Read Falam Chin TIRHTHLAH 1 Bible Online

TIRHTHLAH 1 - Falam Chin bible

TIRHTHLAH 1

¹Bawipa Theofilas, Ka cabu hmaisa sungah khan Jesuh in hnaṭuan hram a thawh ihsin vancungih lakso a si ni tiang,

²a thil tuahmi hmuahhmuah le a thuzirhmi hmuahhmuah kha ka ngan. Vancung ih lakso a si hlanah Amah ih a hrilmi a tirhthlah pawl cu Thlarau Thianghlim cahnak huham thawn ṭhatein thu a zirhta hai.

³A thih hnuah ni sawmli sung an hnenah voi tampi a lang ih a nungsal a si ti kha zohmanih el thei lo dingin phun tampi in a langter. Amah an hmu ih anih in Pathian Uknak thu kha an hnenah a sim.

⁴Cule hmun khatih an tonkhawm awk laiah, an hnenah hiti in thu a pek: “Jerusalem ihsin khuihmanah feh hlah uh. Ka Pa in laksawng a lo pe ding tiah ka lo sim ciami kha hngak sawn uh.

⁵Johan cun tidai in baptisma a pe; asinain ni malte sungah Thlarau Thianghlim thawn baptisma pek nan si ding,” tiah a ti.

⁶Tirhthlah pawl cu Jesuh thawn an ton awk tikah annih in, “Bawipa, atuih caanah hin Israel mi hnenah Uknak cu na pe sal ding maw?” tiah an sut.

⁷Jesuh in an hnenah, “A cuih tikcu le nithla cu ka Pa ih thuneihnak ih khiah-mi a si ih nannih theih ṭulmi a si lo.

⁸Sikhalsehla nan hnenih Thlarau Thianghlim a rung thlen tikah cahnak huham thawn nan khat ding ih Jerusalem le Judea ram le Samaria ram hmuahhmuah le leilung tlun a deng tiang keimah ih theihpitu nan si ding,” tiah a ti.

⁹Cutiih a sim ṭheh tikah Jesuh cu an mithmuh rori-ah vanah laakso a si ih mero in a phen ih an hmu thei nawn lo.

¹⁰Cutiih a hung kainak van cu an zoh cuahco laiah puanvaar sinin mi pahnih hmakhatte-ah an kiangah an rung ding ih,

¹¹“Galilee mi pawl, ziangah so van zoh in nan din cuahco? Nan hnen ihsin vanih a kaimi Jesuh hi vanih a kai lai nan hmuh vek cekci in a rakir sal leh ding,” tiah an ti.

¹²Cule Jesuh ih tirhthlah pawl cu Olif Tlang ihsin Jerusalem ah an kir. Olif Tlang cu Jerusalem ihsin peng hrek tluk a hlat.[1]

¹³Khawpi sungah an vung feh ih an umnak tlunta khaan ah an hung lut. Piter le Johan, Jeim le Andru, Filip le Thomas, Bartholomeo le Matthai, Alfias ih fapa Jeim, phun ṭantu Simon, le Jeim ih fapa Judas tla an si.

¹⁴Hmun khatih thlacam tlang dingah an tongkhawm ṭheu ih nunau pawl le Jesuh ih nu Mari le Jesuh ih naule pawl tla an tel.

¹⁵Ni malte a rei hnuah zumtu pawl an tongkhawm aw ih minung za le kul hrawng an si. Piter cu a ding ih,

¹⁶“Ka u le ka nau pawl, Thlarau Thianghlim in David ih hmurka hmangin a sim ciami Jesuh a kaitu pawl hruaitu Judas ih thu cu Ca Thianghlim sungih an ngan vekin a kim a ṭul a si.

¹⁷Judas cu kan hnaṭuanpi sungih tel ve dingah hrilmi a si ruangah kan pawl sungah sungtel a rak si ve,” tiah a ti.

¹⁸(Judas in thilsual a tuahmi manih a ngahmi tangka in lo pakhat a lei ih cuih lo sungah a bah ih a thi; a pum a kuai ih a sungril hmuah a pawt ṭheh.

¹⁹Cuih thu cu Jerusalem ih a ummi hmuahhmuah in an thei ih anmah ih ṭong in cuih lo cu Akeldama an ti; a tican cu, “Thisen Lo,” tinak a si.)

²⁰Piter in, “Ziangah tile Saam cabu sungah, ‘A inn cu lawng sehla A sungah zohman um hlah hai seh,’ tiah ngan ciami a um. Cule hmun dangah, ‘Midang in a hnaṭuan cu la hai seh,’ tiin a um fawn.

²¹“Cuti a si ih Bawipa Jesuh thawhsalnak thutheitu-ah pakhatkhat cun in telpi a ṭul a si. Amah cu Bawi Jesuh kan hnenih khual a tlawn vivo sung hmuahhmuah kanmah lakah a tel ih, Johan in baptisma thu a simnak ihsin thokin Jesuh kan hnenin vanih laakso a si ni tiang, kanmah lakah a tel vemi a si ding,” tiah a ti.

²³Curuangah mi pahnih ih hmin an pek. Anmah cu Barsabbas ti ih kawhmi Josef, (Justus ti tla in an kawhmi) le Matthias an si.

²⁴Cule thla an cam ih, “Bawipa, nang cun mi thinlung sung na thei ṭheh; himi pahnih lakah zo deuh na hril ti run langter aw;

²⁵a co dingmi hmunah in fehsantu Judas ih ai-awhtu ah na tirhthlah pawl lakih ṭuanvo la dingah na hrilmi cu run fiangter aw,” tiah an ti.

²⁶Cule an pahnih sungah zoso tirhthlah a si ding ti theihnak ah camcawhfung an zuuk ih Matthias in a ngah. Matthias cu tirhthlah hleikhat pawl hnenah an betcih.