Read Falam Chin TIRHTHLAH 27 Bible Online

TIRHTHLAH 27 - Falam Chin bible

TIRHTHLAH 27

¹Italy ah lawng ih feh dingin thu relcat a si tikah Paul le thawngtla dang pawl cu Rom ralkap “Siangpahrang Ralkap Burpi,” timi a hotu ralbawi Julius kutah an pek.

²Asia ram tangphawlawng colhnak hmun pawl a pal phah vivo ding mi Adramittium khua ihsin a rami tangphawlawng to in kan feh. Masidonia ram Thesalonika khuami Aristarkas khal kan hnenah a tel ve.

³A thaisun ah Sidon kan thleng. Julius cu Paul parah zaangfahnak thinlung a nei ih Paul cu a ṭulmi thilri pawl a ngah theinak dingah a rualpi pawl va leen le va ton theinak tikcu tla a pek.

⁴Cutawk ihsin kan feh ih thli kanmah lam lawnglawngih a hran ruangah Saipras tikulh thli-upnak lam in kan feh.

⁵Tifinriat kha Silisia le Pamfilia zawn ihsin kan tan ih Lisia ram Mira khua kan thleng.

⁶Cutawkah ralbawipa cun Alexandria ihsin Italy ih a feh dingmi tangphawlawng a hmu ih cuih tangphawlawng ahcun in fehter.

⁷Nuamtete in kan feh ih ni tampi kan rei hnuah a netnak ah harzet in Snidas khua zawn kan thleng. Cutawklam zawh in feh ding thli in in kham ruangah Krete tikulh leilung phen thli-upnak lam ihsin kan feh ih Salmon ram-forhlei kiang ihsin kan lan.

⁸Tifinriat kap naih in kan feh vivo ih harzet in Himnak Longcolh Hmun an timi kan thleng. Cumi cu La sia khua ihsin a hlat lo.

⁹Cutawkah cun reipi kan cawl ih Sualtlennak Ni[27] a luan zo ih tangphawlawng in khualtlawn cu ṭihnung a si thlang. Curuangah Paul in hiti in an hnenah ruahnak a pek:

¹⁰“U le nau pawl, hi tawk ihsin kan lamzin cu ṭihnungza a si ding. Nan phurhmi thilri le tangphawlawng hi siatralnak a tong ding ih kan nunnak khal a cemral ding a si,” tiah a ti.

¹¹Sikhalsehla Paul ih simmi hnakin tangphawlawng neitupa ih simmi sawn kha ralbawipa ih thinlung sungah a lut.

¹²Cuih an tangphawlawng colhnak cu thlatang tikcu ahcun umnak a ṭhat lo ruangah mi tam sawn cun a cang thei a si ahcun Finiks thleng feh lawlaw ih cutawkih thlatang sung um kha an duh. Finiks cu Krete tikulh ih tangphawlawng colhnak a si ih thlanglam nitlaknak lam le saklam nitlaknak lam hoi in a um.

¹³Thlanglam ihsin simthli neemte a hung hrang ih an tumtah vekih feh thei dingin an ruat. Curuangah tangphawlawng hrennak thirkawn kha ti sungin an hnuk ih Krete tikap naih vivo in kan feh.

¹⁴Asinain rei lote-ah, “Nisuah Saklam Zothlipi,” cak zetin Krete lam ihsin a rung hrang.

¹⁵Kan tangphawlawng cu a run deen ih cuih thli cu kan pah thei nawn lo ruangah beidong in kan um ih kan tangphawlawng cu thli in a duhnak poh ah a fehpi vivo.

¹⁶Kauda tikulh ih thlanglam kan thlen tikah cun thli in phen deuh ruangah a zia a um deuh. Cutawkah cun harsa zetin tangphawlawng ih a kenmi vokkuanglawng cu rem deuhin kan ret.

¹⁷Tangphawlawng parah vokkuanglawng cu an vun hnuk ih hri in tangphawlawng ahcun fektein an ṭemcih. Libia ram tikap kiangih ti sungih vunnel tlangtluan pah ding an phan ruangah tangphawlawng cu a puanzar an ṭhum ih thli in a duhduhnak ah a so ih.

¹⁸Thlipi a hrang thotho ih a thaisun ahcun tangphawlawng ih phurhmi thilri hrekkhat cu ti sungah an hlon.

¹⁹A tipsun ah tangphawlawng ih thilthuam hrekkhat an hlon.

²⁰Ni tampi sung, ni le arsi pawl kan hmu thei lo; thli cu nasa zetin a hrang ringring. A netnak ahcun kan nung ding ti ruahsannak malte hman kan nei nawn lo.

²¹Tangphawlawng parih mi pawl cu rawl loin ni tampi an um hnuah an hmaiah Paul a ding ih, “Unau pawl, ka thusimmi in ngai uhcila Krete tikulh ihsin feh loin um nungla hi bangtuk cemnak le ralnak hi kan tong lo ding.

²²Sikhalsehla atu-ah nan thinphang hlah uh, tiah ka lo sim. Tangphawlawng hi cu kan sung ding naón kanmah cu kan hloral lo ding.

²³Ziangahtile mizanah i neitu le ka biakmi Pathian ih vancungmi ka hnenah a rung ih,

²⁴‘Paul, ṭih hlah aw! Rom siangpahrang ih hmaiah na din a ṭul a si! Pathian na parih a ṭhat ruangah nangmah thawn a fehmi pawl hi pakhat hman thi lotein an nunnak a zuah ṭheh ding,’ tiah i ti.

²⁵Curuangah unau pawl, phang hlah uh! Ziangahtile Pathian ka rinsan ih i sim cia vek cekci in a si ko ding.

²⁶Asinain tikulh pakhatkhatah thli in in soih ding,” tiah a ti.

²⁷Zan hleilinak a si zo, Mediterranean Tifinriat ahcun thlipi in in hrual ciamco. Zanṭim hrawngah tangphawlawng kiltu pawl in leilung kan naih thlang hmang tiah an zum deuh.

²⁸Curuangah hri in thirtum an khih ih an vun thlak ih tidai cu pi zakhat le pi kul a thuuk. Malte hnuah an thlak sal ih pi sawmkua a si.

²⁹Tangphawlawng in lungpi a sawh pang ding ti an phan ruangah a dunglam ihsin a hrennak thirkawn pali an thlak ih thlacam phahin khuavan ding an hngak.

³⁰Cule lawng hnaṭuan pawl cu tlan an tum; vokkuanglawng kha ti sungah an vun ṭhum ih a hmailam ihsin a hrennak thirkawn ṭhenkhat thla ding vekin an um awter.

³¹Sikhalsehla ralbawipa le ralkap pawl hnenah cun Paul in, “Tangphawlawng kiltu pawl tangphawlawng parih an um lo asile nan nun ding ruahsannak zianghman a um lo,” tiah a ti.

³²Curuangah vokkuanglawng a kaitu hri pawl cu ralkap pawl in an satcat ih vokkuanglawng cu an fen hloter.

³³Khua a van deuh hlanah Paul in rawl ei dingin a fial hai: “Ni hleili sung lungphangin nan um zo ih hi sung hmuahhmuah ah zianghman nan ei lo.

³⁴Zaangfah ka lo dil: rawl malte tal ei thlang uh. Nan nunnak dingah a ṭul a si. Nan lu parih samphang pakhat hman a hloral lo ding,” tiah a ti.

³⁵Cutiih a ti hnuah Paul in saang malte a lak ih an zate hmaiah Pathian hnenah thlacam in saang cu a phel ih a ei.

³⁶Midang khal an thinlung a hung cak deuh ih rawl malte an ei fingfing.

³⁷Tangphawlawng parih a ummi cu kan zatein zahnih le sawmsarih le paruk kan si.[28]

³⁸Tawkfang an ei ṭheh hnuah sangvut hmuahhmuah kha tifinriat sungah an hlon ṭheh ih cuti cun tangphawlawng kha zaang deuh in an tuah.

³⁹Khua a vang tikah tangphawlawng kiltu pawl in tikap an hmuh tikah khui ram a si ti an thei thei lo. Asinain tikel ih tikap pakhat an hmu ih a cang thei asile cutawkih an tangphawlawng colhter kha an tum.

⁴⁰Curuangah an tangphawlawng hrennak hri cu an satcat ih a thirkawn cu tifinriat sungah an pilter; cule tangphawlawng hlaunak hri in an ṭemmi an phoih. Cun tangphawlawng hmailam bikah a puanzar kha an zaar ih thli in hmailam ah a sem ih tikap lamah cun kan feh.

⁴¹Asinain tangphawlawng cun vunnel pawng a sawh ih a taang. A hmailam cu vunnel sungah a dawt aw ih a phuak aw thei nawn lo; a dunglam cu tisuar in a hrual ciamco ih a phel kuai thluh.

⁴²Ralkap pawl cun thawngtla pawl kha ti an leuh ding ih titlang an thlen tikah an tlanhlo thluh ding ti an phan ruangah thah ṭheh hai an tum.

⁴³Asinain ralbawipa in Paul kha a hum duh ruangah a kham hai. Cule ti a leuh thei pawl cu tangphawlawng ihsin dawp dingah le tikap ah leuh dingin thu a pek.

⁴⁴A taangmi pawl in thingpheng maw, tangphawlawng a kuaimi thingphel maw, an pom ih an thlun. Cuti cun kan zatein tikap ah himte in kan thleng.