Read Falam Chin TIRHTHLAH 20 Bible Online

TIRHTHLAH 20 - Falam Chin bible

TIRHTHLAH 20

¹Cuih thubuai cu a dai ih Paul in a zumtu pawl cu hmun khatah a kokhawm ih thapeknak ṭongkam in a forh hnuah cibai a bukta hai ih Masidonia ramah a feh.

²Cuih ram cu a tlawng vivo ih thapeknak thu a sim vivo. Cule Akhaia[22] a thleng ih,

³cutawkah thla thum a caam. Siria ah feh a tum naón, a tim a tuah rero laiah Judah mi pawl ih an zuar tum thu a theih ruangah Masidonia lam in feh sal a tum.

⁴Berea khuami Pirhas ih fapa Sopater le Thesalonika khuami Aristarkas le Sekundas, Derbe khuami Kaias, Asia ram in Taikhikas le Trofimas, le Timote tla in Paul cu an fehpi.

⁵An rak feh sungih Troas ihsin in rak hngak.

⁶Thilnu tello Sang Puai a cem hnuah Filipi ihsin lawng in kan feh ih ni nga hnuah Troas ah kan man hai. Troas ahcun zarh khat kan caam.

⁷Zarhte ni zanlam ah pawlkomnak zanriah hil tlang dingin kan tongkhawm aw. A ra khawmmi hnenah Paul in thu a sim ih a thaizing feh ding a si ruangah zanṭim tiang thu a sim.

⁸Tlunta khaan ah kan khawm aw ih mei-inn tampi an vang.

⁹Tlangval pakhat Zutikhas an timi cu saangkate ah a to ih Paul in reipi thu a sim tikah cun a ih a rak hmu deuhdeuh ih a netnak ahcun a ihthat ngah ruangah cuih inn dot thumnak ihsin leilung ah a tla. An vung sar tikah a rak thi zo.

¹⁰Sikhalsehla Paul a vung ṭum ih cuih tlangvalpa cu a bawhhnawh ih a pom. Paul in, “Nan thinphang hlah uh, a nunglai a si,” tiah a ti.

¹¹Cule Paul cu tlunta khaanah cun a hung kai sal ih sang kha a phel ih an ei. Paul cu reipi, zinglam nisuak tiang thu a sim hnuah a feh.

¹²Cuih tlangvalpa cu a nungin a inn ah an fehpi ih an hna a ngam zet.

¹³Lawng parah kan va feh ih cuih lawng in Assos ah kan feh; Assos ahcun Paul sawm phah ding kan si. Cutiih sawm phah ding cu in sim ciami a si, ziangahtile lei lamzin in anih cu a rak feh.

¹⁴Assos ah Paul cu kan tong ih kan lawng parah kan toter ih Mitilene ah kan feh.

¹⁵Mitilene ihsin kan suak ih a thaisun ah Khios zawn kan thleng. A tipsun ah Samos kan thleng ih a thiamsun ah Miletas kan thleng.

¹⁶Paul cun Asia ramih caam rei ding cu a duh lo ruangah Efesa lansan mai a tum. A cang thei a si ahcun Pentikos ni kheel in Jerusalem ih thlen lohli a duh.

¹⁷Paul in Miletas ihsin mi a thlah ih Efesa khua kawhhran upa pawl in amah rak tong dingin thu a cah.

¹⁸An rat tikah Paul cun, “Asia ram ka ra thlen ih a ni khatnak ni ihsin ka tikcu hmuahhmuah cu nan hnenah ziangvekin ka hmang ti cu nan thei ṭheh ko.

¹⁹Tangdornak le mitthli thawn Bawipa ka rian ih Judah mi pawl ih in phiarnak khal har fualfo-in ka tuar.

²⁰Zapi hmaiah siseh, nan innsung khalah siseh, thusimnak caan ka neih tikah nan hrangih bawmtu a si ding hmuahhmuah in zianghman suup loin ka sim ti khal nan thei.

²¹Judah mi hnenah siseh, Zentail mi hnenah siseh, an sualnak tlansan in Pathian hnenah an kir ih kan Bawi Jesuh an zum a ṭul hrimhrim tiah ka sim tlunah feltein ralrinnak khal ka pek hai a si.

²²Cule atu-ah Thlarau Thianghlim ih hruainak thlunin Jerusalem ah feh ka tum; cutawkah ziang ka cang ding ti zianghman ka thei lo.

²³Khawkip ah thawngtlak le harsatnak lawnglawng in in hngak a si ti lawng kha Thlarau Thianghlim ih ralrin peknak thawngin ka thei.

²⁴Sikhalsehla ka hrangah ka nunnak hi zianghman ah ka siar lo; Bawipa Jesuh in ṭuan dingih i pekmi Pathian ih zaangfahnak Thuthang ṭha phuan ding ṭuanvo hi famkim zetih ṭuan thluh thei ding lawng hi ka saduhthah a si.

²⁵Nan zate hnenah a suk a so ah ka vak ih, Pathian ih Uknak thu ka lo sim. Asinain atu cu zohman in in hmu sal nawn lo ding, tihi ka thei.

²⁶Curuangah tuihsun ah hin fiangtein nan hnenah ka phuang: nanmah lakah pakhatkhat nan hloral asile kei in mawhthluk hlah uh.

²⁷Ziangahtile Pathian ih tumtahmi kha suupmi zianghman nei loin a zatein nan hnenah ka phuang ṭheh a si.

²⁸Cuti a si ruangah nanmah le nanmah kilkhawi awk thiam uhla Thlarau Thianghlim in tuurual kilkhawitu dingih a lo ret vekin nan tuurual kha ṭhatein kilkhawi uh. Pathian in a Fapa thisen thawn Amaió ta ih a tuah zomi a kawhhran khaaltu va si uh!

²⁹Kei ka feh hnuah ṭihnungza cinghnia hraang an ra ding ih tuuruun pawl hi an zoh meen lo ding, ti ka thei.

³⁰Nanmah ih sung ihsi hin mihrek cun anmah lamih hruai duh ah thuphanper tahratin zumtu pawl hi an hruaisualnak tikcu caan a ra thleng ding.

³¹Curuangah ralring uhla sun tilo zan tilo in mitthli thawn kum thum sung nan zatein ka lo zirhmi kha hngilh hlah uh.

³²Atu cu Pathian kilkhawinak le a zaangfahnak thu sungah ka lo ap zo. Amah in a lo ṭhansoter ding ih a minung pawl hrangih a ret ciami thlawsuahnak kha a lo pek ding.

³³Zo ih tangka, sui le hnipuan khal ka daw dah lo.

³⁴Ka kut rori hin hna ka ṭuan ih keimah le ka rualpi pawl ih kan ṭulmi thil tla kha ka suahpi ve ti cu nan thei ṭhehmi a si ko.

³⁵Ziang hmuahhmuah ah napi in ṭuan tahratin santlai lomi pawl kan bawm ding a si ti kha ka lo hmuh zo; Bawipa Jesuh khal in, ‘Ngah lam hnakin pek lamah lungawinak a tam sawn,’ a timi ṭongkam kha ciing ringring uh,” tiah thu a cah.

³⁶Paul in cutiin a sim ṭheh tikah a khuk a bil ih an zatein thla an cam tlang.

³⁷Paul cu an pom an hnam ih damte in vung feh aw, ti phahin an zatein an ṭap ciamco.

³⁸Zohman in in hmu sal nawn lo ding, a ti ruangah an riah a siat cuangnak a si. Cule lawng umnak tiang an hei thlah.