Read Falam Chin JOHAN 17 Bible Online

JOHAN 17 - Falam Chin bible

JOHAN 17

¹Jesuh in hi thu a sim ṭheh hnuah vanlam a zoh ih, “Ka Pa, a tikcu a ra thleng zo. Fapa in sunlawinak a lo pek theinak dingah na Fapa hnenah hin sunlawinak run pe hram aw.

²Fapa hnenih na pek zomi mi hmuahhmuah hnenih kumkhua nunnak a pek theinak dingah leilung tlun miphun hmuahhmuahih tlunah thuneihnak na pek zo.

³Cuih kumkhua nunnak timi cu nangmah lawng Pathian taktak na sizia theih le na thlahmi Jesuh Khrih theih hi a si.

⁴Hnaṭuan i pekmi ka ṭuan ṭheh zo ih na sunlawinak cu leilung ah ka langter zo.

⁵Curuangah maw ka Pa, leilung seemsuah a si hlanih nangmah thawn sunlawinak ka rak neihmi kha atu na mithmuh ah hin i pe hram aw!

⁶“Leilung ihsin na kawhsuakmi pawl hnenah na hmin cu ka langter zo. Cupawl cu na ta an si ih ka hnenah i pekmi an si. Na thu an thlun ih,

⁷atu cu ka hnenih i pekmi hmuahhmuah hi na hnen ihsin a rami an si ti tla an thei.

⁸I pekmi na thu kha ka sim hai ih annih in an pom zo. Na hnen ihsin a rami ka si ti thutak hi an thei taktak ih i thlahmi ka si ti khal hi an zum zo.

⁹“Anmah hrangah thla ka cam. Leilung hrangah thla ka cam lo, asinain i pekmi pawl hrangah ka cam; ziangahtile na ta an si.

¹⁰Ka neihmi hmuahhmuah hi na ta an si ih na neihmi hmuahhmuah khal hi ka ta an si; cule an sung ihsin ka sunlawinak a lang.

¹¹Cun atu-ah na hnenah ka ra ding; kei cu leilungah ka um nawn lo ding, asinain annih cu leilungah an um hrih ding. A Thiangmi ka Pa, nangmah le keimah cu pakhat kan si vekin leilungih a um hrihmi pawl cu pumkhat an si theinak dingah i pekmi na hminih huham in humhim hai aw.

¹²An hnenih ka um laiah nangmah ih i pekmi na hminih huham in ka hum hai. Ca Thianghlim sungih a ummi a kimnak dingah a hloral ding a rak si ciami pakhat dah ti lo cu mi pakhat hman an hloral lo; ka humhim ṭheh hai a si.

¹³Atu cu na hnenah ka ra thlang ding; leilung tlunah hi thu pawl ka simnak cu ka lungawinak kha an thinlung sungah famkim zetih an neih theinak dingah a si.

¹⁴Keimah cu hi leilungih ta ka si lo vek hin annih khal hi leilungih ta an si ve lo; curuangah na thu cu an hnenih ka sim tikah leilung in anmah a huatnak cu a si.

¹⁵Anmah kha leilung ihsin lasuak aw tiah ka lo dil lo, asinain Miṭha lo pa ih[17] hnen ihsin humhim hai aw tiah ka lo dil a si.

¹⁶Kei cu leilungih ta ka si lo vekin annih khal leilungih ta an si ve lo.

¹⁷Annih cu thutak in na ta siter hai aw; na ṭongkam cu thutak a si.

¹⁸Kei cu leilungah i thlah vekin annih khal ka thlah ve a si.

¹⁹Anmah tla thutak ih thianter an si theinak dingah keimah khal ka thiangter aw a si.

²⁰“Anmah hrang lawngah thla ka cam a si lo; an thusimmi a thei ih keimah i zumtu ding pawl hrang khalah thla ka cam.

²¹An zatein pakhat an si theinak dingah thla ka cam. Ka Pa, nangmah cu ka sungah na um ih kei khal na sungih ka um vekin annih khal kan sungah um ve hram hai seh. Nangmah in i thlah hi leilung in an zum theinak dingah annih cu pakhat ah cang hram hai seh.

²²Nangmah le keimah cu pakhat kan si vekin annih khal pakhat ih an can theinak dingah nangmah ih i pekmi sunlawinak kha anmah khal ka pek ve a si.

²³Annih pawl cu pakhat taktak an si ih cuticun leilung in nangmah ih thlahmi ka si ti a theihnak dingah le keimah i duhdawt vekin annih khal na duhdawt ti an theihnak dingah kei cu anmah ih sungah ka um ih nang cu ka sungah na um a si.

²⁴“Ka Pa, nangmah ih i pekmi ka sunlawinak hi annih in an hmuh theinak dingah nangmah in annih cu ka kut sungah i pe zo. Anmah cu keimah ka umnak poh-ah um ve hai seh ti ka duh; ziangahtile leilung seemsuah hlan ihsin i duhdawt zo.

²⁵A dingmi ka Pa, nang cu leilung hin a lo thei lo, sikhalsehla kei cun ka lo thei ih annih in nangmah ih i thlah hi an thei.

²⁶An hnenah na hmin cu ka phuang zo ih, ka parih duhdawtnak na neihmi hi an sungih a um venak dingah le keimah khal an sungih ka um venak dingah na hmin cu ka phuang vivo hrih ko ding,” tiah thla a cam.