Read Falam Chin ROM 16 Bible Online

ROM 16 - Falam Chin bible

ROM 16

¹Kenkhria khua kawhhran ih hnaṭuantu kan farnu Fibi hi nan theihthiammi siseh ti ka duh.

²Pathian zumtu pawl ih tuah dingmi a si vekin Bawipa ih hmin in amah cu rak cohlang uhla bomnak a ṭul ahcun rak bawm uh. Amah hi mi tampi hrangah siseh, keimah hrang khalah siseh, rualpi ṭha, mi ṭhahnem zet a si.

³Khrih Jesuh hnaṭuannak ah ka hnaṭuanpi a si mi Prisilla le Aquila cibai ka rak buk hai.

⁴Annih cu ka hrangah thih a ngamtu an si. An parah lungawinak tampi ka nei; keimah lawng hman ka si lo, Zentail kawhhran pawl an zatein an parah an lung a awi ngaingai a si.

⁵An innih a khawm awmi kawhhran khal cibai ka rak buk a si. Asia ram sungih Khrih a zum hmaisa biktu ka duhdawtmi ka rualpi Epenetas khal cibai ka rak buk.

⁶Nan hrangah hnaṭuan khung zetzet a ṭuantu Mari khal cibai ka buk.

⁷Ka Judah phunpi le keimah thawn thawng a tla vemi Andronikas le Junias khal cibai ka rak buk. Annih cu dungthluntu pawl ih theihthiam zetmi an si ih keimah hlanah Khristian an rak cang zo.

⁸Bawipa ih pawlkomnak sungah ka rualpi ṭha a si mi Ampliatas cibai ka rak buk.

⁹Khrih hrang hnaṭuannak ah kan ṭuanpi Urbanas khal kha cibai ka rak buk; ka rualpi ṭha Stakis tla cibai ka rak buk.

¹⁰Khrih zumnak ah rintlak ngaingai a si mi Apelles kha cibai ka buk. Aritobulas innsang ih ummi pawl cibai ka rak buk.

¹¹Ka Judah phunpi, Herodian le Narsissas innsang ih a ummi Khristian unau pawl khal cibai ka rak buk a si.

¹²Bawipa hrang ih hnaṭuannak ah hna a ṭuantu Traifena le Traifosa kha cibai ka buk; cule Bawipa hrangah ih tamzet hna a ṭuantu ka rualpi ṭha Persis khal cibai ka rak buk.

¹³Bawipa hrang ih hnaṭuannak ah ṭha cuangih hna a ṭuantu Rufus le a fapa ngaingai vekin i zohṭhatu Rufus ih nu khal cibai ka rak buk.

¹⁴Asinkhritas, Flegon, Hermes, Patrobas, Hermas le an hnenih Khristian unau dangdang pawl khal cibai ka rak buk.

¹⁵Filologas le Julia, Nereus le a farnu, Olimpas le anmah thawn a ummi Pathian ih minung pawl khal cibai ka rak buk a si.

¹⁶Pakhat le pakhat hnamnak thianghlim thawn cibai buk aw uh. Khrih ih kawhhran hmuahhmuah in cibai an lo buk a si.

¹⁷U le nau pawl, ṭhenṭhek awknak a suahpitu le zumnak a buaitertu le nan pom ciami zirhnak a dodaltu pawl kha ralring uh tiah ka lo forh. Annih cu pawl hlah uh.

¹⁸Cubangtuk thil a tuahtu pawl cu kan Bawipa Khrih hrang hnaṭuantu an si lo; an pumpi hrang ṭuantu an si. An ṭong naal le an mi porhthiamnak in zaaraan pawl cu an bum ṭheh a si.

¹⁹Mi hmuahhmuah in Thuthang ṭha thu ahcun rinsan tlak nan si kha an thei ṭheh zo; curuangah keimah khal nan parah ka lung a awi. A ṭhami thu ahcun mifim si uhla a ṭha lomi ahcun ziang thei lo si uh ti ka lo duh.

²⁰Cule kan daihnak a si mi Pathian in nan ke hnuai ah Satan cu a rialdip cing ding a si. Kan Bawipa Jesuh ih zaangfahnak cu nan hnenah um ko seh.

²¹Ka hnaṭuanpi Timote in cibai a lo buk. Cubangtuk ṭhiamṭhiam kan Judah phunpi, Lusias, Jason le Sosipater in cibai an lo buk a si.

²²Hi ca a ngantu keimah Tertius in Bawipa ih sung in cibai buknak ka lo kuat ve.

²³Kawhhran pumkhawmnak ih a inn an hman ṭheumi ka innteek pa Gaius in cibai a lo buk ve. Hi khawpi tangka kiltu Erastas le kan unau Quartes in cibai an lo buk.[8]

²⁵Pathian hnenah thangṭhat sunlawinak pe uhsi. Amah cu Jesuh Khrih ih Thuthang ṭha ka aupimi le a liam ciami san tampi sungah thuh in a um naón atu-ah phuan a si mi thuthuk thawngin nan zumnak sungah hngetkhoh zetih a lo dintertu a si.

²⁶Atu-ah cun cuih thutak cu profet pawl ih cangannak thawngin mi hmuahhmuah ih hmaiah langter a si zo; cule kumkhua a nungmi Pathian ih thupekmi thawngin cuih thu cu zozo khal in an zum ih an thlunnak dingah miphun hmuahhmuah hnenah phuan a si zo.

²⁷Thu hmuahhmuah ah a fim ih amah lawng Pathian a si mi hnenah Jesuh Khrih thawngih thangṭhatnak cu a kumkhua in um hram seh, Amen.