Read Falam Chin TIRHTHLAH 9 Bible Online

TIRHTHLAH 9 - Falam Chin bible

TIRHTHLAH 9

¹Cuih caan hrawngah Saul cun Bawipa ih dungthlun pawl kha that dingah a hringhro rero. Puithiam Saang hnenah a va feh ih,

²Damaskas khua ih sinakok inn uktu pawl in amah kha an rak theihnak dingah ca ken ding a va dil. A tumtahmi cu cutawkah Bawipa ih Lamzin a thluntu an um asile nunau mipa tilo kai tahratin Jerusalem ih hruai ding kha a si.

³Saul cu Damaskas khua a thlen zikah hmakhatte ah van ihsin tleunak in a kimvelin a run tlet.

⁴Saul cu a tlu ih, “Saul, Saul, ziangah so i hrem?” tiah aw pakhat a thei.

⁵Saul in, “Bawipa, zoso na si?” tiah a sut. Cuih aw cun, “Na hrem reromi Jesuh ka si.

⁶Tho awla khawpi sungah va feh aw; na tuah ṭulmi kha an lo sim ding,” tiah a ti.

⁷Saul thawn khual a tlawngmi pawl cu an cawl ṭheh ih kam khat hman an ṭong lo; aw cu an thei naón zohman an hmu lo.

⁸Saul cu leilung ihsin a hung tho ih a mit a hun meng, asinain zianghman a hmu thei lo. Curuangah a kut in an hruai ih Damaskas khua sungah cun an fehpi.

⁹Ni thum sung khua a hmu thei lo; cuih ni thum sungah zianghman a ei lo, tidai khal a in lo.

¹⁰Damaskas khawsungah Ananias timi dungthluntu pakhat a um. Langnak hmuhmi a nei ih cumi sungin Bawipa in, “Ananias!” tiah a ko. Anih in, “Bawipa, hinah ka um,” a ti.

¹¹Bawipa in, “Na tim tuah awla Lamzin Ding timi ah va feh aw. Judas inn ah Tarsas khuami Saul timi pa a um maw, tiin va sut aw. Amah cu thla a cam lai rero;

¹²anih khal in langnak a hmu ih cumi langnak sungah cun a mit khua a hmuh thei salnak dingah Ananias an timi pa a rung lut ih a lu parah kut a ra suan kha a hmu,” tiah a ti.

¹³Ananias in, “Bawipa, mi tampi in himi pa ih thuhla hi in sim zo ih Jerusalem ih na minung pawl parih thil ṭha lo a tuahmi pawl khal in sim.

¹⁴Cule atu-ah puithiam upa pawl ih thuneihnak thawn nangmah a lo biatu pawl hmuahhmuah kai dingah Damaskas ah a ra thleng a si,” tiah a ti.

¹⁵Bawipa in a hnenah, “Va feh aw! Ziangahtile amah cu Zentail mi hnen le siangpahrang pawl hnen le Israel mi pawl hnenah ka hmin thangter dingin le ka hnaṭuan dingin ka hril zo.

¹⁶Cule keimah in ka hrangih a tuar dingmi pawl cu ka hmuh ding a si,” tiah a ti.

¹⁷Curuangah Ananias cu a feh ih Saul umnak innah cun a va lut. Saul ih lu parah a kut suang tahrat in, “Unau pa Saul, hitawk lam na rat laiih lamzinah na hnenih a langmi Jesuh Bawipa amah rori in na hnenah i thlah. Khua na hmuh sal theinak dingah le Thlarau Thianghlim thawn na khahnak dingah na hnenah i thlah a si,” tiah a ti.

¹⁸Hmakhatte-ah Saul ih mit ihsin ngakep bangtuk a si mi a tla ih khua a hmu thei sal. A tho ih baptisma an pek.

¹⁹Cule rawl a ei ih thazaang a nei sal. Saul cu Damaskas khua ih dungthluntu pawl hnenah ni malte sung a um.

²⁰An pumkhawmnak sinakok inn pawlah a va feh ih Jesuh cu Pathian Fapa a si, ti thu kha a sim.

²¹A theitu hmuahhmuah cu an mang a bang ngaingai ih, “Jerusalem ah Jesuh a zumtu pohpoh a siatsuahtu cu amah hi a si lo maw? Cuvek thothoin hitawk khalah hin cubangtuk mi cu kai tahratin puithiam upa pawl hnenih thlenpi dingah a ra thleng a si lo maw?” tiah an sut aw ruri.

²²Sikhalsehla Saul thusimmi cu hmual a nei deuhdeuh; Jesuh cu Messiah rori a si tiah a simmi kha mi thinlung sungah fiangtukin a luh ruangah Damaskas khua ih a ummi Judah mi pawl in a thu cu an let thei lo.

²³Ni tam nawn a rei tikah Judah mi pawl an tongkhawm aw ih Saul that dingah khua an khang.

²⁴Asinain cutiih an khawkhanmi cu a simtu an rak um ih Saul in a thei. Amah thah duh ah a sun a zan in khawpiih kotka pawl cu an kil.

²⁵Sikhalsehla Saul a thluntu pawl in zan khatah Saul cu bawm sungah an ret ih khawpi kulhnak hauhruang ong in a lengah an vun ṭhum.

²⁶Saul cu Jerusalem ah a feh ih dungthlun pawl lakah tel ve a tum. Asinain annih pawl cun dungthlun a si ve thlang ti kha an zum lo ih an zatein amah kha an ṭih riangri.

²⁷Cule Barnabas in a ṭanpi ih tirhthlah pawl hnenah a fehpi. Barnabas in an hnenah cun Damaskas lamzin ih Bawipa a tonnak le Bawipa in a hnenih a ṭongmi pawl kha fiangtein a sim. Cule Saul in Jesuh ih hmin kha Damaskas khua ah ralṭha zetin thuthang.tha a phuannak thu tla a sim.

²⁸Curuangah Saul cu an hnenah a um ih Jerusalem khawsung hmunzakip ah a feh ih ralṭha zetin Jesuh hmin in thu a sim.

²⁹Grik ṭong a hmangtu Judah mi pawl hnen tla-ah thu a sim ih thu tla an el aw, asinain annih cun a thah an tum.

³⁰Cumi cu zumtu pawl in an theih tikah Saul cu Sisaria ah an hruai ih Tarsas ah an thlah.

³¹Cuti cun Judea ram, Galilee ram le Samaria ram sung kawhhran pawl cu hnangamte in an um. kawhhran cu Thlarau Thianghlim bomnak in a cak deuhdeuh ih mi khal an karh vivo. Pathian ṭihzah in an um.

³²Piter cu khuazakipah a tlawng ih voikhat cu Lidda khua ih ummi Pathian awi pawl tlawng dingah a feh.

³³Cutawkah Aenias an timi pa a tong. Aenias cu mizeng a si ih kum riat sung ihkhun ihsin a tho thei dah lomi a si.

³⁴Piter in, “Aenias, Jesuh Khrih in a lo damter a si. Tho awla na ihphah zual aw,” tiah a ti. Hmakhatte-ah Aenias cu a tho.

³⁵Lidda le Sharon-ih a ummi hmuahhmuah in Aenias cu an hmuh ruangah Bawipa lamah an hoikir.

³⁶Joppa khua ahcun Tabitha an timi nu a um ih Jesuh zumtu a si. (A Grik hmin cu Dorkas a si ih a tican cu “Zukneng,” tinak a si.) A tikcu hmuah cu thil ṭha tuahnak ah le mifarah bomnak ah a hmang.

³⁷Cuih caanah cu nu cu besia zetin a na ih a thi. A ruak cu an kholh ih tlunta khaan ah an ret.

³⁸Joppa khua cu Lidda khua in a naite a si. Cule Joppa ih a ummi zumtu pawl in Lidda ah Piter a um ti kha an theih tikah mi pahnih an thlah ih, “Zamrang in kan hnenah ra hram aw,” tiah an cah.

³⁹Curuangah Piter cu a tim a tuah ih anmah a thlun. A va thlen tikah Piter cu tlunta khaanah cun an hruai. Cutawkah cun nuhmei pawl in an pan ciamco ih an ṭap ih Dorkas damlai-ih angki le kawtkor a tahmi pawl kha an hmuh.

⁴⁰Piter in khaan sung ihsin mi pawl cu a suahter ṭheh ih, a khukbil in thla a cam; cule Dorkas ruak lam a hoi ih, “Tabitha, tho aw!” tiah a ti. Dorkas cun a mit a hun meng ih Piter a hmuh tikah a hung to.

⁴¹Piter in a hei dawh ih a dinter. Cule nuhmei pawl le zumtu pawl hmuahhmuah cu a kawh ih a nungzo tiin an hnenah a hmuh.

⁴²Cuih thu cu Joppa khawsung hmuahhmuah ah a thang ih mi tampi in Bawipa an zum.

⁴³Piter cu Joppa khua ah savun tuahtu Simon inn ah ni tampi sung a caam.