Read Falam Chin TIRHTHLAH 5 Bible Online

TIRHTHLAH 5 - Falam Chin bible

TIRHTHLAH 5

¹Asinain Ananias an timi pa le a nupi Sapfira cun an neihmi thilri kha an zuar ih,

²a nupi ih lungkimnak thawn tangka ṭhenkhat cu anmah ih hrangah an ret ih a taangmi cu tirhthlah pawl kut sungah an pek.

³Cutikah Piter in, “Ananias, ziangah so Satan in a lo neh ih na thil zuarnak ih na ngahmi tangka a hrek cu suup tahrat in Thlarau Thianghlim na bum?

⁴Na thilri cu na zuar hlanah nangmah ih ta a si; na zuar hnu khalah na ngahmi tangka cu na ta thotho a si. Sikhalsehla ziangah so hi bangtuk tuah ding hi na thinlung hrimhrim in na ruah? Milai na bum a si lo, Pathian na bum a si,” tiah a ti.

⁵Cumi cu Ananias in a theih vete in a tlu ih a thi; cule cuih thu a theitu hmuahhmuah cu an tuk a sum ṭheh.

⁶Tlangval pawl an rung ih a ruak cu an tuam ṭheh hnuah lengah an zawn ih an phum.

⁷Nazi pathum hnuah ziang a cang ti thei loin a nupi a ra ve.

⁸Piter in, “Hi tangka hi nan thil nan zuarmi ihsin nan ngahmi tangka zate a si maw? I sim hnik!” tiah a sut. Sapfira in, “Asi, kan ngahmi zate a si,” tiah a sawn.

⁹Cutikah Piter in, “Ziang hrangah so na pasal thawn nan pahnih in Bawipa ih Thlarau hniksak dingah nan lung a kimtlang? Na pasal a phumtu tlangval pawl cu sangka kiangah an um lai; nangmah khal an lo zawn suak ve ding,” tiah a ti.

¹⁰Hmakhatte-ah anih khal Piter kehram ah a tlu ih a thi ve. Tlangval pawl cu an rung lut ih a thi zo ti kha an hmuh tikah a lengah an zawn ih a pasal thlaan kiangah an va phum ve.

¹¹Kawhhran pumpi le cuih thu a theitu hmuahhmuah cu tuksum in an um.

¹²Mipi lakah cun tirhthlah pawl in hmuhsaknak le khawruahhar thil tampi an tuah. Zumtu pawl hmuahhmuah cu Solomon Hulhliap timi ah an tong khawm aw.

¹³Anmah cu midang in an porh zet naón a lenglam mi cu an lakah an tel ngam lo.

¹⁴Sikhalsehla nunau siseh mipa siseh Bawipa a zumtu pawl cu an pawl ah tam sinsin in an lut.

¹⁵Tirhthlah pawl ih thil an tuahmi an hmuh ruangah mina tampi cu khawsung lamzin ah an zawn ih Piter a feh zawng ah mi ṭhenkhat tal a thlaam in hliap seh tiah ihkhun le pher parah an hlum vivo hai.

¹⁶Cule mi tampi cu Jerusalem kiangkap khua ihsin an ra ih mina siseh, khawsia polh mi pawl siseh, an rak zawn ih an zatein an dam thluh.

¹⁷Puithiam Saang le a rualpi pawl hmuahhmuah le cutawk hrawngih a ummi Sadusi pawl cun tirhthlah pawl kha an halhsik tuk ruangah thil pakhatkhat tuah an tum.

¹⁸Tirhthlah pawl kha an kai ih mipi thawng ah an thlak.

¹⁹Sikhalsehla cuih zanah cun Bawipa ih vancungmi in thawnginn sangka pawl cu a ong ih tirhthlah pawl cu a suah hnuah an hnenah,

²⁰“Va feh uhla Biakinn sungah dingin misenpi hnenah hi nuntharnak thuhla hi kimten va sim uh,” tiah a ti.

²¹A sim vekin tirhthlah pawl cun an tuah ih zing thlapit ah Biakinn sungah an lut ih thuzirh an thok. Puithiam Saang le a rualpi pawl in Khonsil thurelnak thupi zet nei dingah Judah mi upa hmuahhmuah kimtein an ko khawm. Tirhthlah pawl thawnginn ihsin an hmaiih rak hruai dingah mi an hei thlah.

²²Sikhalsehla thawnginn bawi pawl an va thlen tikah thawnginn sungah tirhthlah pawl an hmu nawn lo; curuangah an kir ih Khonsil pawl an sim:

²³“Thawnginn kan va thlen tikah tawh ṭhatein a hren aw ih a kiltu pawl khal in sangka ṭhatein an kil ko; asinain sangka kan ong tikah a sungah zohman an um lo,” tiah an ti.

²⁴Cumi cu puithiam upa le Biakinn kiltu bawi in an theih tikah tirhthlah pawl ziang an cang, tiah khawruahhar in an um.

²⁵Cule mi pakhat a rung lut ih, “Ngaihnik uh! Thawng ih nan thlakmi pawl kha Biakinn ah an um ih mi an zirh rero a si,” tiah a ti.

²⁶Curuangah Biakinn kiltu ralbawi le a kuthnuai milai pawl cu an va feh ih tirhthlah pawl cu an va hruai kir. Hranhram in an hruai lo, ziangahtile misenpi in lungto in in deng pang ding ti an phang.

²⁷Tirhthlah pawl cu an run luhpi ih Khonsil hmaiah cun an dinter. Cule Puithiam Saang in thu a sut.

²⁸“Hi pa hmin in thu nan zirh nawn lo pei, tiah fek zetin thu kan lo pe zo ti nan thei lo maw? Asinain nan tuah thotho. Nan thuzirhmi cu Jerusalem nan khahter zo ih a thihnak thu khalah kanmah hi mawhphurtu ah in tuah a si,” tiah a ti.

²⁹Piter le a dang dungthlun pawl in, “Milai thu hnakin Pathian thu kan ngai sawn ding.

³⁰Nanmah in Jesuh cu thinglamtah parah nan khen that; asinain kan pupa pawl ih Pathian in thihnak ihsin a thoter sal zo.

³¹Pathian in a thoter sal ih Israel mi pawl sualsirnak tikcu an neih ih an sualnak tla ngaidam a sinak dingah Amah cu Pathian in Hruaitu le Rundamtu ah a vorhlamah a toter zo.

³²Hi thil hmuahhmuah a theihpitu cu kanmah hi kan si; kanmah lawng kan si lo, Pathian in amah ih thu a ngaitu pawl hnenah laksawngih a rak pekmi Thlarau Thianghlim tla hi thu theihpitu a si ve,” tiah an ti.

³³Cutiih an timi cu Khonsil sungtel pawl in an theih tikah an thin a heng tuk lawmmam ih tirhthlah pawl cu thah ṭheh an duh.

³⁴Sikhalsehla anmah lakah mi hmuahhmuah ih upatmi Daanthiam pa Farasi mi Gamaliel cu Khonsil hmaiah a hung ding ih tirhthlah pawl cu a lengih malte sung suahter dingah thu a pek.

³⁵Cule Khonsil upa hnenah cun, “Israel mi pawl, himi pawl parih thil nan tuahmi ah hin ralring uh.

³⁶Kan dung laiah Theudas an timi pa a hungsuak ih keimah hi mi menmen ka si lo, a ti ih mi zali in an thlun. Asinain amah cu an that ih a thluntu pawl cu an ṭekdarh ṭheh; cule a hnaṭuannak cu a cem ve.

³⁷Cuih hnuah mipum siar laiah Galilee mi Judas a hungsuak lala ih mi tampi in an thlun hluarhlo; asinain thah a si ve ih a dungthluntu pawl cu an ṭekdarh ṭheh lala.

³⁸Atuih thu khalah hin fiangtein ka lo sim, himi pawl tlunah hin zianghman tuah hlah uh. Umsan men uh! An tumtahmi le an tuahmi hi milai ih thokmi a si ahcun a hloral ko ding.

³⁹Sikhalsehla Pathian ih tuahmi a si ahcun nan neh thei cuang lo ding. Pathian dodaltu riangri ah nan cang thei,” tiah a ti. Curuangah Khonsil upa pawl cun Gamaliel ih ruahnak pekmi cu an thlun.

⁴⁰Tirhthlah pawl cu an ko ih fungfek in an vuak ih Jesuh hmin in thu sim nawn lo dingah thu an pek hnuah an thlah.

⁴¹Tirhthlah pawl cu Khonsil upa pawl hnen ihsin an suah tikah Jesuh hrangah ningzah mualpho tuar dingin ruah an si ruangah an lung a awizet.

⁴²Cule nitinte in Messiah Jesuh ih Thuthang ṭha cu Biakinn ah siseh mi inn ah siseh catbang loin an zirh ih an sim vivo.