Read Falam Chin JOHAN 14 Bible Online

JOHAN 14 - Falam Chin bible

JOHAN 14

¹Jesuh in a dungthluntu pawl hnenah, “Thinlung har le beidong in um hlah uh. Pathian zum uhla keimah khal i zum uh.[15]

²Ka Pa ih inn ah innkhaan tampi a um ih nan hrangih umnak rem dingah ka feh ding. Cutiin si hlah sehla hiti in ka lo sim lo ding.

³Cule ka feh ih nan umnak ka rem ngah hnuah ka ra sal ding ih ka hnenah ka lo hruai ding; cuticun ka umnak ah nan um ve ding.

⁴Ka fehnak ding hmunih lamzin cu nan thei ko,” tiah a ti.

⁵Thomas in, “Bawipa, khuiah na feh ding ti kan thei lo; curuangah ziangtinso na fehnak lamzin cu kan theih ding?” tiah a sut.

⁶Jesuh in, “Keimah cu lamzin le thutak le nunnak ka si. Keimah hnenin siarlo zohman ka Pa hnenah an thleng thei lo.

⁷Atu-ah cun zo ka si, ti in thei zo ih ka Pa khal nan thei ding; atu ihsin amah cu nan thei ih a hmuh khal nan hmu zo,” tiah a ti.

⁸Filip in Jesuh hnenah, “Bawipa, na Pa cu in hmuh aw; cule kan lung a kim ding,” a ti.

⁹Jesuh in, “Nan hnenah caan reipi ka um zo naón atu tiang in thei hrih lo maw, Filip? Zokhal keimah i hmutu cu ka Pa a hmu zo. Ziangtin so ‘Na Pa in hmuh aw,’ tiah i sut hrih.

¹⁰Filip, keimah hi ka Pa sungah ka um ih ka Pa khal ka sungah a um, tihi na zum lo maw? Nan hnenih ka ṭongmi hi keimah palung in a suakmi a si lo; ka sungih a ummi ka Pa ih hnaṭuannak in a si.

¹¹Keimah hi ka Pa sungah ka um ih ka Pa khal keimah ih sung ah a um, tiih ka timi hi zum uh. Cumi nan zum thei lo asile thil ka tuahmi ruang tal in zum uh.

¹²Thungaite in ka lo sim: Keimah i zumtu cun ka tuahmi hi a tuah ve ding; a si, ka Pa hnenih ka feh ding ruangah hi hnakih thil mak sawn hman a tuah ding.

¹³Cule ka Pa ih sunlawinak cu Fapa sung ihsin a langnak dingah ka hmin in nan dilmi hmuahhmuah cu ka lo tuahsak ding.

¹⁴Ka hmin in nan dilmi pohpoh cu ka tuah ding a si,” tiah a ti.

¹⁵Jesuh in, “Keimah in duhdawt ahcun ka thukham pawl nan thlun ding.

¹⁶Pa hnenah ka dil ding ih nan hnenih kumkhua a um dingmi Bawmtu[16] dang a lo pe ding.

¹⁷Amah cu Pathian thutak a langtertu Thlarau a si. Leilung in Amah cu a hmu thei lo ih a theih thei fawn lo ruangah a pom thei lo. Sikhalsehla nannih cun nan thei, ziangahtile amah cu nan hnenah a um ih nan sungah a caam ding a si.

¹⁸Ka feh tikah nanmahte lawngin ka lo tanta lo ding; nan hnenah ka ra sal ding.

¹⁹A rei hlanah leilung mi cun in hmu thei nawn lo ding, sikhalsehla nannih cun in hmu ding; cule kei cu a nungmi ka si ruang ah nannih khal nan nung ve ding.

²⁰Cuih ni a thlen tikah keimah nan sungih ka um vek hin ka Pa ih sungah ka um ti le nannih khal ka sungah nan um ve ti kha nan thei ding.

²¹Zokhal ka thukham pawl a pom ih a thluntu cu i duhdawtu a si. Keimah i duhdawtu poh cu ka Pa in a duhdawt ding; keimah khal in ka duhdawt ding ih a hnenah ka lang ding,” tiah a ti.

²²Judas Iskariot a si lomi Judas in, “Bawipa, ziangtinso leilung mi hnenah si loin kan hnen sawnah na lang awkter ding?” tiah a sut.

²³Jesuh in, “Zokhal keimah i duhtu cun ka thu zirhmi a thlun ding. Ka Pa in a duhdawt ding ih ka Pa le keimah kan ra ding ih a hnenah kan um ding.

²⁴Keimah i duh lotu cun ka thuzirhmi khal a thlun lo. Cule ka thuzirhnak nan theihmi pawl hi keimah ih thusuak an si lo, i thlahtu ka Pa hnen ihsin a rami an si.

²⁵Nan hnenih ka um laiah hi thu cu ka lo sim zo.

²⁶Ka hmin in ka Pa in a run thlah dingmi Bawmtu Thlarau Thianghlim in ziang hmuahhmuah a lo zirh ding ih ka lo sim ciami hmuahhmuah khal a lo cinkenter ding.

²⁷Nan hnenah hnangamnak ka lo tanta. Keimah ih hnangamnak ka lo pek a si. Leilung mi ih pek vekin ka lo pe a si lo. Donhar le vansaang in um hlah uh; nan thin khal phang hlah uh.

²⁸Nan hnenah, ‘Ka feh ding, a si naón ka ra kir sal ding,’ tiih ka timi nan thei. In duh ngaingai a si ahcun Pa hnenih ka feh ding hi nan lung a awi ding; ziangahtile Amah cu keimah hnakin a tum sawn.

²⁹Ka sim vekin a hung can ngaingai tikah nan zum theinak dingah atu a can hlan ihsin ka lo sim cia a si.

³⁰Nan hnenah reipi thu ka sim thei nawn lo; ziangahtile hi leilung uktu pa a ra zo a si. Ka parah thuneihnak zianghman a nei lo,

³¹sikhalsehla ka Pa ka duhdawt kha leilung mi in an theih a ṭul; cutiih an theih theinak dingah Amah in thu i pekmi hmuahhmuah ka tuah ṭheh a si. Ra uh, hitawk hmun ihsin feh uhsi,” tiah a ti.