Read Falam Chin JOHAN 16 Bible Online

JOHAN 16 - Falam Chin bible

JOHAN 16

¹“Nan zumnak ihsin nan tluksawn lonak dingah hi thu hi ka lo sim.

²Sinakok ihsin an lo dawi ding; zozo khal in nanmah thah hi Pathian hnaṭuan ih an ruah caan a ra thleng ding.

³Mi in cuti vek cun nan parah an tuah ding, ziangahtile Pa an thei lo ih keimah khal in thei lo.

⁴Asinain atu ihsin ka lo sim cia, ziangahtile nan parih an tuah ngaingai tikah in rak sim cia zo ti kha nan thei ding. “Nan hnenih ka um ruangah a hramthok ihsin hi thu hi ka lo sim lo.

⁵Atu cu i thlahtu hnenah ka feh thlang ding; sikhalsehla zohman in khuiah na feh ding tiah in sut hrih lo.

⁶Hitiih ka lo sim hai ruangah nan thinlung cu riahsiatnak in a khat.

⁷Asinain thungaite in ka lo sim: ka feh ahcun nan hrangah a ṭha sawn, ziangahtile ka feh lo ahcun nan hnenah Bawmtu a ra lo ding. Asinain ka feh ahcun amah cu nan hnenah ka run thlah ding.

⁸Cule a rat tikah leilung mi pawl hnenah sualnak thu an ruahdan a palhzia, thudik an ruahdan a palhzia le Pathian thuṭhennak thu an ruahdan a palhzia pawl kha a langter ding.

⁹Sualnak thu an ruahdan a palh, ziangahtile keimah in zum lo ruangah a si.

¹⁰Thudik an ruahdan a palh, ziangahtile ka Pa hnenah ka feh ding ih in hmuh nawn lo ding ruangah a si.

¹¹Cun thuṭhennak thuhla khalah an ruahdan a palh, ziangahtile leilung uktu bawi hi thuṭhen cia zo a si ruangah a si.

¹²“Nan hnenah sim ding tampi ka nei, asinain atu-ah cun nan ciing thei cawk lo ding.

¹³Sikhalsehla Thlarau a run tikah cun Pathian thutak langtertu a si ruangah thutak hmuahhmuah ah a lo hruai ding. Ziangahtile amah ih thuthu in zianghman a ṭong lo ding; asinain a theihmi kha a sim ding ih a ra thleng leh dingmi thu tla kha a phuang ding.

¹⁴Amah in sunlawinak i pe ding, ziangahtile ka sim ciami kha a lak ding ih nan hnenah a phuang ding.

¹⁵Ka Pa ih neihmi hmuahhmuah cu ka ta a si, curuangah Thlarau in ka pekmi cu a la ding ih nan hnenah a phuang ding, tiah ka lo tinak a si.

¹⁶“Tikcu rei lote-ah in hmu nawn lo ding; cule caan malte hnuah in hmu sal ding,” tiah Jesuh in a ti.

¹⁷A dungthluntu ṭhenkhat pawl cun, “Cumi cu a tican ziang a si pei? Tikcu rei lote-ah in hmu nawn lo ding; cule caan malte hnuah in hmu sal ding, tiah in ti. Cule ‘Pa hnenih ka feh ding ruangah,’ ti tla in a ti fawn.

¹⁸‘Rei lote-ah,’ timi hi ziang a ti duhnak a si pei? A sim duhmi hi kan thei thei hrimhrim lo!” tiah pakhat le pakhat an ti aw.

¹⁹A hnenah thusuh an duh kha Jesuh in a thei ih an hnenah, “Kei in ‘Tikcu rei lote-ah in hmu nawn lo ding; cule caan malte rei hnuah in hmu sal ding,’ ka ti ruangah maw nannih pakhat le pakhat thu nan sut awk rero?

²⁰Thungaite in ka lo sim: nannih cu nan ṭap nan ai ding naón leilung cu a lung a awi ding; nan riah a sia ding, asinain nan riahsiatnak cu lungawinak ah a cang leh ding.

²¹Nunau in nau a hrin zik tikah natnak a tuar, ziangahtile nauhrin nat a ra thleng zo; sikhalsehla naute a suak ngah tikah cun lei tlunah naute thar pakhat a suah ruangah a tuarnak hmuahhmuah cu a hngilh ṭheh.

²²Cubangtuk in nannih tla nan si ve ding: atu-ah cun nan riah a sia, sikhalsehla ka lo hmu sal ding ih nan thinlung cu lungawinak in a khat ding; cuih lungawinak cu zohman in an lo lawng thei nawn lo ding.

²³Cuih ni a thlen tikah cun zianghman in sut nawn lo ding. Thungai in ka lo sim: ka hmin in nan dilmi hmuahhmuah cu ka Pa in a lo pe ding.

²⁴Atu tiangah ka hmin in zianghman nan dil dah lo. Dil uh nan ngah ding; cuticun nan lungawinak cu a kim ding.

²⁵“Atu tiang cu hi thu pawl ka sim tikah tahṭhimnak lawnglawng ka hmang. Sikhalsehla tahṭhimnak hmang nawn loin lailan in ka Pa ih thu ka simnak tikcu a ra thleng ding.

²⁶Cuih ni a thlen tikah a hnenah ka hmin in nan dil ding; nanmah ih ai-ah ka lo dilsak ding tiah ka sim lo;

²⁷ziangahtile ka Pa amah rori in a lo duhdawt a si. Nannih in in duhdawt ih Pathian hnen ihsin ka rat kha nan zum zo ruangah ka Pa in a lo duhdawt a si.

²⁸Pa hnen ihsin ka ra ih leilungah ka ra thleng. Atu cu leilung ka tlansan ding ih Pa hnenah ka feh ding,” tiah a ti.

²⁹Cun a dungthluntu pawl in a hnenah, “Atu-ah cun tahṭhimnak telh loin lailante in in sim ruangah,

³⁰ziang hmuahhmuah theitu na si, ti kan thei zo; curuangah thu kan lo suh rero a ṭul nawn lo. Cumi in Pathian hnen ihsin a rami na si, ti kha in zumter zo,” tiah an ti.

³¹Jesuh in, “Atu-ah in zum ngaingai maw?

³²Nan zatein ṭhendarh ṭheh nan si ding ih nan inn ciarah nan tlung ding; keimahte lawng in taan tikcu a ra thleng ding; a si, atu a ra thleng zo. Sikhalsehla Pa ka hnenih a um ruangah keimah lawng ngaingai cu ka si lo.

³³Keimah thawn nan pehzom awknak thawngin hnangamnak nan ngah theinak dingah hi thu hi ka lo sim. Leilung in harsat tuarnak a lo pe ding. Sikhalsehla nan ral ṭha uh; Leilung cu ka neh zo!” tiah a ti.