Read Falam Chin JOHAN 21 Bible Online

JOHAN 21 - Falam Chin bible

JOHAN 21

¹Cuih hnuah Jesuh cu a dungthluntu pawl hnenah Tiberias Tili ah a lang sal. A lang daan cu hiti in a si.

²Simon Piter, Faphir timi Thomas, Galilee peng Kana khuami Nathanael, Zebedi fapa pawl le Jesuh dungthluntu pahnih tla hmunkhat ah an tong khawm aw.

³Simon Piter in, “Kei cu sur ka vorh ding,” tiah a ti. Midang khal cun, “Kan ra tel ve ding,” an ti fingfing. Cutiin lawng pakhat in an feh; asinain cuih zan cu zianghman an kai lo.

⁴Ni a hung suah zawng ah Jesuh cu tikapte-ah a ding, asinain Jesuh a si ti kha dungthluntu pawl cun an thei lo.

⁵Jesuh in, “Naule uh, ziangtal nan kai lo maw?” tiah a sut. Annih in, “Zianghman kan kai lo,” an ti.

⁶Jesuh in, “Nan lawng ih vorhlam kamah khan nan sur hei vorh uhla malte tal cu nan kai ding,” a ti. Cuti cun an sur cu an hei vorh ngaingai ih tamzet an awk ngah ruangah an sur hman cu an dir sal thei nawn lo.

⁷Jesuh ih a duhdawtmi dungthluntu cun Piter hnenah, “Bawipa sokhaw a si!” tiah a ti. Piter in Bawipa a si ti kha a theih tikah (a hnipuan a rak phoih cia ruangah) a kor lenghruk kha a hruk lohli ih ti sungah a dawp.

⁸Dungthluntu dang pawl in nga a khatmi an sur cu an dir vivo ih tikap an thleng. Leilung ihsin a hla lem lo, pi zathum tluk lawng a rak si.

⁹Tikap ih an hung kai tikah meiling parah nga le saang em ciami kha an hmu.

¹⁰Cule Jesuh in an hnenah, “Nan kaihmi nga cu rak keng uh,” tiah a ti.

¹¹Simon Piter cu lawng sungah a hung kai ih nga tumpipi a khatmi sur cu tikap ah a dirh. Nga cu pum za le sawmnga le pum thum a si; cutluk tam a si naón sur cu a tlek lo.

¹²Jesuh in an hnenah, “Ra uhla thawhhlam ra ei uh!” a ti. Dungthluntu lakah zohman in, “Zoso na si?” tiah an sut ngam lo; ziangahtile Bawipa a si ti an thei.

¹³Jesuh cu a va feh ih saang kha a lak ih a pek; nga khal a pek hai.

¹⁴Himi cu Jesuh thihnak ihsin a thawh hnuah dungthluntu hnenih a lang voithumnak a si.

¹⁵An ei ṭheh hnuah Jesuh in Simon Piter cu, “Johan fapa Simon, hi midang pawl ih in duhdawt hnakin nang in i duhdaw sawn maw?” tiah a sut.[21] Simon in, “A si Bawipa, ka lo duhdawt cu na thei,” tiah a ti. Jesuh in a hnenah, “Ka tuunote pawl kilkhawi aw,” tiah a ti.

¹⁶A voihnihnak ah Jesuh in, “Johan fapa Simon, i duhdaw maw,” tiah a sut sal. Simon in, “A si Bawipa, ka lo duhdawt cu na thei,” tiah a let. Jesuh in, “Ka tuu pawl kilkhawi aw,” tiah a ti.

¹⁷Jesuh in, “Johan fapa Simon, i duhdaw maw?” tiah voithumnak a sut lala. Cutiin voithum tiang Jesuh in, “I duhdaw maw?” tiih a sut ruangah Piter cu a riah a sia ih Jesuh hnenah cun, “Bawipa, nang cun ziang hmuahhmuah na thei ṭheh. Ka lo duhdawt ti khal na thei ṭheh ko a sisi!” tiah a ti. Cule Jesuh in, “Ka tuu pawl kilkhawi aw.

¹⁸Thungaite in ka lo sim: na no laiah cun na tim na tuah ih na duhnak hmun poh ah na feh; asinain na tar tikah cun na ban na pharh ding ih midang in an lo ṭem ding ih na duh lonak hmunah an lo fehpi ding,” tiah a ti.

¹⁹Hitión a ṭong tikah Piter hi ziangbangtuk thihnak a tuar ding ih ziang bangtuk in Pathian hnenah sunlawinak a pe ding, ti kha Jesuh in a langternak a si. Cule Jesuh in, “I thlun aw,” tiah a ti.

²⁰Piter cu a her ih a dunglamah Jesuh ih a duhdawtmi dungthluntu kha a hmu. Hi dungthluntu pa cu rawl an ei laiah Jesuh a hei naih ih, “Bawipa, a lo zuartu ding cu zoso a si?” tiih a suttu kha a si.

²¹Piter in cupa kha a hmuh tikah, “Bawipa, hi pa hi teh ziangti in so a si ding?” tiah Jesuh cu a sut.

²²Jesuh in, “Ka rat tiang nung dingih ka duhmi a si ahcun na hrangah ziangso a poinak a um? I thlun sawn aw!” tiah a ti.

²³Curuangah hi dungthluntu cu a thi lo ding tiah Jesuh ih dungthluntu pawl lakah thu a thang. Sikhalsehla Jesuh in a thi lo ding, a timi a si lo: “Ka rat tiang nung dingih ka duhmi a si ahcun na hrangah ziangso a poinak a um?” a timi a si.

²⁴Hi dungthluntu cu hi thu pawl a simtu le a ngantu khal a si; cule a simmi cu a dik a si ti kan thei.

²⁵Jesuh ih a tuahmi thil dang tampi a um hrih. Pakhat hnu pakhat ngan vivo sehla nganmi cabu pawl cu leilung pumpi hmanah hin a tlem cawk lo ding tiah ka ruat.