokhal in ziang ruangah Judas hnenah cutiin a sim ti an thei lo.

²⁹Judas cu tangka dip kengtu a si ruangah dungthluntu ṭhenkhat pawl cun Jesuh in puai hrangih a ṭulmi kha lei a fial a si hmang, a si lole mi farah hnenah ziang lo thil pek a fial a si hmang, tiah an ruat.

³⁰Judas in Jesuh pekmi sang cu a lak ih hmakhatte ah a suak. Cuih tikcu cu zan a si.

³¹Judas a tlansuak hnuah Jesuh in, “Atu-ah Milai Fapa ih sunlawinak cu a lang zo; cule amah ih sungin Pathian sunlawinak khal a lang a si.

³²Cule a sungin Pathian sunlawinak langter a si ahcun Pathian in Milai Fapa ih sunlawinak cu amah sung rori in a langter ve ding. Cumi cu rei lote-ah a tuah ding a si.

³³Ka faale pawl, nan hnenah reipi ka um nawn lo ding. Keimah hi in hawl ding; sikhalsehla Judah mi hotu pawl hnenih ka sim vekin nan hnen khalah ka sim: ‘Ka fehnak ah nan feh thei lo ding.’

³⁴Cule nan hnenah thukham thar ka lo pek: Pakhat le pakhat duhdaw aw uh! Keimah ih ka lo duhdawt vekin pakhat le pakhat nan duhdaw aw ve pei.

³⁵Pakhat le pakhat tlunah duhdawtnak nan neih ahcun zokhal in keimah ih dungthluntu nan si kha an lo thei ding a si,” tiah a ti.

³⁶Simon Piter in, “Bawipa, khui-ah so na feh ding?” tiah a sut. Jesuh in, “Ka fehnak ahcun i thlun thei hrih lo ding, asinain neh hnuah i thlun leh ding,” tiah a ti.

³⁷Piter in, “Bawipa, ziangah so atu-ah ka lo thlun thei lo? Na hrangah thih ka ngam a sisi!” tiah a let.

³⁸Jesuh in, “Ka hrangah thih na ngam ngaingai maw? Thungaite in ka lo sim: ar a khuan hlanah anih ka thei lo, tiah voi thum tiang i phatsan ding,” tiah a ti.