Read Falam Chin TIRHTHLAH 22 Bible Online

TIRHTHLAH 22 - Falam Chin bible

TIRHTHLAH 22

¹Paul cun, “U le nau, nu le pa pawl, nan hmaiah hin ka ṭannak thu ka sim ve tikah hin i ngaihnik uh!” a ti.

²Hebru ṭong ih a ṭong ruangah mipi cu an dai ṭhepṭhep. Cule Paul cun a hun peh sal ih:

³“Keimah cu Silisia peng Tarsas khua suak Judah mi ka si. Asinain Jerusalem khua ah a ṭhanglian mi ka si ih Gamaliel ih zirhmi ka si. Kan pupa pawl ih daan felzet le fekzet ih zirhmi ka rak si. Tuihsun hitawk ih a rami nanmah vekin Pathian hnenah pum petu ka rak si ve.

⁴Bawipa ih Lamzin thluntu pawl hi thi ko in ka rak hrem hai. Nunau tilo, mipa tilo in ka kai ih thawngah ka thlak.

⁵Puithiam Saang le Khonsil upa pawl cu thudik ka simmi hi a theitu an si. Cuih upa pawl hnen ihsin Damaskas khua ih Judah unau pawl hnen pek ding ca ka keng ih Bawipa ih Lamzin thluntu pawl hi kai tahratih thir cikcin thawn khit in Jerusalem khua ih rak hruai dingin le hrem dingin Damaskas khua ah ka rak feh a si.

⁶“Cutiin ka feh ih Damaskas ka thlen zikah, sunlai hrawngah van ihsin a tleuzetmi tleunak in ka kimvel kha hmakhatte ah i run tlet.

⁷Leilung ah ka tlu ih aw pakhat in, ‘Saul, Saul, ziangah so i hrem?’ tiah i ti kha ka thei.

⁸‘Bawipa, zoso na si?’ tiah ka hun sut. Anih in, ‘Na hremmi Nazareth mi Jesuh ka si,’ tiah i ti.

⁹Ka hawipi pawl in tleunak cu an hmu naón i biatu-ih aw cu an thei lo.

¹⁰‘Ziang so ka tuah ding, Bawipa?’ tiah ka sut. Bawipa in, ‘Tho awla Damaskas khawsungah va feh awla na tuah dingah Bawipa in a tumtah ciami hmuahhmuah kha an lo sim ding,’ tiah a ti.

¹¹A tleu tuk ruangah ka mit a caw ih ka rualpi pawl in ka kutin Damaskas khawsungah in hruai.

¹²Cuih khawpi ah Ananias cu daan thluntu saakhua-mi le cutawk ih um Judah mi hmuahhmuah ih upatmi a si.

¹³Ananias cu ka hnenah a ra ih ka kiangah ding tahratin, ‘Unau pa Saul, khua hmu sal aw,’ tiah a ti. Cuvete in khua ka hmu sal ih amah cu ka hun zoh.

¹⁴Amah in, ‘Kan pu le kan pa pawl ih Pathian in amah ih duhnak a theitu dingah le Miding pa hmutu dingah le amah ih aw rori a theitu dingah a lo hril zo a si.

¹⁵Ziangahtile na hmuhmi le na theihmi hi mi hmuahhmuah hnenih simtu dingah Amah ih thutheitu na si ding.

¹⁶Cuti a si ruangah reipi hngak nawn hlah! Tho awla amah ih hmin ko phah in baptisma lak awla na sualnak thiangfaiter aw,” tiah i ti.

¹⁷“Cuih hnuah Jerusalem ah ka kirsal ih Biakinn sungih thla ka cam laiah langnak ka hmu.

¹⁸Cuih langnak ahcun Bawipa ka hmu ih ka hnenah, ‘Tho awla zamrangte in Jerusalem ihsin suak aw, ziangahtile hi khuami pawl in ka thuhla na phuanmi hi an pom lo ding,’ tiah a ti.

¹⁹Kei in, ‘Bawipa, sinakok ah ka feh ih nangmah a lo zumtu pawl kha kai in ka vuak rero ṭheu kha an theih ṭhehmi a si.

²⁰Cule na thutheitu Stefen an thah tikah keimah rori ka um ih an thah kha ka lungkimpi tlunah a thattu pawl ih puan pawl a rak kensaktu ka si,’ tiah ka ti.

²¹Bawipa cun, ‘Feh ko aw; lam hlapi Zentail mi pawl hnenah ka lo thlah ding,’ i ti,” tiah Paul in a sim.

²²Cumi a sim tiang cu mipi pawl in ṭhatein an ngai. Asinain cuih hnu cun an aw neih patawp in, “Kha pa kha hloral seh! That uh! Nung ding a tlak lo!” tiah an au ciamco.

²³An zatein an au, an kio, an hnipuan an zaap ih leivut kha vanah an khirh ciamco.

²⁴Rom ralbawipa in a ralkap pawl kha Paul hi ṭankulh sungah fehpi uhla ziang ruangah mipi pawl in hitlukin an hua ih an au hnawh ti theihnak dingah fung in vuak uh, tiah thu a pek.

²⁵Sikhalsehla fung in vuak dingih an ṭem ṭheh tikah Paul in cutawkih a dingmi bawi pakhat hnenah, “A sual thu ṭhen hrih lo Rom mi pakhat hi vuak daan a si pei maw?” tiah a sut.

²⁶Cuih thu a theih tikah cuih bawi cu ralbawipa hnenah a feh ih, “Ziang so na tuah? Khi pa khi Rom ih minung sokhaw a si!” tiah a ti.

²⁷Curuangah Paul hnenah a va feh ih, “Rom mi na si maw? I sim hnik?” tiah ralbawipa cun a sut. “Ka si,” tiah Paul in a ti.

²⁸Ralbawipa in, “Kei khal tangka tampi ka pek hnuah ka si ve,” tiah a ti. Paul cun, “Kei cu ka suahkeh ihsin Rom mi ka si,” tiah a sawn.

²⁹Cuvete in Paul thusuh a tumtu pawl cu dungah an siip ṭheh. Ralbawipa khal cu Paul kha Rom mi a si ti a theih tlunah Rom mi thir cikcin thawn a khih kha a theih sal tikah a thin a phangzet.

³⁰Ralbawipa cun Judah mi pawl in Paul parih sual an puhmi hi ziang bik so a si, ti theihfiang a duh ruangah a thaisun ah Paul ih thir cikcin cu a phoihter ih Puithiam upa pawl le Khonsil upa an zatein tongkhawm aw dingah thu a pek. Cule Paul cu a hruai ih an hmaiah a dinter.