Read Falam Chin 1 KORIN 1 Bible Online

1 KORIN 1 - Falam Chin bible

1 KORIN 1

¹Khrih Jesuh ih a tirhthlah si dingah Pathian lungkimnak in kawhmi keimah Paul le kan unau Sosthenes in,

²Pathian mithiang si dingih kawhmi le Khrih Jesuh thawn nan pehzom awknak thawngin amah ih ta a si mi, Korin khua ih um Pathian kawhhran le an Bawipa le kan Bawipa Jesuh Khrih a biatu hmunkipih a ummi hnenah ca kan lo kuat a si.

³Pathian kan Pa le Bawipa Jesuh Khrih in zaangfahnak le daihnak lo pe hram seh.

⁴Khrih Jesuh thawngin zaangfahnak cu nan hnenih pek a si zo ruangah ka Pathian cu ka thangṭhat ringring.

⁵Ziangahtile Khrih thawn nan pehzom awknak thawngin ziang hmuahhmuah ah tlamtling in pek nan si zo, thusim thiam le theihnak khalah nan famkim ih,

⁶Khrih thuhla kan phuanmi khal nan sungah a hngetkhoh zo ti a lang a si.

⁷A lang dingmi Jesuh Khrih kan Bawipa nan hngah laiah hin nan ngah hrih lomi thlarau lam laksawng pakhatte hman a um lo.

⁸A netnak tiang Amah in a lo kilkhawi hai ding ih cuticun kan Bawipa Jesuh Khrih ih Ni ah mawh nei lo nan si ding.

⁹A Fapa Jesuh Khrih kan Bawipa thawn pawlkomnak nei dingah a lo kotu Pathian cu rinsantlak a si.

¹⁰Ka u le ka nau tla, nan lakih ṭhenṭheknak a um lonak dingah nan thinlung rual awtein um hram uh tiah kan Bawipa Jesuh Khrih hmin in ka lo dil a si. Rualrem zetin, thinlung khat le tumtahnak bangrep in um uh.

¹¹Ka u le ka nau tla, nan lakah tawh awknak a um ringring ti kha Khlawi ih sungkhat pawl in fiangtein in sim.

¹²Ka sim duhmi cu, mi hrekkhat in, “Kannih cu Paul ih lamṭang kan si,” nan ti; mi hrekkhat in, “Kannih cu Apollos ih lamṭang kan si,” nan ti; mi hrekkhat in, “Kannih cu Piter ih lamṭang kan si,” nan ti ih mi hrekkhat in, “Kannih cu Khrih ih lamṭang kan si,” tiah dangdang ciarih nan timi hi a si.

¹³Khrih cu a ṭhenṭhek awmi a si maw? Nan hrangah thinglamtah parih an thahmi cu Paul maw a si? Paul hmin in maw baptisma nan lak?

¹⁴Nanmah lakah Khrispas le Kaias siarlo zohman baptisma ka pek hai lo ruangah Pathian ka lawm.

¹⁵Curuangah zohman in, “Kei cu Paul hmin in baptisma ka la,” nan ti thei lo ding.

¹⁶(Asi, Stefanas le a innsang baptisma ka pe ngai; midang ka pek cu ka thei lo.)

¹⁷Khrih in midang baptisma pe dingah i thlah lo, Thuthang ṭha sim dingah i thlah ih cutiih ka sim tikah milai fimnak ṭongkam hmang in a si lo; ziangahtile leilung fimnak ṭongkam hmang tahratin ka sim ahcun Khrih thinglamtah parih a thihnak hi hmual a nei lo pang ding.

¹⁸Thinglamtah parih Khrih thihnak thu hi a hloral cuahcomi pawl hrangah cun aat-hna meen a si; sikhalsehla rundam lai reromi kannih hrangah cun Pathian ih cahnak hmual a si.

¹⁹Ca Thianghlim in, “Mifim pawl ih fimnak cu ka siatsuah ding ih, Mithiam pawl ih thiamnak cu ka hnong ding,” a ti.

²⁰Curuangah mifim pawl khuiah so an um? Mithiam pawl khuiah so an um? Leilung tlun thu-el thiam pawl khuilamah so an si? Leilung tlunih fimnak hi aat-hna a si, ti kha Pathian in a langter zo a si lo maw?

²¹Minung in anmah ih fimnak in Pathian an theih thei lonak dingah amah Pathian in a fimnak in a rak tuah cia zo a si. Sikhalsehla kan phuan mi “aat-thu,” an timi Thuthang ṭha hi hmang tahratin a zumtu pawl rundam dingah Pathian ih tuahmi a si.

²²Judah mi pawl in a dik le dik lo theih theinak dingah hmuhsaknak mak hmuh an duh; Grik mi pawl cun fimnak sawn in an hawl.

²³Asinain kannih cun thinglamtah ih an khenmi Khrih kan phuang ih cuih thu cu Judah mi pawl hrangah rilhbahnak a si ih Grik mi hrangah cun aat-hna a si.

²⁴Sikhalsehla Pathian ih a kawh ciami pawl hrangah cun Judah mi siseh Zentail mi khal sisehla, cuti kan phuan mi cu Khrih a si ih Khrih cu Pathian cahnak le Pathian fimnak a si.

²⁵Ziangahtile Pathian aatnak cu minung ih fimnak hnakin a fim sawn; cule Pathian ih ṭonṭaihnak cu minung ih cahnak hnakin a cak sawn.

²⁶Ka u le ka nau tla, Pathian in a lo kawh laiah khan ziang bangtuk minung nan rak si kha ciing ringring uh. Milai mit ih kan zoh ahcun mifim le thuneitu le hmaizah tlak cu mi malte ngaingai nan si.

²⁷Sikhalsehla mifim pawl ningzahter dingah leilungih mi-aa timi kha Pathian in a hril hrim a si; micak le thiltithei pawl ningzahter dingah leilungih mi ṭawnṭai timi kha Pathian in a hril hrim a si.

²⁸Leilung mi in thupizet ih an ruahmi kha siatsuah dingah an hmuhsuammi, an nautatmi le zianghman ih an siar lomi kha Pathian in a hril hrim a si.

²⁹Cuti a si ruangah Pathian hmaiah cun zohman an uang aw thei lo ding.

³⁰Khrih Jesuh thawn pehzom aw ih nan nunnak ahhin a hram a thoktu cu Amah Pathian a si ih Amah hnen ihsin Khrih cu kanmah ih fimnak ah a tuah a si. Khrih thawngin kannih cu Pathian thawn kan rem aw zo; Pathian ih mithiang ah kan cang zo ih a luatmi kan si zo.

³¹Curuangah Ca Thianghlim in, “Zokhal a uar awtu cun Bawipa ih tuahmi lawngah uar aw seh,” tiah a ti