Read Falam Chin TIRHTHLAH 2 Bible Online

TIRHTHLAH 2 - Falam Chin bible

TIRHTHLAH 2

¹Pentikos ni a thlen tikah zumtu hmuahhmuah cu hmun khatah an um.

²Hmakhatte-ah van ihsin thlipi hrang bangin thawmvang a rung ih an tonak khaan cu a khat ṭheh.

³Cule lei bangtuk a si mi meisa hliau an rungsuak zohzo ih cuih khaan sung ummi hmuahhmuah cuih meisa hliau cun a run dai fingfing.

⁴An zatein Thlarau Thianghlim in an khat ih Thlarau in ṭong theinak a pek vekin ṭong dangdang in an ṭong ciamco.

⁵Jerusalem khua sungah leilung tlun khuazakip ihsin a rami Judah mi an um laifang a si ih biaknak lam khalah a zuam ngaingaimi pawl an si.[2]

⁶Cuih ṭong dangdang ih an ṭongnak thawmvang an theih tikah miburpi an ra khawm aw. Zumtu pawl ih ṭongmi cu a rami pawl in anmah ih ṭong ciarin an theih tikah an mang a bangzet.

⁷Mangbang le khawruahhar in, “Hitiih a ṭong reromi pawl hi Galilee mi an si ko lo maw?

⁸Ziangtin so kanmah ih ṭong cio ih ṭong in kan theih thei?

⁹Kannih cu Parthia ram, Media ram, Elam ram, Mesopotamia ram, Judea ram, Kappadosia ram, Pontas ram, Asia ram,

¹⁰Frizia ram, Pamfilia ram, Izipt ram le Libia ramsung Sairin khua kiang tla in a rami kan si. Mihrek cu Rom khua in a rami kan si ih,

¹¹Judah mi le Zentail mi Judah biaknak ih a lutmi pawl kan si. Mihrek cu Krete tikulh le Arabia ram in kan ra. Asinain Pathian in a huham thawn thil mak zetzet a tuahmi thu anmah ih ṭong ih an simmi kha kanmah ih ṭong ciarin kan thei a si,” tiah an ti.

¹²Mangbang le awloksong in, “Himi hi a tican ziang a si pei?” tiah pakhat le pakhat an sut aw rero.

¹³Asinain midang cun zumtu pawl cu an hnihsan ih, “Hi pawl hi zu an ri a si hi!” tiah an ti.

¹⁴Cule Piter cu a dang tirhthlah hleikhat hnenah a ding ih aw ring zetin misenpi hnenah thu a sim: “Ka phunpi Judah mi le Jerusalem ih a ummi pawl, nan zatein in ngai uhla, hi thil ih a tican ka lo sim hai ding.

¹⁵Nan ruah bangtuk a si lo; hipawl hi zu an ri lo; zinglam nazi pakua lawng a si lai.

¹⁶Ziang so a si ti ahcun profet Joel ih a rak sim ciami a kimnak sawn a si. Profet Joel ih sim ciami cu:

¹⁷‘Pathian in, ni netnak lamah cun hiti in ka tuah ding; Mi hmuahhmuah parah ka Thlarau ka burh ding; Nan fapa pawl le nan fanu pawl in ka thu an phuang ding; Nan tlangval pawl in langnak an hmu ding; Nan patar pawl in mang an man ding;

¹⁸Asi, ka salnu le ka salpa pawl tlun khalah cuih ni ahcun Ka Thlarau ka burh ding ih, ka thu an sim ding.

¹⁹Tlunlam vanah hmuhsaknak mak ka tuah ding ih, Hnuailam leilung par khalah khawruahhar ka tuah ding. Thisen le meisa le meikhu sahzet a um ding.

²⁰Ni a thim ding ih, thlapi khi thisen bangin a sen ding; Bawipa ih Ni - ni maksak le ni sunglawi a thlenhlan deuh ah,

²¹Bawipa hnenah bomnak dil in a autu cu rundam an si ding,’ a ti.

²²“Ka phunpi Israel mi pawl, hi thu ka simmi hi ngaihnik uh! Nazareth mi Jesuh cu minung asinain Pathian ih thuneihnak a nei a si, ti cu amah hnenin Pathian in a huham thawn thil khawruahhar le hmuhsaknak mak zetzet a tuahmi pawl ihsin a langter zo. Himi cu nanmah rori ih nan theihmi a si, ziangahtile nan lakih a cangmi thil an si.

²³Pathian amah ih khawkhannak vekin nan kut sungah Jesuh pek ding kha a rak ruahcat ciami a si. Misual pawl ih forhfialnakin Jesuh cu thinglamtah ah nan khenbet ih nan that.

²⁴Sikhalsehla Pathian in thihnak ihsin a thoter sal ih thihnak huham sung ihsin a luatter zo, ziangahtile amah cu thihnak ih kaitar theihmi a si lo.

²⁵David in amah ih thuhla cu hiti in a sim: ‘Bawipa cu ka mithmai ah ka hmu ringring; Ka kiangah a um ih ka phang lo ding.

²⁶Curuangah ka lung a awi ih, ka ṭongkam cu nomnak in a khat. Curuangah kei hi a thi theimi milai ka si naón, ruahsannak sungah hnangam zetin ka cawl ding.

²⁷Ziangahtile mithi khua-ah cun i taanta lo ding ih, rintlak na salpa hi thlankhur sungah ziamralta dingah cun i siang lo ding.

²⁸Nunnak thlen theitu lamzin cu i hmuh zo ih i umpi ruangah lungawinak in ka khat ding,’ a ti.

²⁹“Ka u le ka nau pawl, mi hminthang kan pu Siangpahrang David ih thu cu nan hnenah fiangtein ka sim duh. David cu a thi ih an phum; a thlaan tla tuihsun tiang kan lakah a um.

³⁰Amah cu profet a si ih Pathian ih a kam ciami thu a thei; David bangtuk in David ih tesinfa pakhatkhat kha siangpahrang si dingah Pathian in thu a kam.

³¹Pathian in hmailam caanah ziang a tuah ding ti cu David in a hmu cia; curuangah Messiah a thawhsalnak ding thu cu hiti in a sim: ‘Mithi khua ah amah cu a taanta lo ding ih, a taksa ruangpi cu thlaan sungah a ziamta lo ding,’ tiah a ti.

³²Pathian in hi Jesuh rori hi thihnak ihsin a thoter sal ih cumi theihpitu cu kanmah hi kan si.

³³Pathian a Pa ih vorhlam kapah sunglawi zetin thlenter a si zo ih a kam cia bangtuk in Thlarau Thianghlim cu a Pa hnen ihsin a ngah zo. Atuih nan hmuhmi le nan theihmi cu kan parih a burhmi amah ih laksawng a si.

³⁴Ziangahtile vancungih a thlengtu cu David a si lo; David amah in: ‘Bawipa in ka Bawipa hnenah, na ral pawl na ke hnuai ah,

³⁵Na kepal-ih ka canter hlantiang Ka vorhlam kapah hin to aw, a ti,’ tiah a ti.

³⁶“Israel mi pawl, thinglamtah parih nan thahmi Jesuh hi Pathian in Bawipa le Messiah ah a tuah zo a si, tihi fiangtein nan theih ṭheh dingah a ṭul hrimhrim a si,” tiah a ti.

³⁷Cuih thu an theih tikah an thinlung a khoih zetih Piter le a dang tirhthlah pawl cu, “U le nau pawl, ziangso kan tuah ding?” tiah an sut.

³⁸Piter in an hnenah, “Nan zatein nan sual sir fingfing uhla Jesuh Khrih hmin in baptisma lak uh; cuticun nan sualnak ngaidam nan si ding ih Pathian laksawng Thlarau Thianghlim nan ngah ding.

³⁹Ziangahtile Pathian thukamnak cu nanmah le nan faate pawl hnenah le Pathian thawn a hlat awmi an si naón Bawipa kan Pathian in a kawhmi pawl hmuahhmuah hnenah a si,” tiah a ti.

⁴⁰Piter in thu tampi a zirh ih a forh hai. “Hi miṭha lo parih a thleng dingmi hremnak ihsin luat dingah zuam aw uh,” tiah a ti.

⁴¹Piter ih simmi cu mi tampi in an zum ih baptisma an lak; cuih ni ni khatah an pawl cu mi thawngthum tlukin an karh.

⁴²An zatein tirhthlah pawl hnen ihsin an zir ih, tirawl eitlangnak le thlacam tlangnak thawn pawlkomnak an nei ringring.

⁴³Tirhthlah pawl in khawruahharza le hmuhsaknak mak zetzet thil tampi an tuah ruangah mi hmuahhmuah ih thinlung sungah ṭihnak le hmaizahnak in a khat.

⁴⁴Zumtu pawl hmuahhmuah cu an pawlkom aw ih thurual zetin an thil neihmi tla an ṭawm aw.

⁴⁵An thilri neihmi le an hlawnthil pawl tla an zuar ih an ngahmi tangka cu an ṭulnak vekin an zem aw.

⁴⁶Ni khat hnu ni khat Biakinn sungah an tongkhawm aw; an inn ah rawl an ṭawm aw ih tangdornak le lungawi thanuam in an ei tlang.

⁴⁷Pathian an thangṭhat ih mi hmuahhmuah hnenin mithmai ṭha an ngah. Cule nitinte in Bawipa in an pawlah rundamnak ngahtu a bet vivo.