Read Falam Chin TIRHTHLAH 4 Bible Online

TIRHTHLAH 4 - Falam Chin bible

TIRHTHLAH 4

¹Piter le Johan in mipi hnenih thu an sim rero laiah puithiam ṭhenkhat le biakinn kilvengtu hotu bawi le Sadusi hrekkhat an ra thleng.

²Mithi pawl an nung sal ding ti fiangternak ah Jesuh cu thihnak ihsin a tho sal tiah tirhthlah pahnih ih an phuan ruangah annih pawl cu an thin-ai a thok ngaingai.

³Curuangah cuih tirhthlah pahnih cu an kai ih khua a sim zo ruangah thawngah a thaisun tiang an thlak.

⁴Sikhalsehla an thusimmi a theitu tampi cun an zum; a zumtu pawl cu an karh sinsin ih thawngnga tluk an ti.

⁵A thaisun ah Judah mi hotu pawl, upa pawl le Daanthiam pawl cu Jerusalem ah an tongkhawm aw.

⁶Cutawkah Puithiam Saang Annas an tong; cule Kaiafas le Johan le Alexander le Puithiam Saang ih sungkhat dang pawl tla thawn an tongkhawm aw.

⁷Tirhthlah pahnih cu an hmaiah an dinter ih, “Hi thil cangmi hi ziangtinso nan tuah? Ziang huham so nan neih ih zo ih hmin so nan hman?” tiah an sut.

⁸Piter cu Thlarau Thianghlim in a khat ih an hnenah, “Mipi hotu pawl le upa pawl,

⁹tuihsun ahhin hi kezeng pa a damnak thu le a parih thil ṭha tuah a si thu hi in sut a si ahcun,

¹⁰nan theih dingmi le Israel mi hmuahhmuah in an theih ṭheh dingmi cu hihi a si: nan hmaiih a dingmi pa a damfelnak hi Nazareth mi, thinglamtah parih nan thahmi, thihnak ihsin Pathian in a thawhter salmi Jesuh ih hmin thawngin a si, tihi a si.

¹¹Jesuh thu ahhin Ca Thianghlim in: ‘Inn saktu pawl in nan hnonmi lungto cu a thupi bik lungto ah a cang zo,’ tiah a ti.

¹²Rundamnak cu amah ih sung lawngah a um; ziangahtile Pathian ih rundammi kan sinak dingah leikhawvel pumpuluk ah hin minung hnenih pekmi hmin dang zohman an um lo,” tiah a ti.

¹³Khonsil upa pawl in Piter le Johan cu fimnak le thiamnak a nei lomi mi menmen an si naón ziangtlukin an ral a ṭha ti kha an hmuh tikah an mang a bang ngaingai. Cule annih cu Jesuh ih rualpi an si ti kha an mang sal.

¹⁴Sikhalsehla an damtermi pa cu Piter le Johan kiangih a din ringring ruangah an ṭong theimi zianghman a um fawn lo.

¹⁵Curuangah an thurelnak khaan ihsin lengah an suahter hai ih anmah lawng in khaan sungah cun thu an rel.

¹⁶Pakhat le pakhat cu, “Ziangtin so kan tuah ko sawh ding? Zohman ih an tuah thei lomi hmuhsaknak thilmak an tuah ti cu Jerusalem khawsung ih a ummi hmuahhmuah in an thei ṭheh zo ih zohman ih el theimi a si nawn lo.

¹⁷Sikhalsehla hi thu hi mipi hnenih a zai lonak dingah Jesuh hmin in zohnen hmanah thu sim nawn hlah uh, kan ti pei,” tiah an ti.

¹⁸Cule an ko kir hai ih, Jesuh hmin in zohman zirh lo ding le zohnen hmanah thu sim hrimhrim lo dingin an dawn.

¹⁹Asinain Piter le Johan in, “Nanmah ih thu thlun maw Pathian ih thu thlun so Pathian hmaiah a dik sawn, nanmahte in ṭhen hnik uh.

²⁰Ziangahtile kanmah rori in kan hmuhmi le kan theihmi cu sim loin kan um thei lo,” tiah an ti.

²¹Curuangah Khonsil upa pawl cun nasa sinsin in ralrinnak an pek hnuah an thlah. Mi hmuahhmuah in an lakih thil a cangmi an hmu ih Pathian an thangṭhat ruangah tirhthlah pawl hrem cu a cang thei lo ti kha an hmu.

²²Hmuhsaknak ah damnak a ngahtu pa hi kum sawmli tlun a si.

²³Piter le Johan cu an luat vete in an rualpi pawl hnenah an kir ih puithiam le upa pawl ih an simmi thu pawl cu an ruah hai.

²⁴Cumi cu zumtu pawl in an theih tikah hmunkhatte ah Pathian hnenah thla an cam ih, “Maw Cungnungbik Bawipa, van le lei le tipithuanthum le a sungih ummi hmuahhmuah a Tuahtu Bawipa,

²⁵Na Thlarau Thianghlim hmangin na siahhlawh kan pu David hnenin thu na sim ih: ‘Ziangah so Zentail mi pawl hi an ai a thawh? Ziangah so milai hin a ṭhahnem lomi mi phiarnak an tuah?

²⁶Bawipa le Messiah dodal dingah, leilung siangpahrang pawl an tim an tuah ih, Uktu bawi pawl thawn hmun khatah an tongkhawm aw,’ tiin na rak ti.

²⁷Ziangahtile Herod le Pontius Pilat in Messiah ih na hrilmi na Siahhlawh Thianghlim Jesuh dodal dingah hi khawpi sungah hin Zentail mi pawl le Israel mi pawl thawn an tongkhawm aw ngaingai.

²⁸Na huham le na tumtahnak in a hung cang leh ding tiih na rak khiah ciami kimter ṭheh dingah an tong aw khawm a si.

²⁹Maw Bawipa, atuih in hro reromi tla hi nangmah in run thei hram awla kannih na sal pawl tla hin na thu cu ralṭha zetih kan sim theinak dingah in bawm hram aw.

³⁰Mi damnak dingah na baan run pharh awla na Siahhlawh Thianghlim Jesuh hmin in hmuhsaknak le khawruahhar thil pawl tuah theinak in run pe hram aw,” tiah an ti.

³¹Thla an cam ṭheh vete in cutawkih an tonkhawmnak inn cu a hnin thluh. Thlarau Thianghlim in an khat ih Pathian thu cu ralṭha zetin an sim.

³²Zumtu pawl cu thinlung le ruahnak rual aw zetin an umtlang. Zohman in a neihmi thilri kha, ‘Ka bulta a si,’ a ti lo; an neihmi hmuahhmuah kha pakhat le pakhat an ṭawm aw.

³³Bawi Jesuh thawhsalnak thu cu tirhthlah pawl in a nasa zetmi huham thawn an sim ih Pathian in an zate parah thlawsuah tampi a run burh.

³⁴An lakah zohman a tlasam mi an um lo. Lo a neitu le inn a neitu pawl in an lo le an inn pawl cu an zuar ih an ngahmi tangka cu,

³⁵tirhthlah pawl kutah an rak pek. Cule cuih tangka cu a ṭulnak vekin an zem vivo.

³⁶Cubangtuk in Saipras tikulh ih a suakmi Levi mi Josef in,

³⁷a lo kha a zuar ih a ngahmi tangka cu tirhthlah pawl ih kut sungah a pek. Josef cu tirhthlah pawl in Barnabas tiah an ti. (Barnabas ti cu “Thazaang Petu,” tinak a si.)