Read Falam Chin ROM 3 Bible Online

ROM 3 - Falam Chin bible

ROM 3

¹Cuti asile Judah mi pawl hi Zentail mi tlunah an cuan hleinak a um maw? Serh an tan hi ziangtal man a nei maw?

²A phunphun in an cuan hleinak a um. Hmaisabik ah Pathian in a thu cu Judah mi pawl a kilter.

³Asinain Judah mi ṭhenkhat rintlak lo an si ah teh, ziang a cang ding? Pathian khal an parah rintlak lo a si ve ding maw?

⁴Si hrimhrim hlah! Minung zokhal thuphan pertu an si ṭheh khalle Pathian cu a dikmi le rintlak a si ko ding. Ca Thianghlim in, “Na ṭong tikah, Na ṭongmi cu a dik a si ti langter a si ding ih, Na thu an ṭhen tikah, thu na neh ding,” a ti.

⁵Sikhalsehla kan thil tuah dik lomi hin Pathian ih thil dik a tuahzia fiangtein a langter a si ahcun, ziangso kan sim nawn ding? Pathian in in hrem tikah a palh a si, kan ti ding maw? (Minung daan in ka sim.)

⁶Ti naisai hlah! Pathian cu a dik a si; a dik lo ahcun ziangtinso leilungpi thu a ṭhen thei ding?

⁷Asinain ka dik lonak hin Pathian sunlawinak sawn ah hna a ṭuan ih a diknak kha a langfiangter sawn a si awk ah ziangtin a si ding? Ziangah so kei sawn cu misual tiah mawhthluk ka co thotho?

⁸Ziangah so, “A ṭhami lang dingin a ṭha lomi tuah uhsi,” tiah kan ti lo? A si ngai; mi hrekkhat in cu tivek cekci hi na sim a si tiah thu in puh ih in hmuhsuam. Cubangtuk mi pawl cu mawhphurh tlak an si vekin mawh an phur ding.

⁹Cuti asile, Judah mi kan si hi Zentail mi hnakin ṭhathnemnak a um cuang lo maw? Um hrimhrim hlah! Fiangtein ka langter zo vekin Judah mi siseh Zentail mi siseh, kan zatein sualnak huham hnuai ah kan um ṭheh a si.

¹⁰Ca Thianghlim in: “A dingmi zohman an um lo,

¹¹A fimmi pakhat hman an um lo, Pathian biatu khal an um lo.

¹²An zatein Pathian hnen ihsin an pial thluh ih, zinpeng an zawh ṭheh zo. Zohman thildik a tuahtu an um lo, pakhatte hman an um lo.

¹³An ṭongkam cu thihpi tlakmi bumnak hlir a si; An lei ihsin ṭihnungza thuphan pernak a suak; An hmur ihsin thihsii, rul tur bangtuk a suak.

¹⁴An ṭong cu mi camsiatnak hlir in a khat.

¹⁵Mi tuahmawh ding le mi phil[1] dingah cun an zamrang zet;

¹⁶An fehnak kipah siatsuahnak le cemralnak in a thlun hai.

¹⁷Daihnak lamzin cu an thei dah lo;

¹⁸Pathian ṭihzahnak khal an zir dah lo,” a tivek kha a si.

¹⁹Atu-ah cun Daan sungih thupekmi hmuahhmuah cu Daan hnuai ih a ummi pawl hrangah a si, ti kan thei. Cumi cu zohman in an phet thei lonak dingah le leikhawvel pumpuluk hi Pathian thuṭhennak hnuai ih thlenpi dingah a si, tinak a si.

²⁰Ziangahtile zohman in Daan thlun tahratin Pathian hmaiah thiamconak a ngah thei lo ding. Daan ih hnaṭuanmi cu minung an sual theihternak lawng a si.

²¹Atu cu Pathian in Amah le minung karlakah rualremnak lamzin a langter zo. Cuih remnak lamzin thu-ah Moses Daan le profet pawl kha theihpitu an si naón Daan thawn zianghman a seng aw lo.

²²Jesuh Khrih an zumnak thawngin Pathian in minung thawn remnak a tuah. Khrih a zumtu hmuahhmuah hrangah cuti cun Pathian in a tuah a si; curuangah dan awknak zianghman a um lo;

²³kan zatein misual kan si ṭheh ih Pathian sunloihnak kan co baan lo.

²⁴Sikhalsehla atu-ah cun in luattertu Khrih Jesuh ih tlennak zaar ah Pathian in a zaangfahnak laksawng cu in pek ih Amah thawn rualremnak in tuahsak zo.

²⁵Pathian in Jesuh Khrih ih thisen thawngin misual ngaidamnak kha a tumtahmi a si ih, cuih ngaidamnak cu amah an zumnak thawngin an ngah ding. Pathian in hi bangtuk thil a tuah cu amah ih dingnak langternak dingah a si. Hlanah cun Pathian cu a thin a sau ih minung ih sualnak kha poisa lem loin a rak umsan.

²⁶Sikhalsehla atu-ah cun Amah ih dingnak kha langfiangter dingah minung ih sualnak cu a umsan meen nawn lo; cutiin a dingnak a langter ih Jesuh a zumtu hmuahhmuah cu Amah thawn rualremnak a coter hai.

²⁷Cuti asile ziangtal kan porh awk ding a um maw? Um hrimhrim hlah! Ziangih ruangah so? Daan kan thlun ruangah maw? Si hlah! Kan zum ruangah a si.

²⁸Ziangahtile Daan ih thupekmi thlun ruangah si loin zumnak thawng lawngin minung cu Pathian thawn rualremnak a um a si, tihi kan thu netnak a si.

²⁹Culole Pathian cu Judah mi pawl ih Pathian lawng a si maw? Zentail mi pawl ih Pathian tla a si ve lo maw? A si, Zentail mi pawl ih Pathian khal a si.

³⁰Pathian cu pakhat a si ih Judah mi pawl cu an zumnak thawngin Pathian thawn remawknak a um ding ih Zentail mi pawl khal an zumnak ruangah Amah thawn a rem awter hai ding.

³¹Cuti asile hi zumnak ruangah Daan cu kan hlonta, tinak a si maw? Si hrimhrim hlah! Daan kan hngetter a si sawn.