Read Falam Chin TIRHTHLAH 16 Bible Online

TIRHTHLAH 16 - Falam Chin bible

TIRHTHLAH 16

¹Paul cu Derbe khua le Listra khua a va thleng; cutawkah dungthlun a si mi Timote a um. A nu cu Judah mi a si ih Khristian a si ve, a pa cu Grik mi a si.

²Listra khua le Ikoniam khua ih a ummi zumtu pawl in Timote cu an porhzet.

³Paul in Timote cu hruai a duh ruangah a serh a tanter. Ziangahtile cutawk khawsungih a ummi Judah mi pawl in Timote ih pa cu Grik mi a si ti kha an theih ṭheh ruangah a si.

⁴Khua pakhat hnu pakhat an thleng vivo ih Jerusalem khua ih tirhthlah pawl le kawhhran upa pawl in an relcatmi daan pawl kha zumtu pawl hnenah an sim vivo ih thlun ding khalah an forh.

⁵Curuangah kawhhran pawl cu zumnak lamah an cak deuhdeuh ih ni khat hnu ni khat minung an tam sinsin.

⁶Asia ram sungih Thuthang ṭha sim dingah Thlarau Thianghlim in a on lo ruangah Frizia le Kalatia ram sungah khual an tlawng.

⁷Misia ramri an thleng ih Bithinia ramsung luh an tum, asinain Jesuh ih Thlarau in a on lo.

⁸Curuangah Misia ram cu an lan ih Troas khua ah an feh.

⁹Cuih zanah Paul in langnak a hmu ih cuih a hmuhmi ahcun Masidonia mi pakhat ding tahratin, “Masidonia ah ra awla in ra bawm aw,” tiah zaangfah a dil.

¹⁰Paul ih langnak a hmuh ṭheh vete in Masidonia ih feh dingah kan tim kan tuah,[18] ziangahtile cutawk mi pawl hnenih Thuthang ṭha sim dingah Pathian in in ko a si tiah kan zum.

¹¹Troas ihsin lawng in kan feh ih Samothrace ah dingtein kan feh; cule a thaisun ah Neapolis kan thleng.

¹²Cutawk ihsin leilung in Filipi khua kan thleng. Filipi khua cu Masidonia ram sungih peng pakhatnak ih khawpi a si. Rom ih ukmi khua a si fawn. Cutawkah ni tampi kan caam.

¹³Sabbath ni ah khawpi ihsin tivakap ah kan feh; cutawkah Judah mi pawl hmun khatih thlacamnak hmun a um ding tiah kan ruat. Kan to ih cutawkih a rami nunau pawl thawn, thu kan ruah aw.

¹⁴An lakih pakhat, kan thu a ngaitu cu Thiatira khuami Lydia a si ih amah cu puan sendup zuartu a si. Amah cu Pathian a biatu a si ih Paul thusimmi kha ṭhateih ngai dingah Bawipa in Lydia ih thinlung sangka a on.

¹⁵Amah le a innsungsang pawl baptisma an lak ṭheh hnuah, Lydia in, “Bawipa a zum taktak tiih in ruat asile ka inn ah ra caam ve hram uh!” tiah in sawm. Cutiin in sawm suak ih kan va feh.

¹⁶Ni khatah thlacamnak hmunih kan feh laiah, khawsia polhmi hmailam thu a simsung theitu sal nunau pakhat in in rak hmuak. Hmailam thu a simsungnak in a bawi pawl hrangah tangka tampi a ngah.

¹⁷Paul le kanmah cu in thlun vivo ih, “Himi pawl hi Cungnungbik Pathian ih sal an si! Rundamnak thu nan hnenah an phuang a si!” tiah a au vivo.

¹⁸Cuti cun ni tampi sung a tuah ih a netnak ah Paul cu a thin-ai a thok ih a dunglet hoi tahratin a khawsia hnenah cun, “Hi nu sung ihsin suak dingah Jesuh ih hmin in thu ka lo pek!” tiah a ti. Hmakhatteah a khawsia cu a suak.

¹⁹Amah a neitu pawl in tangka an ngah theinak lamzin a um nawn lo ti kha an theih tikah Paul le Silas cu an kaih ih thuneitu bawi pawl hnenah miburpi tonkhawmnak hmunah an dirh.

²⁰Rom Acozah bawi thuṭhentu pawl hmaiah an hruai ih, “Himi pawl hi Judah mi phun an si ih kan khawsungah buainak an suahter.

²¹Kan daan thawn a kaih-aw lomi daan an zirh; kannih cu Rom Acozah minung kan si ih hi an zirhmi daan hi kan pom thei lo, a thlun khal kan thlun lo,” tiah an ti.

²²Cule misenpi pawl khal Paul le Silas a huatu ah an tel ve. Cuih hnuah Acozah bawi thuṭhentu pawl in Paul le Silas ih hnipuan cu an dirhthleksak ih vuak dingah thu an pek.

²³Besiazet ih an vuak hnuah thawng sungah an khum ih thawnginn uktu pa cu ṭhateih tawh hren dingin thu an pek.

²⁴Cuih thupekmi a ngah vekin thawnginn uktu pa in Paul le Silas cu thawnginn sungta khaan sungah a vun khum ih a rit zetmi thingtum pahnih in hreng a sut.

²⁵Zanṭim hrawngah Paul le Silas cu thla an cam ih Pathian thangṭhatnak hla an sak; cule thawngtla dang pawl in an rak ngai.

²⁶Rinlopi-ah nasa zetin ling a hnin ih thawnginn cu a tawhram tiangin a hnin ṭheh. Hmakhatte-ah sangka pawl an ong aw ṭheh ih thawngtla pawl hmuahhmuah ih kut khihnak thir cikcin cu an phoih aw ṭheh.

²⁷Thawnginn uktu cu a ṭhang ih thawnginn sangka pawl a ong ṭheh ti a hmuh tikah thawngtla pawl an tlan thluh zo tiin a ruat ih, a ralnam zuuk tahratin amah le amah thah awk a tum.

²⁸Sikhalsehla Paul cu a aw neih patawp in a au ih, “Nangmah le nangmah tuahmawh aw hlah! Kan zatein kan um thluh ko,” tiah a ti.

²⁹Thawnginn kiltu pa cun meisa rak keng uh, a ti ih thawnginn sungah zamrangin a lut ih khur phah rero in Paul le Silas kehram ah a bok.

³⁰Cule lengah a hruai hai ih, “Ka bawipale pawl, rundamnak ngah dingah ziangso ka tuah ding?” tiah a sut.

³¹Annih in, “Bawi Jesuh zum awla nangmah le nan sungte in rundamnak nan ngah ding,” tiah an ti.

³²Cule Pathian thu cu amah le a innsang zate hnenah an sim.

³³Cuih zan rori-ah cun thawnginn uktu pa in a fehpi hai ih an hmaa pawl cu a buah sak; cule cuvete in amah le a innsang zatein baptisma an lak.

³⁴Cun Paul le Silas cu a inn ah a hruai ih rawl ei ding a pek. Amah le a innsang zatein Pathian an zum ngah ruangah lungawinak in an khat.

³⁵A thaizing ah Rom Acozah bawi thuṭhentu pawl in palik bawi pawl an hei thlah ih, “Kha pawl kha thlah hai uh,” tiah thu an pek.

³⁶Curuangah thawnginn uktu pa in Paul cu, “Thuṭhentu bawi pawl in nangmah le Silas thlah dingin thu an rak pe. Curuangah suak uhla, daitein feh uh,” tiah a ti.

³⁷Sikhalsehla Paul in palik bawi pawl hnenah cun, “Sualnak zianghman kan nei lo naón mizapi hmai rori-ah in thawi; Rom Acozah minung kan si ve! Cuih tlunah thawngah in thlak. Cule atu-ah a thupte in fehter in tum maw si? Feh naisai hlah! Rom Acozah bawi pawl anmah rori hinah ra hai sehla in ra suah hai seh!” tiah a ti.

³⁸Cutiih a timi cu palik bawi pawl in Rom Acozah bawi thuṭhentu pawl hnenah an va sim; cule Paul le Silas cu Rom mi an si ti an theih tikah an thin a phang!

³⁹Curuangah Paul le Silas hnenah cun an va feh ih ngaithiamnak an va dil; cule thawnginn ihsin an suah ih khawsung ihsin hmun dangah feh uh, tiin an dil.

⁴⁰Paul le Silas cu thawnginn ihsin an suak ih Lydia ih inn ah an feh. Cutawkah zumtu unau pawl an tong ih thazaang peknak thu an sim hnuah cuih khua ihsin an suak.