Read Falam Chin ROM 11 Bible Online

ROM 11 - Falam Chin bible

ROM 11

¹Cuti asile Pathian in a minung pawl a hnongta ding maw si? Hnong ta hrimhrim hlah! Keimah khal hi Israel mi, Abraham ih tesinfa, Benjamin phun sungtel ka si.

²Pathian in a hramthok ihsin a rak hrilmi a minung pawl cu a hnong lo a si. Ca Thianghlim sungih nganmi, Israel mi pawl mitkem ah Elijah in Pathian hnenih a simmi kha nan thei a si lo maw? Elijah in,

³“Bawipa, na profet pawl an that ih na biakṭheng tla an bal ṭheh; keimah pakhat lawng ka taang ih keimah hman a thah in tum a si!” a ti kha.

⁴Cutikah Pathian in ziangtinso a leh? “Keimah ih bul hrangah Baal khawzing a bia hrih lomi minung thawng sarih ka nei lai,” a ti a si.

⁵Cuvek ṭhiamṭhiam in atu khalah hin a si - a zaangfahnak ruangah Pathian in a rak hrilmi minung pawl sung ihsin a taangsun an um lai hrih a si.

⁶Hitiih a rak hrilnak cu an hnaṭuanmi ruangah si loin a zaangfahnak ruangah a si. Ziangahtile Pathian ih a hrilmi pawl hi an ṭuanmi ruangih hrilmi an si ahcun a zaangfahnak timi hi zaangfahnak taktak a si lo ding.

⁷Cule ziangtinso a si? Israel mi pawl in an hawlmi cu an hmu lo. A hmutu cu Pathian ih hrilmi mi malte lawng an si. Midang pawl cu an thinlung a ruh.

⁸Ca Thianghlim in, “Pathian in an thinlung mit a malhter, Tuihsun tiangah an hmu thei lo ih an thei thei lo,” a ti vekin a si ngaingai.

⁹Cule David in, “An puai sungah kaihmi le thangih awkmi si hai seh; Ril in bah hai sehla hremmi si hram hai seh.

¹⁰An hmuh thei lonak dingah an mit cu cawtter sisehla, An harsatnak thilrit hnuai ah, an eel cu cat loin kun hram seh,” tiah a ti.

¹¹Cuti asile Judah mi an rilhbah tikah hin an bah siatralta ding maw si? Siatta hrimhrim hlah! Anmah an rilhbah ruangah rundamnak cu Zentail mi hnenah a ra thleng. Cumi cu Zentail mi parah Judah mi in iksiknak nei hai seh, ti duhnak a si.

¹²Judah mi pawl ih sualnak in leilung tlunah thlawsuahnak tampi a thlenter; an thlarau lam farahnak in Zentail mi hnenah thlawsuah bawngmal tampi a sawm. Cule Judah mi pawl cuzat tiih khiah mi mipum famkim zetih an tel ve tikah cun ziangtluk thlawsuahnak tam sinsin so a si ding!

¹³Atu cu Zentail mi nan hnenah thu ka sim: Zentail mi hnenih tirhthlahmi ka si sungah cun ka hnaṭuanmi ah mithmai ṭhatnak ka nei ding a si.

¹⁴Ka phunpi pawl nahsiiknak neihter tahratin mi ṭhenkhat tal ka rundam thei na hman maw tinak ah a si.

¹⁵Ziangahtile Judah mi pawl hnon an si tikah leitlun khawvel mi cu Pathian ih ral ihsin a rualpi ah an cang a si. Annih Judah mi pawl cohlan an si ve tikah ziang a bang ding? Mithi hrangah nunnak a si ding!

¹⁶A hmaisa bik a si mi sang ah khat kha Pathian hnenih hlan a si ih a thianghlim a si ahcun a zawl pumpi in amah ih ta a si ih a thianghlim a si. Thinghram pawl Pathian hnenih pek a si ih an thianghlim a si ahcun a hnge pawl khal an thianghlim ve a si.

¹⁷An cin mi olif kungih hnge ṭhenkhat cu an tan ih hramlakih a kho mi olif kung hnge thawn cuih cinmi olif kung cu peh an si. Nannih Zentail mi pawl hi cuih hramlakih a khomi olif kung bangtuk nan si ih Judah mi pawl ih thlarau lam nunnak le thazaang nan ṭawm aw a si.

¹⁸Curuangah olif hnge tanmi bangtuk a si mi pawl kha nan hmuhsuam lo pei. Ziangtin so nan puarthau thei ding? A hnge lawng nan si ih a hram kha nannih in nan cawm lo; a hram in a lo cawm sawn a si.

¹⁹Nannih cun, “Kanmah pawl hrang umnak lawngter dingah a hnge pawl an sattan a si,” tiah nan ti ding.

²⁰Cumi cu a dik a si. Annih Judah mi pawl cu an zum lo ruangah tan an si; nannih cun nan zum ruangah hi hmun hi nan luah. Cumi ruangah cun puarthau in hngal pang hlah uh! A ṭih in ṭih sawn uh.

²¹A hram thawn a peh-aw ih a hnge ngaingai a si mi Judah mi pawl hman a zuah lo ahcun, nannih tla cu zuah dingah nan ruat aw maw si?

²²Hi zawn ah hin Pathian cu zaangfah lainatnak a neizet naón a thu a khoh zet thotho ti cu ka hmu a si. A bah a rilmi pawl hnenah cun a thu a khoh zet, asinain nannih hnenah cun zaangfahnak a neizet. Cuih zaangfahnak sungih nan um ringring a si ahcun a lo zaangfah ringring ding; asinain nan um lo ahcun khiah-hlo nan si ve ding.

²³Cule Judah mi pawl in zum loih an umnak dinhmun kha an tlansan a si ahcun a hlanih an rak umnak ah khan ret sal an si ding, ziangahtile Pathian cu pehsal theinak thu a nei a si.

²⁴Nannih Zentail mi pawl cu hramlakih a khomi olif kungih hnge bangtuk nan si ih nannih cu tan tahratin, a daan a si lo naón, ciin-mi olif kuang thawn peh cihmi men nan si. Judah mi pawl cu cin-mi olif kung an si ruangah tan ciami hnge hman si hai sehla a kung hlunih peh sal cu Pathian hrangah a ol deuh ngaingai ding.

²⁵Ka u le ka nau tla, a dikmi thuthup a um ih cumi cu nan theih dingah ka duhmi a si. Cumi nan theih asile mifim ah nan ruat aw lo ding. Ziang a si tile, Israel mi pawl an thinlung a ruh hi kumkhua in a si lo ding; Pathian hnenah Zentail mi a thleng ding zat an thlen hlan sung lawng a si ding.

²⁶Cule Israel mi hmuahhmuah rundammi an sinak ding cu hiti in a si ding. Ca Thianghlim in, “Zion ihsin Runtu a ra ding ih Jakob tesinfa pawl ih ṭhatlonak hmuahhmuah cu a hlonhlo ṭheh ding.

²⁷An sualnak ka laksak tikah cun, anmah thawn hi thukamnak hi ka tuah ding,” a ti bangtuk in a si ding.

²⁸Thuthang ṭha an hnon ruangah Judah mi pawl cu Pathian ih ral ah an cang; cumi cu nanmah Zentail mi hrangah a si. Sikhalsehla an pupa pawl ih ruangah annih cu Pathian ih hrilmi rualpi an si.

²⁹Ziangahtile a hrilmi le a thlawsuahmi thu-ah cun Pathian in a thinlung a ṭhin dah lo.

³⁰Nannih Zentail mi pawl, a liam cia caan sungah cun Pathian thu thlun lotu nan rak si; asinain atu-ah cun Judah mi in Pathian thu an ngai lo ruangah nannih in Pathian ih zaangfahnak nan ngah.

³¹Cuvek ṭhiamṭhiam in Pathian zaangfahnak nan ngahmi kha annih khal in an ngah venak dingah Judah mi pawl cu Pathian thu ngai loin an um.

³²Ziangahtile, mi hmuahhmuah hnenah zaangfahnak a neih theinak dingah Pathian in zozo khal thu-ngai lonak sungah thawngtla bangin a taanter ṭheh a si.

³³Pathian zaangfahnak cu a va tum so! A fimnak le a theihnak hi an va thuk lawmmam so! A thu relcatmi pawl hi zoso a hrilhfiah thei ding? A fehnak lamzin hi zoso a zong thei ding?

³⁴Ca Thianghlim in, “Bawipa ih thinlung cu zo in so a thei? Ruahnak a pe theitu an um maw?

³⁵Amah ih rulh sal leh dingah zo in so thil a pe dah?” tiah a timi bangtuk a si.

³⁶Ziangahtile ziang hmuahhmuah cu Amah ih sersiammi, Amah ruangih ummi le Amah hrangah an si ṭheh. Pathian hnenah kumkhua-in sunlawinak cu um ko seh! Amen.