Read Falam Chin JOHAN 6 Bible Online

JOHAN 6 - Falam Chin bible

JOHAN 6

¹Cuih hnuah Jesuh cu Galilee Tili khatlam ral ah a va feh. Cuih Tili cu Tiberias Tili ti tla in an ko.

²Hmuhsaknak a tuahnak in mina tampi a damtermi kha an rak hmuh zo ruangah miburpi in amah cu an thlun.

³Jesuh cu tlangpar ah a hung kai ih cunah a dungthluntu pawl thawn an to.

⁴Lantak Puai timi Judah mi pawl ih puai cu a nai thlang.

⁵Cule Jesuh in a kiangkap kha a zoh tikah miburpi in amah an pan luailo kha a hmu ih Filip hnenah, “Minung hi-hmuah ei dingah khui tawkin so rawl kan lei ding?” tiah a sut.

⁶Hitiih a suh cu Filip hniksaknak ah a si; a ngaingai ti ahcun ziang ka tuah ding ti kha a thei cia zo.

⁷Filip in, “Mi pakhat in malte fingfing co ding hmanah mi hizat ih ei ding ahcun ngun tangka[9] za hnih man lei hmanah a daih lo ding,” tiah a ti.

⁸A dungthlun a si vemi midang pakhat, Simon Piter ih nau Andru in,

⁹“Hinah hin nauhak pakhat a um ih barli saang hlom nga le nga pum hnih a nei. Asinain minung hizat hrangah cun zianghman a si tham lo,” tiah a ti.

¹⁰Jesuh in, “Mi senpi pawl cu toter hai uh,” tiah a dungthluntu pawl cu a sim. Cutawkah cun hrampi a tamzet. Cuti cun mipi cu an to ih an zatein thawng nga tluk an si.

¹¹Jesuh in sang cu a lak ih Pathian hnenah lungawi thu a sim hnuah a tomi pawl hnenah cun a zem. Nga khal cutivek ṭhiamṭhiam in a zem ih misenpi cun an ei thei tawkin an ei.

¹²Rawl an ei khawh tikah a dungthluntu pawl hnenah cun, “An hlahmi kha sar ṭheh uh; malte hman hlon lak hlah uhsi,” tiah a ti.

¹³Cutiin an hlahmi cu an sar khawm tikah barli sang hlom nga sungin mipi ih an ei hnuah a taangmi bawm hleihnih an sar.

¹⁴Jesuh ih tuahmi hmuhsaknak cu mipi in an hmuh tikah annih in, “Leilung ah a ra ding, timi profet cu amah rori hi a si,” tiah an ti.

¹⁵Misenpi in an siangpahrang ih tuah dingah hranhram in in ra kai ding, ti kha Jesuh in a thei; curuangah tlangpar ah amahte lawng a feh.

¹⁶Zanlam khua a rung tlai tikah Jesuh ih dungthluntu pawl cu tili lamah an vung ih,

¹⁷lawng sungih an to hnuah tili khatlam ral, Kapernaum khualam ahcun an va kir sal. Zan a si zo ih an hnenah Jesuh cu a ra thleng hrih lo.

¹⁸Culai fangah thli nasa zetin a hung hrang ih tilet a tho ciamco.

¹⁹Long cu an hlau ih peng thum peng li tluk an feh tikah Jesuh cu tidai parah feh tahratin anmah lamih a rat vivo kha an hmu ih an ṭih ngaingai.

²⁰Sikhalsehla Jesuh in, “ṭih hlah uh; Keimah ka si!” tiah a ti.

²¹Cule lungawi zetin Jesuh cu an lawng sungah an kaiter ih an feh duhnak hmun ah reilote-ah an va thleng.

²²A thaizing ah tili khatlam ralih a ummi misenpi pawl in cutawkah lawng pakhat lawng a um, cuih lawng sungah Jesuh a um lo ih a dungthluntu pawl lawng an feh a si, ti kha an thei.

²³Tiberias ihsin a rami lawng dangdang tla cu Bawipa in lungawi thu a sim hnuah misenpi in saang an einak hmun kiang tili kapah an ra thleng.

²⁴Cutawkah Jesuh le a dungthluntu pawl an um lo tikha misenpi in an hmuh tikah cutawkih lawng pawl to in Jesuh hawl duh ah Kapernaum ah an feh.

²⁵Jesuh cu tili khatlam ralih an va hmuh tikah mipi pawl cun, “Sayapa, ziangtikah so hitawk ih na thlen?” tiah an sut.

²⁶Jesuh in, “Thungaite in ka lo sim: in ra hawl hi hmuhsaknak ka tuahmi nan theihthiam ruangah a si lo, sang khop zetih nan ei ruangah a si.

²⁷A siat theimi rawl hrangah hna ṭuan hlah uh; sikhalsehla kumkhua a daihmi nunnak rawl hrangah ṭuan uh. Cuih rawl cu Milai Fapa ih a lo pek dingmi a si, ziangahtile Pa Pathian in a parah a lungkimnak tacik a khen zo,” tiah a ti.

²⁸Curuangah annih in, “Pathian in ṭuan hai seh ti in duh sakmi tuah dingah ziangso kan tuah ding?” tiah an sut.

²⁹Jesuh in, “Pathian in ṭuan hai seh ti a lo duh sakmi cu a thlahmi pa zum kha a si,” tiah a ti.

³⁰Annih in, “Kan hmuh ih kan lo zum theinak dingah ziangvek hmuhsaknak so na tuah ding? Ziang si na tuah dingmi cu?

³¹Ca Thianghlim sungih ‘An ei dingah vancung ihsin sang a pek,’ tiih a um vekin kan pupa pawl cun nelrawn ramṭhing ah khan manna sang an ei a si,” tiah an ti.

³²Jesuh in, “Thungaite in ka lo sim: Moses ih a lo pekmi cu vancung saang ngaingai a si lo. Ka Pa in vancung saang ngaingai cu a lo pek a si.

³³Ziangahtile Pathian ih a pekmi saang cu vancung ihsin a rungṭum ih leilung mi nunnak a petu pa hi a si,” tiah a ti.

³⁴Annih in, “Bawipa, cuih saang cu in pe ringring aw,” tiah an dil.

³⁵Jesuh in an hnenah cun, “Keimah hi nunnak sang ka si. Ka hnenih a rami cu a ril a rawng dah lo ding; keimah i zumtu cu a ti a haal dah lo ding.

³⁶Cule ka lo sim hai zo vekin a hmuh cu in hmu zo naón in zum duh lo.

³⁷Ka Pa ih i pekmi pohpoh cu zokhal ka hnen ah an ra ding. Ka hnenih a rami cu zohman ka khir lo ding,

³⁸ziangahtile vancung ihsin ka rung ṭum tikah hin keimah ih duhmi tuah dingah ka rung lo, i thlahtu ih duhmi tuah dingah ka rung a si.

³⁹Cule i thlahtu ih duhmi cu hihi a si: I pekmi hmuahhmuah kha pakhat hman hloter loin, ni neta bik ni-ah an zate ih ka thawhter sal ṭheh ding kha a si.

⁴⁰Ziang hrangah tile ka Pa ih duhmi cu Fapa kha a hmu ih a zumtu hmuahhmuah cu kumkhua nunnak an ngahnak ding kha a si. Cule ni neta bikah nunnak ah ka thoter ding a si,” tiah a ti.

⁴¹“Keimah hi vancung ihsin a rungmi saang ka si,” a ti ruangah Judah mi senpi pawl cu an phunzai ruri.

⁴²Curuangah, “Hi pa hi Josef fapa Jesuh a si lo maw? A nu le a pa tla cu kan theih thluhmi an si ko! Ziangtin so ‘Vancung ihsin ka rung,’ tiah a ti rero thei?” tiah an ti.

⁴³Jesuh in, “Phunzai ruri nawn hlah uh!

⁴⁴I thlahtupa in ka hnenih a kuat lo ahcun zohman ka hnenah an ra thei lo ding; cutiih ka hnenih a rami cu ni neta bikah nunnak ah ka thoter ding.

⁴⁵Profet pawl in, ‘Zokhal Pathian in a zirh hai ding,’ tiah an rak ngan. Zokhal Pa a thei ih a hnen ihsin a zirtu cu ka hnenah a ra.

⁴⁶Hiti ka ti tikah zokhal in Pa cu an hmu zo, tinak a si lo; Pathian hnen ihsin a ra mipa lawng hi Pa hmutu cu a si.

⁴⁷Thungaite in ka lo sim: a zumtu cun kumkhua nunnak a nei.

⁴⁸Keimah hi nunnak saang ka si.

⁴⁹Nan pu le nan pa pawl cu nelrawn ramṭhing ah manna saang an ei naón an thi thotho.

⁵⁰Sikhalsehla vancung ihsin a rung ṭummi saang hi a eitu hmuahhmuah cu an thi lo ding.

⁵¹Keimah hi vancung ihsin a rung ṭummi saang nung ka si. Hi saang a eitu cu kumkhua in a nung ding. Ka pek dingmi saang cu hi leilung in nunnak a ngah theinak dingih ka pekmi ka taksa hi a si,” tiah a ti.

⁵²Cutiih a ti ruangah cun an lakah thinheng thu-el awknak tiang a suak ih, “Ziangtin so hi pa hin kan ei dingah a taksa cu in pek thei ding?” tiah an ti ciamco.

⁵³An hnenah Jesuh in, “Thungaite in ka lo sim: Milai Fapa taksa nan ei lo ih a thisen tla nan in lo ahcun nan sungah nunnak nan nei lo ding.

⁵⁴Zokhal ka taksa a ei ih ka thisen a intu cu kumkhua nunnak a nei ih ni neta bikah nunnak ah ka thoter ding.

⁵⁵Ziangahtile ka taksa hi rawl taktak a si ih ka thisen cu in dingmi taktak a si.

⁵⁶Zokhal ka taksa a ei ih ka thisen a intu cu ka sungah a nung; cule keimah khal a sungah ka nung a si.

⁵⁷A nungmi Pa in i thlah ih amah ih ruangah kei khal ka nung a si. Cubangtuk thotho in keimah i eitu cu keimah ih ruangah a nung ve ding.

⁵⁸Vancung ihsin a rungmi saang timi cu himi hi a si; nan pu le nan pa pawl cun saang an ei ih malte a hung rei cun an thi thotho; vancung ihsin a rungmi saang cu cuvek a si lo. Hi saang a eitu ih piang cu kumkhua in an nung ding,” tiah a ti.

⁵⁹Himi cu Kapernaum khua sinakok sungih thu a zirh laiih a simmi pawl an si.

⁶⁰Amah a thluntu tampi in cuih thu cu an thei ih, “A thu zirhmi hi a hartuk ual! Zoso a thei thei ding?” tiah an ti.

⁶¹An sim lo naón cuih thu-ah an phunzai ciamco ti kha Jesuh in a thei ih an hnenah, “Himi hin nan thinlung ah buainak a suahter maw si?

⁶²Thuṭhimnak ah Milai Fapa hi hlanih a rak umnak hmunih a hung feh sal kha hmu uhla ziangtinso nan ti ding?

⁶³Nunnak taktak a petu cu Thlarau a si; milai-ih taksa cu san a tlai lo. Nan hnenih ka simmi ṭongkam hi nunnak le Thlarau petu a si.

⁶⁴Asinain mi ṭhenkhat cun nan zum lo,” tiah a ti. Jesuh in a hramthokte ihsin zoso i zum lotu ding, tile zoso i zuartu ding ticu a thei ṭheh zo.

⁶⁵Cule Jesuh in, “Hiti a si ruangah sokhaw Pa in ka hnenih a ratter lo ahcun zohman ka hnenah an ra thei lo ding, tiah ka lo simnak kha a si cu!” tiah a ti.

⁶⁶Curuangah Jesuh dungthluntu misenpi cun kir in an tlansan.

⁶⁷Curuangah a dungthluntu hleihnih kha, “Nannih teh tlan nan duh ve maw?” tiah a sut.

⁶⁸Simon Piter in, “Bawipa, zo ih hnenah so kan feh cuang ding? Kumkhua nunnak petu ṭongkam a neitu cu nangmah na sisi!

⁶⁹Cule atu cun Pathian hnen ihsin a rami Mi Thianghlim na si ti kha kan zum ih kan thei ngah a si,” tiah a ti.

⁷⁰Jesuh in, “Nannih hleihnih hi keimah ih hrilmi nan si, a si lo maw? Asinain pakhat cu satan a si,” tiah a ti.

⁷¹Hitiih a ti sanmi cu Simon Iskariot ih fapa Judas kha a si. Ziangahtile Judas cu dungthluntu hleihnih lakih a telmi a si naón Jesuh zuartu ding a si.