Read Falam Chin TIRHTHLAH 17 Bible Online

TIRHTHLAH 17 - Falam Chin bible

TIRHTHLAH 17

¹Paul le Silas cu Amfipolis le Appollonia an tlawng ih Thesalonika khua an thleng. Cutawkah Judah mi pawl ih sinakok a um.

²Amah ih tuah keel vekin Paul cu Sinakok ah a feh. Cutawkah Sabbath ni ni thum sung rori mipi thawn thu an el aw ih,

³Messiah cu thihnak a tuar ding ih a thosal ding a si ti kha Ca Thianghlim sung ihsin a langter ih a simfiang vivo. “Nan hnenih ka phuanmi Jesuh hi Messiah cu a si,” tiah Paul in a ti.

⁴Mi ṭhenkhat cu an thinlung a fiang ngah ih Paul le Silas kha an kom. Cuvekin nunau hotu pawl le Pathian a biatu Grik mi tampi a burpi in Paul le Silas hnenah an kom ve.

⁵Sikhalsehla Judah mi pawl in an nahsiik ih lamzin ih a vak lakmi mi hlothlau ṭhenkhat pawl kha an khawm ih miburpi ah an cang. Khawsungah an au an kio ih nasa zetin buainak an suahpi. Jason an timi pa ih inn an va kulh ih cutawkah Paul le Silas kha kai ih mipi hmai ah hnuk an tum.

⁶Sikhalsehla cutawk inn ah Paul le Silas cu an hmu lo ih Jason le zumtu ṭhenkhat pawl sawn kha khawsung upa hmaiah an hruai ih, “Hmunzakipah buainak a suahtertu pawl, atu-ah kan khawsung an ra thleng ih,

⁷Jason in a inn sungah a umter hai. An ṭongmi cu ‘Jesuh timi siangpahrang dang pakhat a um,’ an tiih cuti cun Rom siangpahrang ih daan an buar a si,” tiah an au ciamco.

⁸Cutiih an aunak ruangah miburpi le khawsung upa pawl cu an buaiter ṭheh.

⁹Thuneitu pawl in Jason le a rualpi pawl cu anmah thlah dingih a ṭul zat tangka an lak ih cuih hnuah an thlah sal.

¹⁰Khua a thim vete in zumtu pawl in Paul le Silas cu Berea khua ah an thlah. Berea khua an thlen tikah sinakok ah an feh.

¹¹Cutawkih mipi pawl cu Thesalonika mi pawl hnakin an thinlung a tluangtlam deuh. An thusimmi pawl cu an thinlung taktein an ngai ih, nitinte in Paul ih simmi cu a si ngaingai maw, si ngaingai lo tiah Ca Thianghlim an siar ih an zohṭhim.

¹²Mi tampi in an zum; upat tlak Grik nunau pawl le Grik mipa pawl khal in an zum ve.

¹³Asinain Thesalonika ih ummi Judah mi pawl in Berea khua khalah Paul in Pathian thu a sim ti an theih tikah Berea khua ahcun an ra ih mipi kha an tokhrok ih an buaiter ciamco.

¹⁴Hmakhatte-ah zumtu pawl in Paul cu tifinriat lamah an tlanter; asinain Silas le Timote cu Berea ah an taangta.

¹⁵Paul a thlahtu zumtu pawl in Paul cu Athens khua tiang an thlun; cule a thluntu pawl cu an kir ih Silas le Timote in a zamrang thei tawkih amah hei dawi dingah Paul in thu a cah hai.

¹⁶Paul in Silas le Timote kha Athens khua ihsin a hngak laiah cuih khawpi cu milem zuk in a khat ti kha a hmu ih a thin a nau ngaingai.

¹⁷Curuangah Judah mi pawl le Pathian a biatu Grik mi pawl thawn an pumkhawmnak inn sinakok ah thu an el aw ṭheu; mizapi ton awknak hmun khalah a rami pawl thawn an el aw ringring.

¹⁸Epikurian thuzirhtu saya ṭhenkhat le Stoik thuzirhtu saya hrekkhat pawl thawn khal thu an el aw. Mi hrekkhat in, “Zianghman thei sii lo, hi pa hin mi hmaiah lang duh zetin ziangso rel a tum rero?” tiah an ti. Mihrek in, “Ramdang pathian pawl ih thuhla a sim a bang,” an ti. Ziangah cutin an ti tile Paul in Jesuh le a thawhsalnak thu a sim ruangah a si.

¹⁹Curuangah Paul cu Areopagas an timi an khua ih khonsil hnenah an suahpi ih, “Thuthar na zirhmi hi ziangso a si, ti kan thei duh.

²⁰A hrekkhat na simmi kan theihmi cu a lamdang zet ih a tican ziang a si ti kan thei duh,” tiah an ti.

²¹(Ziangah cutin an ti tile Athens khua mi hmuahhmuah le hi khua ih a ummi ramdang mi tla cu thu thar le thil thar kha an tikcu zate hmangin theih rero le sim rero a duh bikmi pawl an si.)

²²Paul cu an khua khonsil Areopagas timi upa hmaiah cun a ding ih an hnenah, “Nannih Athens mi pawl hi biaknak lam pohpoh ahcun nan taimazet ti ka hmu.

²³Ziangahtile nan khawpi sungih ka toihvah tikah Pathian nan biaknak hmun pawl tla ka zoh ih biakṭheng pakhat parah ‘Kan Theih Lomi Pathian Hnenah,’ tiih nan nganmi ka hmu. Cutiin nan thei lo na-cingih nan biakmi Pathian cu atu nan hnenih ka phuanmi hi a si.

²⁴Leilung le a sungih a ummi hmuahhmuah a tuahtu Pathian cu lei le vanih Bawi a si ih milai kutih sakmi biakinn sungah a um lo.

²⁵Cuih tlunah Pathian cu mi hmuahhmuah hnenah nunnak le thaw le thildang hmuahhmuah a petu Pathian a si ruangah milai in a hrangih kan tuahmi kha a ṭulmi zianghman a um lo.

²⁶Minung pakhat sung ihsin leilung miphun hmuahhmuah a tuah ih leilung pumpuluk ah a umter ṭheh. A hlankhan in ziangtik caanah an um ding ih khuitawk hmun tiang an um thei ding, ti kha a relcia ṭheh.

²⁷Ziangah hiti in a tawlrel cia tile Pathian an hawl ih an hmuh suak theinak dingah a si. Sikhalsehla a ngaingai ti-ah cun Pathian cu zo thawn hman a hlat lo.

²⁸Mi pakhat ih a rak sim cia vekin, ‘Amah ih sungah kan nung, kan tlangleng ih khua kan sa!’ tiah nan hla phuahtu ṭhenkhat pawl ih an tivek in, ‘Kannih khal hi a faate kan si ve.’

²⁹Cutiih Pathian ih faate kan si ruangah thilthiam pawl le zuk suaithiam pawl in sui milem le ngun milem le lungto milem an tuahmi hi Pathian ah kan ruah ding a si hrimhrim lo.

³⁰Minung in Pathian thei lo bembem ih an rak um caan kha cu Amah Pathian in hmu lo vekin a um san meen; sikhalsehla atu-ah cun an nuncan ṭha lomi ihsin sualsir dingah mi hmuahhmuah kha a fial a si.

³¹Ziangahtile a hril ciami mi pakhat in leilung pumpuluk hi dingnak thawn thuṭhen cat dingah ni a tin zo. Cuih thu cu thudik a si, ti kha mi hmuahhmuah hnenah langternak ah cupa cu thihnak ihsin a thoter sal zo,” tiah a ti.

³²Mithi thawhsalnak thu Paul ih a simmi an theih tikah mi hrek in an hnihsan; asinain midang in, “In sim sal hrih cila kan duh,” tiah an ti.

³³Cuih hnuah Paul cu an khawmnak ihsin a feh.

³⁴Mi hrekkhat in an thlun ih an zum. A zumtu lakah cun Khonsil upa Dionisias tla a tel. Damaris an timi nunau pakhat le midang ṭhenkhat khal an tel.