Read Falam Chin TIRHTHLAH 10 Bible Online

TIRHTHLAH 10 - Falam Chin bible

TIRHTHLAH 10

¹Sisaria khua[8] ah Kornelias an timi pa a um. Amah cu, “Italy Ralkap Burpi,” timi Rom ralkap bu uktu ralbawi bothum a si.[9]

²Amah cu Pathian a ṭihzah zettu a si; a innsungsang in Pathian a bia ringringtu an si. Judah mi mifarah pawl tampi a bawm ih cat loin Pathian hnenah thla a cam ringringtu a si.

³Voikhat cu zanlam nazi pathum tlukah langnak a hmu; cuih a hmuhmi ahcun Pathian ih vancungmi pakhat a hnenah a ra ih, “Kornelias!” tiah a ko.

⁴Cuih vancungmi cu ṭih phah in a zoh ih, “Ziang so a si, Bawipa?” tiah a sut. Vancungmi cun, “Pathian cu na thlacammi le mifarah na bomnak parah hin a lung a awi ih na dilnak a thei a si.

⁵Curuangah Joppa khua ah Simon Piter an timi pa ko dingin mi thlah aw.

⁶Simon Piter cu Tipi kapih a ummi savun in thil tuahtu Simon ih innah a caam,” tiah a ti.

⁷Cule vancungmi cu a feh; cuih hnuah Kornelias in a innih a ummi hnen-um pahnih le ralkap pakhat a ko. Ralkap pa cu biaknak lamah a taimazet le a felzetmi a si ih amah a kilvengtu lakah pakhat a si.

⁸Thil a cangmi pawl hmuahhmuah kha a sim ṭheh hnuah Joppa khua ah a thlah hai.

⁹A thaisun ahcun an feh vivo ih Joppa khua an thlen zik zawng sunlaifang hrawngah Piter cu thlacam dingin inn parah a hung kai.

¹⁰Piter cu a ril a rawng ih rawl ei a duh; rawl an tuah rero laiah langnak a hmu.

¹¹Van khi a ong aw ih puan hlaipi bangtuk a si mi thil pakhat a kil pali in leilung ah an run ṭhummi a hmu.

¹²A sungah ke li nei ramsa a phunphun, bokvak ramsa le vate a phunphun an um.

¹³Aw pakhat in a hnenah, “Piter, tho aw; that awla ei aw!” tiah a ti.

¹⁴Asinain Piter in, “Bawipa, a si lo! A thiang lomi le a borhhlawhmi ka ei dah hrimhrim lo,” tiah a ti.

¹⁵Aw cun a run sim sal ih, “Pathian in a thiang a timi cu a thiang lo-ah ruat hlah,” tiah a ti.

¹⁶Cumi cu voithum tiang a rung lang ih cuih hnuah cuih thil cu vanah lak kir a si.

¹⁷Cuih langnak ih a tican cu Piter in a ruah rero laifangah Kornelias ih thlahmi pawl cu Simon ih inn an thleng ih kotka lengah an ding.

¹⁸“hittawk ah Simon Piter timi mikhual a um maw?” tiah an vun auh.

¹⁹Piter cun a hmuhmi ih tican a ruah rero laifangah Thlarau in, “Ngaihnik, mi pathum in an lo hawl!

²⁰Na timtuah awla vung feh aw; cule an hnenih feh ding cu ṭhukṭhun in um hlah; keimah ih thlahmi an si,” tiah a ti.

²¹Curuangah Piter cu a vung ṭum ih a ra hawltu hnenah cun, “Nan hawlmi cu keimah ka si. Ziang so nan ṭul?” tiah a sut.

²²Annih in, “Ralbawi Kornelias in in thlah. Amah cu miṭhazet a si. Pathian a bia ih Judah mi pawl in an upat zetmi a si. Sim ding na neihmi kha thei seh tiah a inn ah nangmah lo sawm dingin Pathian ih vancungmi in a fial,” tiah an ti.

²³Piter in cuih zan cu a hnenih riak hrih dingin a sawm hai ih an riak. A thaisun ah Piter cu a tim a tuah ih anmah thawn a feh; Joppa khua ih Khrih zumtu hrekkhat pawl tla an tel ve.

²⁴A tipsun ah Sisaria ah a thleng ih Kornelias cun a sungkhat pawl le a sawmmi a rualpi pawl thawn an rak hngak ringring.

²⁵Piter cu inn ih a vung luh zawng ah Kornelias in a rak hmuak ih a hmaiah a kuun ih a kehram ah a bok.

²⁶Asinain Piter in a dinter ih, “Ding aw! Kei khal minung sokhaw ka si ve,” tiah a ti.

²⁷Inn sungih an luh phahah Piter in Kornelias cu a biak phah vivo; inn sungah cun mi tampi an tong-aw khawm.

²⁸Piter in an hnenah, “Kan biaknak daan vek a si ahcun Judah mi in Zentail mi leen ding le pawl ding cu khammi a si, ti cu nan thei ṭheh. Sikhalsehla zohman mi thiang lo le mi borhhlawh-ah ruah ding a si lo ti kha Pathian in i hmuh zo.

²⁹Curuangah mi nan thlah ih in ra kawh tikah kam khat hman el loin ka ra. Ziangah in ko ti atu-ah hin i sim hnik uh,” tiah a ti.

³⁰Kornelias in, “Kan dunglam ni thum laiah, tuih tikcu hrawng zanlam nazi pathum ah ka innah thla ka cam. Hmakhatte-ah hnipuan tleu zet hrukin mi pakhat ka hmaiah a ding ih,

³¹‘Kornelias, Pathian in na thlacamnak a thei ih mifarah na bomnak khal a hminsin ṭheh.

³²Joppa ah Simon Piter an timi pa ko dingin mi thlah aw. Joppa ahcun Tipi kapih a um mi savun in thil tuahtupa Simon ih inn ah a riak,’ tiah i ti.

³³Curuangah hmakhatte-ah ka lo ko; cule nangmah khal in i zaangfah ih na ra. Atu-ah hitawk ah hin Pathian hmaika-ah kan zatein kan um ih Bawipa in sim dingih a lo fialmi kha ngai dingah kan lo hngak a si,” tiah a ti.

³⁴Piter cun a thok ih, “Pathian cun zozo khal bangraan tein mi a zoh a si, ti thudik kha ka thei.

³⁵Ziangbangtuk miphun a si khalle Pathian a ṭihzah ih a hmaiah thildik a tuah a si ahcun Pathian ih pom tlak a si.

³⁶Mi hmuahhmuah ih Bawipa a si mi Jesuh Khrih hnenin daihnak Thuthang ṭha cu Pathian in Israel mi hnenah a pek, ti cu nan thei.

³⁷Johan in baptisma thuthang a sim hnu Galilee ihsin thokin Israel ramsung hmunzakip ah thil maksak a cangmi khal cu nan thei ṭheh.

³⁸Nazareth mi Jesuh parah ziang bangtuk in Pathian in Thlarau Thianghlim le huham a burh ti tla nan thei ṭheh. A hnenah Pathian a um ruangah hmunzakip ah feh tahrat in thil ṭha a tuah vivo ih Satan ih tuahsiatmi pawl hmuahhmuah a damter thluh.

³⁹Israel ram sungah le Jerusalem ih a tuahmi hmuahhmuah a hmutu le a theitu kanmah hi kan si. Cule amah cu thinglamtah parah an khen ih an that.

⁴⁰Sikhalsehla ni thumnak ni ah Pathian in thihnak ihsin a thoter sal ih kan hnenah a langter.

⁴¹Mi hmuahhmuah hnenah si loin a thu theitu dingih in hrilmi pawl hnenah a langter. Thihnak ihsin a thawhsal hnuah amah thawn kan ei kan in tlang a si.

⁴²Cule mi hnenah Thuthang ṭha sim dingah le amah cu Pathian in a nungmi le a thimi parah thuṭhentu ih a tuah kha simtu dingah in fial a si.

⁴³Profet hmuahhmuah in amah ih thu cu an sim ih amah a zumtu hmuahhmuah in a hmin thawngin an sualnak ngaidam a si ding, tiah an ti,” tiah a sim.

⁴⁴Cutiih Piter a ṭong rero laiah a thusimmi a ngaitu hmuahhmuah parah Thlarau Thianghlim a rung thleng.

⁴⁵Joppa ihsin Piter thawn a rami Jesuh zumtu Judah mi pawl cu Zentail mi hnen khalah Pathian in a laksawng Thlarau Thianghlim a burh ti kha an hmuh tikah an mang a bang ngaingai.

⁴⁶Ziangahtile cute pawl cu ṭong phun dang in an ṭong ih Pathian ih maksak zia an thangṭhat kha an theih ruangah a si. Piter in,

⁴⁷“Kanmah ih kan ngah zo vekin himi pawl khal in Thlarau Thianghlim an ngah ve a si. Curuangah tidai ih baptisma la ding kha zo in so a dawn thei ding?” tiah a ti.

⁴⁸Curuangah Jesuh Khrih hmin in baptisma lak dingah thu a pek. Cule an hnenih caam hrih dingin Piter cu an sawm.