Read Falam Chin TIRHTHLAH 28 Bible Online

TIRHTHLAH 28 - Falam Chin bible

TIRHTHLAH 28

¹Himteih tikap kan thlen tikah cuih tikulh cu Malta tikulh a si ti kan thei.

²Cutawkih a rak ummi minung pawl cu kan parah an ṭhazet. Ruah a sur ih a daih tuk ruangah kan hrangah meipi in tih sak ih ṭhazet in in zoh.

³Paul in thinghreu a va khawm ih meipi-ah cun a thlak. Mei a sat ruangah thing sung ihsin rul a hung suak ih Paul ih kut kha a cuk ih a thlai aw niarniar.

⁴Paul ih kut parih rul a thlai awk niarniar an hmuh tikah cutawk tikulh ih minung pawl cun, “Hi pa hi laithat a si ding, tifinriat sung ihsin a luat naón laireltu a khawzing in a nunter lo ding a si hi!” tiah an ti.

⁵Sikhalsehla Paul in rul cu meisa sungah a thinthlak ih amah cu a zianghman a poi lo.

⁶Ziangtikah so a hung thlin uun-o ding, a si lole ziangtikah so a sawn ruangro ding, ti kha cutawkih mi pawl cun an hngak. Asinain reizet an hngak ih ziangti hmanih a um lo kha an hmuh tikah an thinlung an thleng sal ih, “Amah hi pathian a si ding!” tiah an ti.

⁷Cutawk ihsin a nai nawn ah loram a kau nawn a um ih a neitu cu cuih tikulh ih lalpa Publias a si. Publias cun ṭhazet in in zoh ih ni thum sung a mikhual ah kan cang.

⁸Publias ih pa cu khurhnat le thisen sungdok in a na ih ihkhun ah a it ringring. A ihnak khaan sungah Paul a lut ih a parah a kut suangin thla a cam ih a dam.

⁹Cuih thu an theih tikah cuih tikulh ih midam lo hmuahhmuah an ra ih an dam ṭheh ve.

¹⁰Laksawng tampi in pek ih tangphawlawng in kan feh tikah lamzin hrangih kan ṭul dingmi pawl tla tangphawlawng parah in ret sak.

¹¹Thla thum hnuah Alexandria ihsin a rami, “Faphir Khawzing,”[29] an timi tangphawlawng kha kan to. Cuih tangphawlawng cu thlatang sung cuih tikulh ih a rak ummi a si.

¹²Sirakus khawpi kan thleng ih cutawkah ni thum kan caam.

¹³Cutawkin kan suak sal ih Rezium an timi khua kan thleng. A thaisun ah thlanglam ihsin thli a hung hrang ih ni hnih hnuah Puteoli khua kan thleng.

¹⁴Cutawkah zumtu unau pawl an rak um ih an hnenah zarh khat caam dingin in dil. Cule cutawk ihsin Rom khua kan thleng.

¹⁵Rom ih a ummi zumtu unau pawl in kan thawmvang an theih tikah Appius Dawr an timi khua le Riahbuk Pathum an timi khua tiang in ra hmuak. Paul cu anmah a hmuh tikah Pathian a lawm ih a lungtho in thazaang a ngah ngaingai.

¹⁶Rom khua kan thlen tikah Paul cu amahte in an umter ih ralkap pakhat an kilter.

¹⁷Ni thum hnuah Paul in cutawk hrawngih a ummi Judah upa[30] pawl kha tongkhawm dingah a sawm. An rat tikah Paul in an hnenah, “Ka phunpi Israel mi pawl, kan Israel miphun le kan pupa pawl hnen ihsin kan ngahmi kan nun daan parah zianghman siatsuahnak ka tuah lo naón Jerusalem ah thawng in thlak ih tlunah Rom pawl ih kutah in pe.

¹⁸Thu in sut hnuah thih tlak sualnak zianghman ka tuah lo ti kha an hmu ih Rom pawl cun a thlah in duh.

¹⁹Sikhalsehla cumicu Judah mi pawl in an el tikah ka phunpi parah zianghman mawhthluk ding ka nei lo naón Rom siangpahrang hnenih azu khaan lo a theih nawn lo.

²⁰Curuangah nanmah ton le nan hnenih thusim ka duhnak a si. A ngaingai ti ahcun hiti ih thir cikcin ih khih ka sinak cu Israel mi in an ruahsan ringringmi pa ih ruangah a si,” tiah a ti.

²¹Annih in Paul hnenah, “Na thuhla ah hin Judea ram ihsin cakuat zianghman kan ngahmi a um lo. Na thuhla a sia a ṭha simtu dingah khilam ihsin a ra thlengtu kan milai zohman an um fawn lo.

²²Sikhalsehla na ruahnak cu a theih kan duhzet, ziangahtile nan pawl thu hi hmunzakipah mi in an relsia a si ti kan thei,” tiah an ti.

²³Curuangah Paul thawn ni an tin aw ih Paul umnak ahcun an ni tin ni ah mi tampi an ra suak. Zing ihsin zan tiang, Pathian Uknak thu cu a simfiang ciamco ih, Moses Daan cabu sung ihsin le profet pawl ih canganmi sung ihsin la tahratin Jesuh ih thu kha an thinlung sungah lut dingin a sim.

²⁴A simmi in mihrek cu an thinlung a fiangter, asinain mihrek cun an zum lo.

²⁵Paul in thu pakhat a sim ih cuih thu ruangah an lung a rual thei lo ih an ṭiakdarh aw ṭheh. A simmi cu, “Thlarau Thianghlim in, Profet Isaiah hmangin, nan pu le nan pa pawl hnenih a simmi thu cu a dikzet a si.

²⁶A rak simmi cu: ‘Hi minung pawl hnenah va feh awla va sim aw; Nan ngai rero ding naón nan thei lo ding; Nan zoh rero ding naón nan hmu lo ding.

²⁷Ziangahtile an thinlung a pit, an hna a set ih an mit a caw. Cutin a si lole an mit in an hmu ding; An hna in an thei ding ih, an thinlung in an theithiam ding. Ka lam an hoikir ding ih ka damter hai ding a si, tiah Pathian in a ti,’,” tihi a si.

²⁸Cule Paul in a netnak ah, “Pathian ih rundamnak Thuthang cu Zentail mi hnenah thlenter a si zo, tihi nan theih a ṭul a si. Annih in cuih Thuthang cu an ngai ding!” tiah a ti.

²⁹(Paul in cutiin a sim ṭheh hnuah Judah mi pawl cu an ṭiak ih anmah le anmah nasa zetin cuih thu-ah an el aw ciamco.)[31]

³⁰Paul cu amahte a saanmi innah kum hnih sung a um. Amah ton duhih a rami hmuahhmuah kha ṭhatein a rak tong.

³¹Ralṭhazet le zalen zetin Pathian Uknak thu kha a sim ih Bawi Jesuh Khrih ih thu khal a zirh.