Read Falam Chin TIRHTHLAH 24 Bible Online

TIRHTHLAH 24 - Falam Chin bible

TIRHTHLAH 24

¹Ni nga hnuah Puithiam Saang Ananias cu upa ṭhenkhat le sih-ni Tertullas thawn Sisaria ah an feh. Mangki Bawipa Felix hmaiah an suak ih Paul taza an cuainak cu an sim.

²Cule Paul cu an ko ih sih-ni Tertullas cun Paul sual an puhnak thu cu hiti in a sim: “Mangki Bawipa, fimnak thawn nangmah in in hruai ruangah caan reipi daihnak kan ngah ih kan ram ṭhatnak hrangah rem ṭulmi pawl tampi rem a si zo.

³Himi kan hmuh tikah na tuahmi pawl hi khuazakipah mi in an pom ih na parah kan lung a awi ngaingai.

⁴Na tikcu tamtuk ka lo laksak pang ding ti ka phan ruangah kan sim duhmi kha a tawi thei sungin kan hun sim pei ih zaangfahte in in ngaisak hram aw.

⁵Himi pa hi mi buaiter theizet le ṭihnungza a si tiin kan hmu. Leilung tlun hmun kipih Judah mi pawl a buaiter ringring ih Nazareth bu an timi pawl sungah hruaitu amah hi a si.

⁶Kan Biakinn borhhlawhter a tum ih culai ah kan kai. (Cule kan daan vekin a thu rel kan tum;

⁷asinain ralbawipa Lisias a ra ih hranhram in in ra long.

⁸Cuih hnuah Lisias in Paul tazacuai a duhtu pawl cu na hnenah hin feh hai seh, tiah thu a pek.)[25] Nangmah in hi pa hi thu na sut ahcun amah ih hnen ihsin sual kan puhmi pawl hi nangmah rori in na thei ko ding,” tiah a ti.

⁹Cutiih a simmi cu Judah mi pawl in an bawm ih a simmi hi a zatein a dik ṭheh a si an ti.

¹⁰Mangki Bawipa in Paul cu thu sim dingah a kut in a zaap ih Paul in Mangki Bawipa hnen ah: “Nangmah cu hi ram sungah hin kum reipi thureltu a ṭuantu na si ti ka thei ih atu-ah na hmaiah ka ṭanhmun sim dingin caan ka neih ruangah ka lung a awizet.

¹¹Jerusalem ah Pathian bia dingin ka hung fehnak hi ni hleihnih hnakin a tam hrih lo, ti cu na thei ko ding.

¹²Biakinn sungah zo thawn hman thu kan el aw lo, ti cu Judah mi in an thei ṭheh. Sinakok ah siseh, khawpi sung hmun dangdang khalah siseh, misenpi ka tokhroknak an hmu hrimhrim lo ding.

¹³Cule atu-ah na hmaiih sual in puhmi pawl hi a dik taktak a si tiah an lo hmuh thei fawn lo ding.

¹⁴Ka tuah taktak tiin na hmaiah ka ti duhmi cu hihi a si: Kan pupa pawl ih Pathian ka biaknak ah hin Lamzin kan timi ka thlun; annih in cuih Lamzin cu a dik lo an ti. Sikhalsehla Moses Daan sungih nganmi hmuahhmuah le profet pawl ih nganmi cabu sung ummi hmuahhmuah khal ka zummi an si ṭheh.

¹⁵Anmah vek thothoin keimah khal Pathian hnenah ruahsannak ka nei ve. Cuih ruahsannak cu, mi hmuahhmuah in, miṭha khal misia khal, thihnak ihsin an tho sal ding, timi a si.

¹⁶Cuti cun Pathian hmai le minung hmaiah phuhrun awknak nei lo dingin ka zuam thei tawk ka zuam ringring.

¹⁷“Kum reipi sung Jerusalem khua ka thlen nawn lo ruangah ka miphun pawl bomnak ah tangka pe ding le thawinak pe dingin Jerusalem ah ka hung feh.

¹⁸A daan vekin thianfainak ka tuah ṭheh hnuah a tlunih ka simmi pawl ka tuah rero laiah Biakinn sungah in hmu. Culai ah ka hnenah miburpi an um lo; buainak khal a um lo.

¹⁹Asinain cutawkah cun Asia ram ihsin a rami Judah mi hrekkhat an um. Cupawl cu ka parah lungkimlonak an neih a si ahcun na hmai rori-ah hin anmah ra in mawhthluknak cu ra sim ve ding an si.

²⁰Asilole hitawk ih a um pawl hin Khonsil upa pawl hmaiih ka din laiah ka sual tiih an hmuhmi lo sim hai seh.

²¹An hmaiih ka din laiah thil pakhat lawng ka aupi mi a um: ‘Mithi pawl cu nunnak ah an tho sal ding,’ tiin ka zum ruangah tuihsun ah hin thu in khiing a si,” tiah a sim.

²²Cule Felix cu cuih Lamzin thuhla ṭha zetih a theitu a si ruangah an thu rel cu a cawlter ih, “Ralbawipa Lisias a ra thlen tikah nan thu cu ka rel leh ding,” tiah a ti.

²³Paul a kiltu ralbawi cu, “Paul hi ṭhatein kilveng uhla, malte in luatter deuh uhla a ṭul a haimi pawl cu a rualpi pawl in pe hai seh,” tiah a ti.

²⁴Ni malte a rei hnuah Felix cu a nupi Drusilla thawn an ra. Drusilla cu Judah mi a si. Paul kha a ko ih Paul in Jesuh Khrih zumnak thuhla kha a sim ih cumi cu an ngai.

²⁵Sikhalsehla Paul in ṭhatnak thu, mah le mah suup awknak thu le a ra thleng dingmi Thuṭhennak Ni thu pawl a sim tikah Felix cu a thin a phang ih, “Tu cu va kir hrih aw. Tikcu ka neih tikah ka lo ko sal leh ding,” tiah a ti.

²⁶Felix cun Paul in tangka i pe sehla tiah ruahsannak a nei. Curuangah Paul cu a ko leuhleuh ih thu a ruahpi ṭheu.

²⁷Kum hnih a rei hnuah Mangki Felix cu Porsius Festas in a hnaṭuan a thleng. Judah mi pawl hnen ihsin mithmai ṭha ngah a duh ruangah Felix in Paul cu suah loin thawng sungah a taanta.