Read Falam Chin ROM 6 Bible Online

ROM 6 - Falam Chin bible

ROM 6

¹Asile ziangtinso kan ti ding? Pathian ih zaangfahnak karh sinsin seh tiah sual kan tuah vivo hrih ding maw?

²Tuah naisai hlah! Sualnak ah kan thi zo ih ziangtinso a sungah kan um thei nawn ding?

³Khrih Jesuh thawn kan pehzom awknak in a sungih hnimmi kan si tikah a thihnak sung khalah hnimmi kan si tihi nan hngilh maw si?

⁴Baptisma kan lak tikah amah thawn phummi kan si ih a thihnak ah khal kan ṭawm ve; cuvek thotho in Pa ih sunlawinak huham in Khrih kha thihnak ihsin a thawhter bangtuk in kannih khal a thar in kan nung ding.

⁵A thihnak ah khan amah thawn a thi tlang mi kan si ruangah thihnak ihsin thawhter a sinakah khan kannih khal kan tel ve ding.

⁶Kan nun hlun cu Khrih thawn thinglamtah parah khencih a si zo ti kan thei; cumi cu sual in a khatmi kan nunnak hlunih pum cu a siatral ṭheh ding tinak a si. Cutiin sualnak ih sal kan si nawn lo.

⁷Ziangahtile mi pakhat cu a thih tikah sualnak in a parah thu a nei nawn lo.

⁸Khrih thawn kan thih tlang ruangah a nun khal amah thawn kan nung tlang ding tiah kan zum.

⁹Khrih cu thihnak ihsin thawhter a si zo ih a thi sal nawn lo ding, ti kan thei; thihnak cun a parah thu a nei nawn lo.

¹⁰Cule sual thu-ah cun kumkhua daih in a thi ih atu a nun hi cu Pathian ah a nung a si.

¹¹Cuvek ṭhiamṭhiam in nannih khal sual thu-ah cun mithi kan si tiin siseh, nunnak thu-ah cun Khrih Jesuh zaar in Pathian thawn pawlkom in kan nung tiin siseh, ruat aw uh.

¹²Taksa hiarnak kha nan thlun lonak dingah a thi theimi nan taksa pum cu sualnak in uk nawn hlah seh.

¹³Nan taksaṭhen ziangkhal thil ṭha lo sual tuahnak ah nan hmang lo pei. Cuhnakin thihnak ihsin nunnak ih thawhtermi bangin nan ziangzongza Pathian hnenah pe aw sawn uhla nan nunnak zate thawn thil ṭha tuahnak ah hmang sawn uh.

¹⁴Sualnak cu a lo uktu bawi si nawn hlah seh; ziangahtile daan hnuai ah nan nung nawn lo, Pathian zaangfahnak hnuai ah nan nung zo a si.

¹⁵Cuti asile ziangtinso a si ding? Daan hnuai ih um loin Pathian zaangfahnak hnuai ih kan um ruangah sual kan tuah hrih ding maw? Tuah hrimhrim hlah!

¹⁶Nannih in mi pakhatkhat hnenah a sal si dingin le a thu ngai dingin nan pe aw a si ahcun, cuih a thu nan ngaimi cu nan bawi a si ih nannih cu a sal nan si ko; cucu fiang zetin nan thei zo a si. Sualnakih thu nan thlun asile sualnak ih a suahpimi cu thihnak a si ruangah thihnak nan tuar ding; asinain Pathian ih thu nan thlun ahcun Pathian thu thlunih a suahpimi cu remnak a si ruangah Pathian thawn rualremnak nan co ding.

¹⁷Sikhalsehla Pathian hnenah thangṭhatnak um ko seh! Ziangahtile nannih tla cu sualnak ih sal nan rak si dah naón atu-ah cun zirhnak nan ngahmi sungih thudik kha nan thinlung zatein nan thlun zo.

¹⁸Sualnak ihsin luattermi nan si ih dingnak salah nan cang zo a si.

¹⁹(Nan thei thei deuh ding tiah nitin hmanmi ṭong ka hman hi!) A hlanah cun a ṭha lomi tuahnak ah nan taksaṭhen cu a baalmi le a ṭha lomi ih salah nan pe aw. Cuvek ṭhiamṭhiam in atu-ah cun a thianghlimmi tuahnak ah nan taksaṭhen cu a zatein dingnak ih sal si dingin pe aw uh.

²⁰Sualnak ih sal nan rak si laiah cun dingnak ih ukmi nan si lo.

²¹Cutiih sualnak sal nan si ruangah ziangtal hlawknak nan ngah maw? Nan ngahmi cu kha vek thil sual nan tuah ruangah atu ningzakih nan um hi a si. Cubangtuk thil ih hlawhman cu thihnak a si!

²²Sikhalsehla atu-ah cun sualnak ihsin luattermi nan si zo ih Pathian ih salah nan cang zo. Nan hlawkmi cu Pathian hnenih hlanmi nunnak thiang a si ih cumi in a suahpimi cu kumkhua nunnak a si.

²³Ziangahtile sualnak ih hlawhman cu thihnak a si; sikhalsehla Pathian ih laksawng cu kan Bawipa Khrih Jesuh thawn kan pehzom awknak thawngin kumkhua nunnak a si.