Read Falam Chin 1 KORIN 14 Bible Online

1 KORIN 14 - Falam Chin bible

1 KORIN 14

¹Nan tumtah bik dingmi cu duhdawtnak hi a si. Asinain Thlarau laksawng dangdang khal nan tumtah dingah an um ih culak ih nan duh bik dingmi cu profet thusim thiamnak laksawng a si.

²Theih lo ṭong ih a ṭongtu cun minung hnenah a ṭong lo, Pathian hnenah a ṭong a si, ziangahtile a ṭongmi kha zohman in an theihsak lo. Thlarau thawngin zohmanih theih lomi thu a ṭong a si.

³Sikhalsehla profet thu a simtu cun minung hnenah a ṭong, cule mi bawmtu ah a cang ih tha-thawhnak le hnangamnak an ngah.

⁴Theih lo ṭong ih a ṭongtu cun amah le amah lawng a bawm aw; asinain profet vekih thu a simtu cun kawhhran pumpi kha a cawmdawl.

⁵Nan zatein theih lo ṭong ih nan ṭong ding cu ka duh ko; asinain profet bangtuk thusimnak laksawng nan ngah ding cu ka lo duhsak sinsin. Ziangahtile theih lo ṭong ih ṭong hnakin profet vekih thusim cu man a nei deuh ngaingai. An ṭongmi kha a let theitu an um ih kawhhran pumpi kha a cawmdawl ti dah lo ahcun theih lo ṭong cun profet thusim thiamnak cu a tluk lo a si.

⁶Curuangah u le nau tla, nan hnenih ka rat tikah theih lo ṭong in ra ṭong ningla nan hrangah ziangtal a ṭhahnem ding maw? ṭhahnem hlah! Pathian hnen ihsin thuphuanmi maw, a si lole theihnak pakhatkhat maw, a si lole profet thusimnak maw, a si lole zirhnak pakhatkhat maw, ka rak ken thei lo ahcun nan hrangih ka ṭhathnemnak ding zianghman a um lo ding.

⁷Nunnak a nei lo naón a aw a suakmi awnmawi lemlawi siseh, ṭingṭang khal siseh, vun ruat hnik uh; an tummi aw kha fiangfai zetih a suah lo ahcun zo in so ziang aw an tum ti a theih thei ding?

⁸Raldo timtuahnak tawtawrawt a phawtu pa in a tawtawrawt kha fiangteih a phawt lo ahcun zoso ral do dingah a tim a tuah ding?

⁹Cuvek thotho in nan ṭongmi kha theih lo ṭong a si ih zianghman a fiangmi a um lo ahcun zo in so an theih ding? Nan ṭongmi cu thli lakah a hlota meen a si.

¹⁰Leilung pumpuluk ah ṭong dangdang tampi an um; asinain tican nei lo ṭong pakhat hman a um lo.

¹¹An ṭongmi aw kha a tican ka theih thei lo ahcun cutiih a ṭongtu cu ka hrangah ṭong theih lo mikhual a si ih kei khal a hrangah ṭong theih lo mikhual ka si ve.

¹²Thlarau laksawng co ding cu nan duhzet ruangah ziang dang hnakin kawhhran a tungdingtu laksawng kha nan duh cuang dingmi a si.

¹³Theih lo ṭong ih a ṭongtu in a ṭongmi a leh theinak dingah thla cam seh.

¹⁴Cubangtuk theih lo ṭong in thla ka cam ahcun ka thlarau cu thla a cam ko naón ka thinlung cu cutawkah a tel lo.

¹⁵Cuti asile ziangtinso ka tuah ding? Thla ka cam tikah thlarau in ka cam ding ih ka thinlung khal in ka cam ding. Hla ka sak tikah thlarau in ka sak ding ih ka thinlung khal in ka sak ding.

¹⁶Na thlarau lawng thawn Pathian hnenah lungawi thu na sim tikah ziangtinso khawmnak ih a rami mimenmen in na lungawi thusimmi ahcun “Amen” tiah an lo ti sak thei ding? Na ṭongmi cu a tican zianghman an theih ual lo.

¹⁷Pathian hnenih na lungawi thusimmi cu a ṭhazet ko ding naón midang bawmtu cu a si hrimhrim lo.

¹⁸Nanmah hnakin theih lo ṭong tam sawn ka ṭong ruangah Pathian ka lawmzet a si.

¹⁹Sikhalsehla Pathian biaknak hmunah cun midang zirhnak hrangah theih lo ṭong ih ṭongkam thawnghra ṭong hnakin theihmi ṭongfang panga ka ṭong sawn ding.

²⁰Ka u le ka nau tla, nan thuruahnak ahhin nauhak bangtuk in um hlah uh. Thil ṭha lo tuahnak lamah cun nauhak bangtuk si uh; sikhalsehla nan thuruahdanah cun mi pitling si uh.

²¹Ca Thianghlim sungah, “Ka minung pawl hnenah ṭong phun dangdang a ṭongtu pawl hmang tahratin ka ṭong ding; Ramdang mi pawl ih hmurka hmang tahratin an hnenah ka ṭong ding; Sikhalsehla ka minung pawl cun ka thu an ngai cuang lo ding; tiah Bawipa in a ti,” tiah ngan in a um.

²²Cuti a si ruangah theih lo ṭong ih ṭong theinak laksawng cu zum lotu pawl hrangah hmuhsaknak a si. Profet thusim thiamnak laksawng cu a zum lotu pawl hrang si loin a zumtu pawl hrangah theihthiamnak a si.

²³Cun kawhhran mi nan pumkhawm tikah a khawmmi pawl nan zatein theih lo ṭong in nan ṭong ṭheh tibang sehla culaifang ah minung hrekkhat, a si lole Pathian zum lotu pawl rung lut hai sehla an aa a sihi an lo ti lo ding maw?

²⁴Asinain nan zatein profet bangin Pathian thu nan phuang ih culaifang ah mi pakhatkhat, a si lole Pathian zum lotu rung lut sehla nan thusimmi in a thinlung a khoih ding ih a sualnak khal a thei aw ding.

²⁵A thupte ih a ruahmi thil pawl an lang deuhdeuh ding ih anih khal a cuih hmun in Pathian a bia ve ding; cule “Nan hnenah Pathian a um ngaingai a si,” tiah a ti ding.

²⁶Ka u le ka nau tla, ka sim duhmi cu hiti in a si: Nan khawm-awk tikah mi pakhat in hlasak a duh ding, a dang in thuzirh a duh ding, a dang pakhat in Pathian hnenin thuphuanmi a nei ding, a dang pakhat in theih lo ṭong in ṭong a duh ding ih a dang pakhat lala in theih lo ṭong ih ṭongmi kha a tican leh a duh ding. Ziangbangtuk a si khalle kawhhran cawmdawlnak hrang lawngah tuah siseh.

²⁷Mi in theih lo ṭong in an ṭong duh a si ahcun a tam bikah mi pahnih asilole pathum tiang lawng ṭong hai seh; cu khalah a sangsang in ṭong hai sehla an ṭongmi a lettu um hai seh.

²⁸Sikhalsehla ṭong lettu zohman an um lo a si ahcun theih lo ṭong ih a ṭongtu cu daitein um sehla amah le Pathian hnen lawngah ṭong seh.

²⁹Profet bangin thusim thiamnak a ngahtu pahnih thum sawn in thusim hai sehla midang in an thusimmi a ṭhat le ṭhat lo rak ngai hai seh.

³⁰Asinain a khawmmi lakih pakhatkhat in Pathian hnen ihsin thusim ding a ngah a si ahcun thu a sim rerotu cu cawl hrih seh.

³¹Nan zate hman in Pathian thu cu a sangsang in nan sim thei; cuticun zozo khal an zir fingfing ding ih thacahnak an ngah fingfing ding.

³²Profet thusim thiamnak laksawng a ngahtu in a simmi thu cu luanter loin a uk thei a ṭul a si,

³³ziangahtile Pathian cu buainak le hnahnawhnak Pathian a si lo; remnak le daihnak Pathian a si. Pathian kawhhran in hmun kipih an tuah ciarmi a si bangtuk in,

³⁴pumkhawmnak ah nunau pawl cu daitein um hai seh. Thusim theinak thu an nei lo; Judah Daan ih a ti vekin hotu khal an si lo pei.

³⁵Thu pakhatkhat an thei duh asile an inn ah an pasal sut hai seh. kawhhran an pumkhawmnak ah nunau ih thusim cu ningzakza a si.

³⁶Pathian ih thu hi nan hnen ihsin a thok maw si? Nanmah ih hnen lawngah Pathian thu hi a thleng maw si? A si lo!

³⁷Mi pakhatkhat in Pathian ih profet ka si tiah a ruat aw, a si lole thlarau laksawng ka ngah tiah a ruat aw a si ahcun, hiti in nan hnenih ka ngan mi hi Bawipa ih thupek a si, ti kha a theih ṭulmi a si.

³⁸Sikhalsehla himi hi zianghman ih a siar lo a si ahcun amah cu zianghman ah siar ve hlah uh.

³⁹Curuangah u le nau tla, profet thusim thiamnak cu duh uh; asinain theih lo ṭong ih ṭong khal kham hlah uh.

⁴⁰Ziang hmuahhmuah cu rualremte le zoh mawite in tuah ding an si.