Read Falam Chin TIRHTHLAH 12 Bible Online

TIRHTHLAH 12 - Falam Chin bible

TIRHTHLAH 12

¹Hi caan hrawngah Siangpahrang Herod[12] in kawhhran sungih Khristian ṭhenkhat pawl hrem a thok.

²Johan unau Jeim kha ralnam hmang-in a thahter ih,

³cumi cun Judah mi pawl an lung a awiter ti a hmuh tikah Piter khal a kaihter. (Himi cu Thilnu tello Sang Puai tuah laifangah a si.)

⁴Piter cu an kai ih thawngah an thlak; thawnginn kiltu ralkap bur li an um ih bur khatah ralkap pali fingfing an um; cu pawl ih kil dingin an kut sungah an pek. Lantak puai ṭheh tikah zapi hmaiah a thu cu rel dingin Herod ih tumtahmi a si.

⁵Cuti cun Piter cu thawng sungah an ret, asinain a hrangah kawhhran pawl in Pathian hnenah napi in thla an camsak.

⁶Herod in a thaisun mipi hmaiah Piter ih thu ka rel ding a ti ni zanah Piter cu thawnginn kiltu ralkap pahnih karlakah a it. Thir cikcin pahnih in an khih ih thawnginn kotka khal an kil ṭheh.

⁷Rinlopi-ah Bawipa ih vancungmi a rung ding ih an ihnak khaan cu tleunak in a run tleuter. Vancungmi in Piter cu a liang in a hnin ih, “Zamrang in tho aw!” tiah a ṭhang. Hmakhatte-ah Piter ih kut ihsin thir cikcin cu an poihtla.

⁸Cule vancungmi in, “Na taikhap khap awla na kedam dam aw,” tiah a ti. A tivek cun Piter in a tuah ih vancungmi in, “Na puan sin awla i thlun aw,” tiah a ti.

⁹Piter cun a thlun ih thawnginn lengah an suak; vancungmi in cuti ih a tuah cu thungai a si dingah a ruat lo; langnak ka hmu a si ding, tiah a ruat aw.

¹⁰Ralkap ih an kilnak kotka pakhatnak cu an lan, cule a pahnihnak tla an lan thotho. A netnak ah khawpi sung thawn a peh-awmi thir kotka an thleng. Cuih kotka cu an hrangah amahte in a ong aw ih an pahnih in an suak. Lamzin an vun zawh ih rinlopi ah vancungmi cun a hlohsan ih Piter lawng a taang.

¹¹Cutikah a parih a cangmi thil pawl cu fiangtein a hun thei ngah ih, “Atu cu a cangmi ngaingai a si ka thei zo! Herod thuneihnak sungin le Judah mi pawl in ka parih cang dingin saduh an thahmi hmuahhmuah sung ihsin runsuak dingah Bawipa in a vancungmi a run thlah a si hi!” tiah a ti.

¹²Thil a cangmi a theih ngah hnuah Johan Marka ih nu Mari ih inn ah a feh; cutawkah mi tampi an khawm aw ih thla an cam rero.

¹³Piter cun a leng ihsin sangka a vun king ih Roda timi hnen-um nu cu sangka ong dingin a ra.

¹⁴Piter ih aw a si ti a theih tikah a lung a awi tuk ih sangka hman ong loin, “Inn lengah Piter a ding a si!” tiah a au.

¹⁵Annih in, “Na aa maw si?” tiah an ti. Sikhalsehla, a si ngaingai sokhaw, a ti ringring ruangah, “A vancungmi a si pei cu!” an ti thotho.

¹⁶Piter in sangka cu cat loin a king rero. A net-ah sangka cu an ong ih Piter a si kha an hmuh tikah an mang a bang ngaingai.

¹⁷Piter cun daiteih um dingin a zaa a zaap ih, Bawipa in thawng sung ihsin a suahnak thuhla kha an hnenah a sim. “Hi thu hi Jeim[13] le a dang zumtu pawl sim uh,” tiah a ti ih a suak ih hmun dangah a feh.

¹⁸Zinglam khua a van tikah thawnginn kiltu ralkap pawl cu, Piter ziang a cang a si pei, tiah an buai nasa.

¹⁹Piter hawl dingah Herod in thu a pek; asinain an hmu lo. Curuangah thawnginn kiltu pawl cu an thu a zingzoiter ih that dingin thu a pek. Cuih hnuah Judea ram ihsin Herod cu a suak ih Sisaria khua ah caan tawkfang a hmang.

²⁰Herod cu Tai-ar le Sidon mi pawl parah a thin a heng ngaingai; curuangah cuih khuami pawl cu Herod tong dingah a bur in an feh. A hmaisabik ah siangpahrang innih hotu bik Blastas kha an hnenih ṭang dingin an sawm. Cule Herod hnenah cun an va feh ih daihnak le remnak tuah dingin an va dil. Ziangah cutiin an dil tile an rammi pawl ih rawl an ngahmi cu Herod siangpahrang ukmi ram sung ihsin a rat ruangah a si.

²¹An ni tinh ni ah Herod cu a siangpahrang thilthuam in a thuam aw ih a tokham ah a to ih mipi hnenah thu a sim.

²²Cutikah mipi in, “Hitiih a ṭongtu hi milai a si ual lo, pathian a sisi!” tiah an au.

²³Hmakhatte-ah Bawipa ih vancungmi in Herod cu natsiava in a natter, ziangahtile Pathian kha upatnak a pek lo ruangah a si. Herod cu a rulkhuk in a sunglam an ei thluh ih a thi.

²⁴Pathian ih thu cu a zai ih a ṭhang vivo.

²⁵Barnabas le Saul cu an hnaṭuan dingmi an ṭuan ṭheh ruangah Jerusalem ihsin Johan Marka an hruai ih an kir.