Read Falam Chin TIRHTHLAH 14 Bible Online

TIRHTHLAH 14 - Falam Chin bible

TIRHTHLAH 14

¹Cubangtuk thotho in Ikoniam khua khalah Paul le Barnabas cu sinakok ah an va feh ih nasa zetin thu an sim. Judah mi le Zentail mi tampi zumtu-ah an cang.

²Asinain a zum duh lotu Judah mi pawl in Zentail mi pawl kha an tokhrok ih zumtu pawl kha an dodalter.

³Tirhthlah pahnih cu cutawkah reipi an um ih ralṭha zetin Bawipa ih thu an sim rero. Bawipa ih zaangfahnak thu an simmi a dik a si, ti langternak ah Bawipa in hmuhsaknak mak le khawruahhar thil tuah theinak huham a pek hai.

⁴Khawsung mi pawl cu an ṭhen aw ṭheh. Mihrek in Judah mi an ṭan ih mihrek in tirhthlah pawl an ṭan.

⁵Cule Zentail mi ṭhenkhat le Judah mi ṭhenkhat in an hotu pawl thawn tirhthlah pawl tuahsiat ding le lungto in deng dingah thu an relcat.

⁶Cumi cu tirhthlah pawl in an theih tikah Likaonia ram sungih Listra khua, Derbe khua le a kiangkap ram pawl ah an tlan.

⁷Cutawkah Thuthang ṭha cu an sim.

⁸Listra khua ah mizeng pakhat, suahkeh ke-awl ih voikhat hman a feh thei dah lo pa a um.

⁹Paul thusimnak ahcun a to ih a thusim cu a ngai. Paul in a thusimmi kha cupa in a zum ih damnak a ngah thei ti a hmuh tikah hmaitontein a zoh ih,

¹⁰ringzet in, “Tho awla dingtein hung ding aw!” tiah a ti. Cupa cu a hung khir ih a feh thei!

¹¹Cutiih Paul ih a tuahmi cu mipi in an hmuh tikah anmah Likaonia ṭong in, “Khawzing pawl minung bangtuk ah an cang ih kan hnenah an rung a si hi!” tiah an au ciamco.

¹²Barnabas kha an khawzing Zeus hmin an pek ih Paul cu a ṭong biktu a si ruangah an khawzing Hermes hmin an pek.

¹³An khuahnar ah an khawzing Zeus ih biakinn a um; cutawkih puithiam in cawcang pawl le pangpar pawl kotka ah a run keng, ziangahtile amah le mipi pawl in tirhthlah pawl hnenah raithawinak pek an duh ruangah a si.

¹⁴Cutiih tuah an tummi cu Barnabas le Paul in an theih tikah an hnipuan an thlek ih mipi lakah au phah in an tlan vivo.

¹⁵“Hitiin ziangah so nan tuah tum? Kannih hi nanmah bangtuk milai kan si ve! A ṭhahnem lomi thil nan tuahnak ihsin lei le van le tipithuanthum le a sungih ummi hmuahhmuah a tuahtu Pathian nung hnenih nan kirnak dingah Thuthang ṭha sim dingin kan ra a si.

¹⁶Hlanlaiah cun Pathian in zozo khal an duhmi lamzin thlun dingin a on.

¹⁷Sikhalsehla thilṭha a tuahmi in amah a um ti kha a langter ringring a si: van ihsin ruah a surter ih a tikcu caan ah thlaici kho a umter; tirawl a lo pek ih nan thinlung hnangam in a tuah a si,” tiah an ti.

¹⁸Cutiin an sim hnu hmanah raithawinak tuah lo dingah tirhthlah pawl in misenpi cu har zetin an kham thei ceu.

¹⁹Judah mi ṭhenkhat Pisidia ram Antiok khua in le Ikoniam khua ihsin an ra ih miburpi kha anmah lam ṭang dingin an sawm ngah hnuah Paul cu lungto in an deng; a thi zo tiah an ruat ih hnarpawn ah an hnuk ih an taan.

²⁰Sikhalsehla dungthluntu pawl a kiangah ding in an tonkhawm awk tikah a tho ih khawsungah a feh sal. A thaisun ah Barnabas thawn Derbe khua ah an feh.

²¹Paul le Barnabas in Thuthang ṭha cu Derbe khua ah an sim ih dungthluntu tampi an ngah. Cuih hnuah Listra khua, Ikoniam khua le Pisidia peng Antiok khua ah an kir.

²²Zumtu pawl kha tha an pek phah vivo ih zumnak sungah rintlak zetin um dingin an forh vivo. “Pathian Uknak sung lut ding kan si ahcun harsatnak tampi kan ton ding hrimhrim a si,” tiah an zirh vivo.

²³Kawhhran umnak poh ah kawhhran upa an ret vivo ih thlacam le rawl-ul in an rinsanmi an Bawipa hnenah hlannak an tuahta vivo.

²⁴Pisidia ram an lan ṭheh hnuah Pamfilia ram an thleng.

²⁵Thuthang ṭha Perga khua ah an sim ih cuih hnuah Attalia khua ah an vung feh.

²⁶Cutawk ihsin lawng in Antiok[16] khua ah an kir. Antiok khua cu atu-ih an ṭhehmi an hnaṭuan ṭuan dingah Pathian hnenih an rak pek awknak khua kha a si.

²⁷Antiok khua an thlen tikah kawhhran senpi pawl an kokhawm ih Pathian in anmah a hmanzia le Zentail mi pawl Pathian thu zum dingih lamzin a on sakzia pawl an sim.

²⁸Cutawkah zumtu pawl thawn reipi an um tlang.