Read Falam Chin TIRHTHLAH 11 Bible Online

TIRHTHLAH 11 - Falam Chin bible

TIRHTHLAH 11

¹Tirhthlah pawl le Judea ram sungih a ummi zumtu hmuahhmuah in Pathian ih thu cu Zentail mi pawl khal in an pom ngah zo, ti an thei.

²Piter cu Jerusalem ih a thlen tikah Zentail mi pawl serhtanter a duhtu pawl in an soisel ih,

³“Serhtan lo Zentail pawl innah na riak ih an hnenah rawl tiangin na ei,” an ti.

⁴Cuti a si ruangah Piter in thil a cangmi umtudan hmuahhmuah kha a hramthok ihsin a sim hai.

⁵“Joppa khua ih thla ka cam laiah langnak hmuhmi ka nei. Van ihsin kil li nei puan hlaipi bangtuk a si mi thil pakhat ka kiangte-ah an run ṭhum.

⁶A sung ṭhatein ka vun bih ih ramsa le innzuat ṭilva le a bokvak thiammi thilnung le hramlakih vate pawl ka hmu.

⁷Cule aw ka thei ih cuih aw cun, ‘Piter, tho aw, that awla ei aw,’ tiah i ti.

⁸Asinain kei in, ‘Bawipa, a si lo! Biaknak lamin a thiang lo timi le a borhhlawhmi rawl ka kaa sungah an lut dah kel lo,’ tiah ka ti.

⁹Cutikah van ihsin aw ka thei sal ih, ‘Pathian in a thiang, a ti ciami kha nang in a thiang lo tiah ruat hlah,’ tiah a ti.

¹⁰Cuti cun voithum tiang rori a cang ih neta bikah a zatein vanah an lak kir sal.

¹¹Cuti a si laiah Sisaria ihsin an rak thlahmi mi pathum kha ka riahnak inn ah an ra thleng.

¹²Cule zianghman nuarnak um lotein feh dingah Thlarau in i fial. Hi Joppa khua mi kan unau paruk, Jesuh zumtu pawl khal hin Sisaria ahcun in thlun ve ih kan zatein Kornelias ih inn ah kan va feh.

¹³Kornelias in vancungmi a rung ih a innih a dinnak thu kha in sim. Cuih vancungmi cun Kornelias hnenah, ‘Joppa ah mi thlah awla a hmin ngai Simon Piter an timi pa koter aw.

¹⁴Amah in thu a sim ding ih cuih a thusimmi thawngin nangmah le na innsang rundamnak nan ngah ding,’ tiah a ti.

¹⁵Cule thusim ka hun thawh ih a hramthok ih kan parih Thlarau Thianghlim a rung thlen vekin an parah Thlarau Thianghlim cu a thleng ve.

¹⁶Cutikah Bawipa in, ‘Johan cun tidai thawn baptisma a lo pek; asinain nannih cu Thlarau Thianghlim thawn baptisma pek nan si ding,’ tiah a rak timi ka vun mang sal.

¹⁷Pathian in Bawipa Jesuh Khrih kan zum ih kan hnenah Thlarau Thianghlim cu laksawngih in rak pek bangtuk in hi Zentail mi hnen khalah cuih laksawng cu a pek ve a si, ti cu a fiang zetmi a si. Ziangtin so kei taak ko hin Pathian cu ka kham thei ding!” tiah a ti.

¹⁸Cumi an theih tikah an soiselnak cu an baang ih Pathian thangṭhat in, “Pathian in Zentail mi hnen khalah sualsir awknak le nunnak caan a pek ve a si cu!” tiah an ti.

¹⁹Stefen an thah hnu hremnak a um ruangah Jesuh zumtu pawl ṭhenkhat cu khuazakip ah an ṭekdarh ṭheh. Mi tampi cu Fonisia, Saipras le Antiok[10] tiang an thleng ih Judah mi hnen lawngah Thuthang ṭha cu an sim.

²⁰Sikhalsehla zumtu ṭhenkhat cu Saipras le Sairin khua ihsin Antiok khua ah an feh ih Bawi Jesuh Khrih ih Thuthang ṭha cu Zentail mi hnen khalah an sim.

²¹Bawipa ih huham an hnenah a um ih mi tampi in an zum ih Bawipa ih lam an pan.

²²Cuih thuhla cu Jerusalem khua a thleng ih Jerusalem ih kawhhran in Antiok khua ah Barnabas an hun thlah.

²³Barnabas cu Antiok khua a thlen tikah Pathian in mipi hnenih thlawsuah a pekzia a hmuh tikah a lung a awi ngaingai ih an thinlung zatein Bawipa an zum ih rinsantlak zumtu an si theinak dingah thazaang a pek hai.

²⁴Barnabas cu miṭhazet a si ih Thlarau Thianghlim le zumfeknak thawn a khatmi a si. Cule mi tampi Bawipa ih hnenah a hruai.

²⁵Cule Barnabas cu Saul hawl dingah Tarsas[11] ah a feh.

²⁶Saul a hmuh tikah Antiok ah a fehpi ih kum khat sung an pahnih in kawhhran minung pawl kha an pumkhawmpi ih mi tampi an zirh. Hi Antiok khua ah hin a si dungthlun pawl cu “Khristian” tiin an kawh hmaisa bik.

²⁷Cuih caan hrawngah profet ṭhenkhat pawl cu Jerusalem ihsin Antiok ah an feh.

²⁸An lakih profet pakhat Agabas an timi pa a ding ih Thlarau huham thawn, “Leilung pumpuluk ah mangṭam a tlung ding a si,” tiah a sim. (Cuih mangṭam cu Klaudius in Rom siangpahrang a ṭuan laiah a thleng.)

²⁹Dungthluntu pawl cun an tithei tawk ciar in Judea ramih a ummi zumtu unau pawl bomnak pe dingah an tawlrel.

³⁰An tawlrel vekin an ngahmi tangka kha Barnabas le Saul kut in kawhhran upa hnenah an kuat.