Read Falam Chin ROM 14 Bible Online

ROM 14 - Falam Chin bible

ROM 14

¹Zumnak lamih a derdaimi kha cohlang ko uh; a pumpak zumnak pawl kha eel rero duh hlah uh.

²Mi pakhat cun ziang hmuahhmuah ei theih a si, tiah a zum; asinain zumnak lamih a derdaimi pa cu hanghnah hangrah lawng a ei.

³Ziangkhal a duh poh a eitu in a ei lotu kha a nautat ding a si lo; cuvek thotho in hanghnah hangrah lawng a eitu in ziang hmuahhmuah a eitu kha a soisel ding a si ve lo; ziangahtile amah cu Pathian ih cohlan mi a si ve.

⁴Mi pakhat ih hnen-um thu-ah ziangah so thuṭhentu na ṭuan duh rero? A hnen-um a hlawhtling maw a hlawhsam ti thuṭhentu ding cu a bawipa a si. Cule a hlawhtlingmi khal a si ko ding, ziangahtile Bawipa in hlawhtling in a tuah thei a si.

⁵Mi pakhat in ni dang tampi lakah ni ni khat cu a thupibik ah a ruat; cule midang pakhat cun ni hmuahhmuah cu an bangrep ṭheh tiah a ruat. Anmah ciar in an thinlung sungah fiangterta hai seh.

⁶Mi pakhat in ni ni khat cu a sunglawi ce in a ruah ahcun cu mi cu Bawipa upatnak ih a tuahmi a si; ziang hmuahhmuah a ei theitu khal in Bawipa upatnak ah a tuah a si; ziangahtile a ei mi rawl ruangah Pathian hnenah lungawinak a langter. Ei lomi a neitu khal in Bawipa upatnak ih a tuahmi a si ve ih Pathian hnenah lungawinak a langter ve.

⁷Zohman kanmah ih hrang lawngah kan nung lo; zohman kanmah ih hrang lawngah kan thi lo.

⁸Kan nun asile Bawipa ih hrangah kan nung; kan thih khalle Bawipa ih hrangah kan thi. Kan thih ah siseh, kan nun ah siseh Bawipa ih ta kan si.

⁹Ziangahtile a nungmi le a thimi ih Bawipa si dingah Khrih cu a thi ih a nungsal zo.

¹⁰Curuangah nannih hanghnah hangrah lawng eitu pawl, nan unau pawl ziangah so nan soisel? Cule nannih ziang hmuahhmuah eitu pawl, ziangah so nan unau pawl nan nautat? Kan zatein Pathian hmaiah kan ding ding ih Amah in kan thu in ṭhen ding a si.

¹¹Ca Thianghlim sungah, “A nungmi Pathian Keimah ih hmaiah mi hmuahhmuah in, an khuk an bil ding; Mi hmuahhmuah in Pathian ka si kha an phuang ding tiah Bawipa in a ti,” tiah a um.

¹²Curuangah zozo khal kan zatein kan nunnak le kan ṭuannak thu cu Pathian hmaiah kan simfiang ciar leh ding.

¹³Curuangah pakhat le pakhat kan soisel awk ṭheu cu baang thlang uhsi. Cuhnakin na unau sualnak ih a tlukrilh lonak ding kha na ruat cia sawn pei.

¹⁴Ei thiang lomi rawl zianghman a um lo ti kha Bawipa Jesuh thawn kan pehzom awknak thawngin ka thei fiang a si. Sikhalsehla rawl hrekkhat cu ei thiang lo an si tiah mi pakhat in a zum ahcun cutiih a zumtu hrangah cun cuih rawl cu a thiang lomi a si.

¹⁵Pakhatkhat na ei ruangah na unau thinlung na natter a si ahcun cumicu duhdawtnak thawn a nungmi na si lo. Rawl na ei mi in Khrih thisen ih tlenmi mi pakhat kha siatsuahnak tongter hlah.

¹⁶Thil ṭha tiih na ruahmi kha hminsiatnak phurtu ah canter hlah.

¹⁷Ziangahtile Pathian Uknak cu ei le in ah a si lo; Thlarau Thianghlim ih pekmi dingnak, daihnak le lungawinak ah a si sawn.

¹⁸Cutiin mi pakhatkhat in Khrih hna a ṭuan asile Pathian lung a awiter ih minung khal in an lawm.

¹⁹Cuti a si ruangah, daihnak a suahpitu thil le pakhat le pakhat karlakah thacah ṭhansonak a suahpitu thil pawl cu kan hmuitin ringring dingmi an si.

²⁰Rawl ruangah Pathian ih a tuah ciami kha siatsuah hlah uh. Rawl hmuahhmuah cu ei ṭha an si ko, sikhalsehla mi pakhatkhat sualnak ih a tluktertu rawl cu ziang rawl khal ei ding a si lo.

²¹Nan unau rilhbahnak a suahtertu cu ziang bangtuk thil a si hmanah tuah lo a ṭha sawn; sabit zu in lo le sa khal ei loih um a ṭha sawn.

²²Hi bangtuk thu-ah cun nangmahte thinlung nei aw la nangmah le Pathian karlakih thu-ah ret aw. A dik tiin a ruahmi a tuah ih sirawknak a nei lotu cu mi lungawi a si!

²³Sikhalsehla phuhrung aw cingih a ei a si ahcun Pathian in a hnong ding, ziangahtile a tuahmi kha zumnak thawn a tuah lo a si. Ziangkhal zumnak parih bun loin tuah cu sual a si.