Read Falam Chin ROM 7 Bible Online

ROM 7 - Falam Chin bible

ROM 7

¹U le nau pawl, nannih tla cu nan zatein daan thu a theitu nan si ruangah atu nan hnenih ka sim dingmi hi nan theih ciami a si ko. Minung cu an nunsung lawnglawng daan in a uk, ti nan thei ko a si lo maw?

²Tahṭhimnak ah, pasal nei nunau pakhat cu a pasal a nunsung lawnglawng daan in a uk; a pasal a thih asile ṭhit-umnak daan ihsin a luat a si.

³Curuangah a pasal a nung cingin mipa dang thawn an umtlang a si ahcun ṭaangṭawm sualnak tuahtu a si; sikhalsehla a pasal in a thihsan a si ahcun midang a pasal khalle ṭaangṭawm sualnak tuahtu a si nawn lo.

⁴Ka u le ka nau tla, nanmah ih thuhla khalah hin cuvek ṭhiamṭhiam in a si. Daan thu ka rel a si ahcun, nannih cu Khrih ruangpum ih taksa ṭhen nan si zo ruangah a thimi nan si. Asinain atu-ah cun Pathian hrangih rah ṭha nan rah theinak dingah thihnak ihsin thawhter sal a si mi pa ih ta nan si.

⁵Ziangtin tile, kan milai si daan vekih kan rak nun laiah cun kan taksa ih sualhiarnak cu Daan in kan taksa sungah a cangvaiter ih a rah kan ngahmi cu thihnak a si.

⁶Sikhalsehla atu-ah cun Daan ihsin kan luat zo; ziangtin tile salih in rak tuahtu Daan hrangah cun mithi kan si zo. Ca in nganmi Daan hlun hnuai ah si loin Thlarau lamzin tharah Pathian kan rian a si.

⁷Cuti asile ziangtinso kan ti ding? Daan hrimhrim hi sual a si, kan ti ding maw? Ti naisai hlah! Sualnak hi sual a si ti in theitertu cu Daan hi a si. Daan in, “Midang thil daw hlah,” i rak ti hlah sehla midang ih thil dawt cu ziang a si ti ka rak thei lo ding.

⁸Asinain sualnak in cuih thukham cu hmang tahratin ka pumsa sungah duhhiarnak a phunphun a thoter. Daan a um lonak ahcun sualnak cu a thi a si.

⁹Keimah khal hi daan tel loin a nungmi ka rak si; asinain thukham a ra thlen tikah sualnak cu a nung ih kei cu ka thi.

¹⁰Nunnak petu dingah timi thukham cu ka hrangah cun thihnak a si.

¹¹Sualnak in tikcu ṭha a ngah ih thukham cu a hriamhrei ah hmang tahratin i bum ih i that a si.

¹²Cutiin Daan amah ngaingai cu a thianghlim ih thukham khal a thianghlim, a dikmi a si ih a ṭhazet.

¹³Cuti asile a ṭhami cu kei ka thihnak riangri ah a cang, a si maw? Si hrimhrim hlah! Thihnak tuahtu ngaingai cu sualnak a si. Sualnak in sualnak a sizia taktak kha fiangteih langter dingah ṭhatnak kha hmang tahratin thihnak cu ka parah a thlenter. Curuangah thukham in sualnak cu tuksumza sualnak a sizia hi a langter a si.

¹⁴Daan cu thlarau lamih thil a si ti kan thei; asinain kei cu tisa mi ka si ih sualnak ih sal si dingah zuarmi ka si.

¹⁵Thil ka tuahmi hi a tican ka thei ṭheu lo, ziangahtile tuah ka duhmi kha ka tuah lo ih ka duh lomi sawn kha ka tuah.

¹⁶Tuah ka duh lomi ka tuah ruangah Daan cu a dik tiin ka lungkimpi ti a lang.

¹⁷Curuangah hiti ih a tuah rerotu ngaingai hi keimah ka si lo; ka sungih a ummi sualnak a si sawn.

¹⁸Minung ka sinak taktak sungah ṭhatnak zianghman a um lo ti cu ka thei. Ziangahtile a ṭhami tuah duhnak thinlung cu ka sungah um hmansehla a ṭhami ka tuah thei hrimhrim lo.

¹⁹Ka tuah duhmi thil ṭha kha tuah loin ka tuah duh lomi thil sia riangri sawn kha ka tuah a si.

²⁰Tuah ka duh lomi ka tuah a si ahcun a sullam cu a tuahtu kha keimah ka si lo ih ka sungih a nungmi sualnak a si sawn, tinak a si.

²¹Curuangah ka sungih thil a can daanzia cu ka thei - a ṭhami tuah ka duh tikah ka hrilsuakmi cu a ṭha lomi hlir a si.

²²Ka sung muril in Pathian ih daanah cun ka lung a awi.

²³Sikhalsehla ka taksa sungah hna a rak ṭuan vetu daan dang a um; cuih daan cu ka thinlung sungin a ṭha a timi kha a rak dotu daan a si. Cumi cun ka taksa sungih hna a ṭuanmi sualnak ih daan hnuai ah sal bangin i taanter.

²⁴Mi lungrethei ka va si so! Thihnak lamzin a pantu hih taksa pum ihsi hin zoso i runsuak ding?

²⁵Pathian hnenah thangṭhatnak um ko seh: Pathian Amah in kan Bawipa Jesuh Khrih thawng in i runsuak a si. Ka si daan ngaingai cu hiti in a si - Keimahte cun ka thinlung lawngin Pathian daan cu ka thlun; asinain minung ka sinak taktak cun sualnak daan ka thlun a si.