Read Falam Chin TIRHTHLAH 15 Bible Online

TIRHTHLAH 15 - Falam Chin bible

TIRHTHLAH 15

¹Mi ṭhenkhat Judea ram ihsin Antiok khua ah an ra ih, “Moses Daan ih in fial bangtuk in serh nan tan lo ahcun rundamnak nan ngah thei lo ding,” tiah zumtu unau pawl an zirh ciamco.

²Cuih thu cu Paul le Barnabas in nasa zetin an el; cule a netnak ah hi thu-ah hin tirhthlah pawl le kawhhran upa pawl thawn Jerusalem ih vung tong aw dingin Paul le Barnabas le Antiok khua ih upa dang pawl an fial.

³An feh zawng ah kawhhran pawl in an thlah. Cule Fawnisia le Samaria ram an pal phah ih cutawkah Zentail mi pawl ziang bangtuk in Pathian lamah an lung an thleng zo ti kha an theihter phah vivo. Cuih thu an theih tikah zumtu pawl cu an lung a awi ngaingai.

⁴Jerusalem an thlen tikah kawhhran le tirhthlah pawl le kawhhran upa pawl in an rak hmuak ih a rak hmuaktu pawl hnenah cun Pathian ih hnaṭuannak kha kimtein an sim.

⁵Sikhalsehla Farasi pawl sungih a telmi zumtu hrekkhat pawl cun, “Zentail mi pawl cu serh an tan hrimhrim a ṭul ih Moses Daan thlun dingin kan sim a ṭul a si,” tiah an ti.

⁶Curuangah tirhthlah pawl le kawhhran upa pawl cu cuih thu ruat dingah an tong aw khawm.

⁷Caan reipi an el awk hnuah Piter a ding ih, “Ka u le ka nau tla, nan theih zo vekin kei hi nanmah lak ihsin Zentail mi pawl in Thuthang ṭha an theih ih an zum thei venak dingah Thuthang ṭha an hnenih sim dingah Pathian in i hrilnak a rei zo.

⁸Cule mi hmuahhmuah ih ruahnak a thei ṭhehtu Pathian in Zentail mi pawl khal a pom a si; cuih a pomnak cu kan hnenih Thlarau Thianghlim in pek vekin an hnen khalah Thlarau Thianghlim a peknak in a langter zo.

⁹Pathian in anmah le kanmah karlakah thleidannak zianghman a nei lo; an zum ruangah an sualnak khal a ngaidam a si.

¹⁰Cuti a si ruangah ziangah so kan pu le kan pa pawl in siseh, kanmah khal in siseh kan phurh thei lomi thilrit cu zumtu pawl ih zaang parah suang tahratin Pathian cu hniksak nan duh?

¹¹Asilo! Kannih hi anmah vek thotho in zumnak kan nei ih Bawipa Jesuh ih zaangfah thinpemnak thawngin rundamnak kan ngah a si,” tiah a ti.

¹²Paul le Barnabas khal in Pathian in anmah hmangin Zentail mi lakah hmuhsaknak mak le khawruahhar a phunphun a tuahmi hmuahhmuah kha an sim tikah an zatein dai khepkhep in an ngai.

¹³An sim ṭheh tikah Jeim a ding ih, “Ka u le ka nau tla, i ngaihnik uh!

¹⁴Simon in atute ih a ṭong zomi cu nan thei. Zentail mi pawl khal Pathian in an zawn a ruat ih anmah lak ihsin minung hrekkhat cu Amah ih ta si dingah a hril a si, tiah a simfiang zo.

¹⁵Profet pawl khal in hivek thothoin an rak sim zo. Ca Thianghlim in:

¹⁶‘Bawipa in, himi hnuah, Ka ra kir sal ding ih A tlu zomi David ih uknak cu ka tung sal ding. A siatbal mi cu ka sak ding ih ka cakter sal ding.

¹⁷Cuti cun leilung tlun miphun hmuahhmuah ka hnenah an ra ding; Ka hril ciami Zentail mi hmuahhmuah khal an ra ding.

¹⁸Khuahlan lai ihsin hi thu a theitertu Bawipa in a ti,’ tiah a ti.

¹⁹Curuangah kei ka ruahnak ahcun: Pathian a pantu Zentail mi pawl hi hnaihnawhnak pe hlah uhsi.

²⁰Cuhnakin an hnenah milem biaknak rawl thiang lo ei lo dingin le nupa sualnak tuah lo dingin le hngawngrek-ih thahmi sa le sathi pohpoh ei lo dingin ca kuat sawn uhsi.

²¹Ziangahtile Sabbath tinte in sinakok ah Moses Daan cu kum reipi sung siar a si zo ih Pathian thu khal khawkip ah sim a si zo,” tiah a ti.

²²Cule tirhthlah pawl, kawhhran upa pawl le kawhhran zate in anmah sung ihsin mi ṭhenkhat hril tahratin Paul le Barnabas thawn Antiok khua ih thlah dingah an rel. Anmah lakah zumtu pawl in an upat zetmi pahnih, Barsabbas ti khal in an kawhmi Judas le Silas an hril ih,

²³a tanglamih ca kuat hi an kut ah an pek: “Nan unau a si mi kannih tirhthlah pawl le kawhhran upa pawl in Antiok le Siria le Silisia ih a ummi Zentail unau pawl nan zate hnenah cibai kan lo buk.

²⁴Hitawkih kan pawl sung ihsin nan hnen a ra thlengmi ṭhenkhat in an ṭongkam in harsatnak an lo pek ih an lo buaiter ti kan thei. Hitiih an ra ṭong tikah kannih ih kan fialmi an si lo.

²⁵Curuangah kan tong-aw khawm ih kanmah sung ihsin hrilmi palai nan hnenah kan hun thlah.

²⁶Kan Bawipa Jesuh Khrih hnaṭuannak hrangah nunnak tiangin a pe ngamtu kan duhdawtmi Paul le Barnabas thawn an hung ding.

²⁷Cuti cun Judas le Silas nan hnenah kan hun thlah ih anmah in hi ca sungih kan nganmi hi an lo sim ding.

²⁸Thlarau Thianghlim le kannih lungkim tlangnak kan nei ih hi a tanglam ih a ṭulmi daan pawl siarlo a dang thilrit nan parih ret ding kan duh lo:

²⁹Milem biaknak rawl nan ei lo pei; sathi nan ei lo pei; hngawngrek-ih thahmi sa nan ei lo pei; cule nupa sualnak nan tuah lo pei. Himi pawl tuah loin nan hrial thei a si ahcun a ṭha thluh ding. Damte in um hram uh,” tiah an ngan.

³⁰An thlahmi an palai pawl cu an feh ih Antiok an thleng. Cutawkih zumtu pawl hmuahhmuah cu an ko khawm ih an kenmi cakuat cu an pek.

³¹Cumi an siar tikah mipi thapeknak ca a si ruangah an lung a awi ngaingai.

³²Judas le Silas anmah khal cu profet an si ih mipi hnenah ralṭhatnak le thacahnak thu reipi an sim.

³³Cutawkih tawkfang an um hnuah zumtu pawl in hnangamte in an thlah ih anmah a hun thlahtu kawhhran hnenah an kir sal.

³⁴(Sikhalsehla Silas cu cunah a taangta.)[17]

³⁵Paul le Barnabas cu tawkfang sung Antiok ah an um ih midang tampi thawn Pathian thu an zirh ih an sim.

³⁶Malte a rei deuh hnuah Paul in, “Bawipa ih thu kan rak simnak ah khan feh sal uhsila khawkip ih unau pawl kan va tlawng sal pei ih an umtlandan kan va zoh sal pei,” tiah Barnabas cu a ti.

³⁷Barnabas in Johan Marka kha an hnenah fehter a duh.

³⁸Asinain Paul in Johan Marka hruai ding cu a ṭha tiin a ruat lo, ziangahtile Johan Marka cun an khualtlawnnak a net tiang thlun loin Pamfilia ihsin a kirsan hai ruangah a si.

³⁹Cuih thu-ah cun Paul le Barnabas cu napi-in an el aw ih an ṭhen aw. Barnabas in Marka cu a hruai ih Saipras ah lawng in an feh.

⁴⁰Paul in Silas a hruai ih zumtu pawl in Bawipa ih zaangfahnak thawn va feh hram uhlaw tiah an thlahta.

⁴¹Paul le Silas cu Siria ram le Silisia ram sung an pal phah ih kawhhran pawl kha tha an pek phah vivo.