Read Falam Chin 1 KORIN 16 Bible Online

1 KORIN 16 - Falam Chin bible

1 KORIN 16

¹Judea ramih a ummi Pathian zumtu pawl hrang paisa thawh ding thu ca nan nganmi thu-ah cun: Kalati kawhhran pawl hnenih thu ka cahmi vekin rak tuah uh.

²Nipi ni tinin nan ngahmi a tam le a mal thlunin paisa rak thawh fingfing uhla rak khawl cia uh; cuticun ka ra thlen tikah paisa thawh a ṭul nawn lo ding.

³Ka ra thlen hnuah nan hrilmi pawl kha an kutah ca ka ken ding ih cutiin Jerusalem ah nan laksawng cu an vun phur ding.

⁴Ka feh man a um ding a si ahcun kan feh tlang leh ding.

⁵Masidonia ramsung feh phah ding ka si ruangah, cutiih ka feh hnuah nan hnen ka ra thleng leh ding.

⁶Nan hnenah tikcu tawkfang ka ra hmang ding; thlatang sung hmuahhmuah tla a si thei meen; cuih hnuah khual ka tlawnnak ding cu khuitawk lam a va si hmanah in ngaihtuah bawm leh ding.

⁷Rak pal phah meen si loin, Bawipa ih khawkhannak a si ahcun, nan hnenah tikcu tawkfang hman ka duh.

⁸Hitawk Efesa khua ah hin Pentikos ni tiang ka um ding.

⁹Dodaltu tampi an um naón hitawk ahhin a ṭhahnemmi hnaṭuan theinak a um.

¹⁰Nan hnenah Timote a ra thlen asile ṭihnak nei lo dingin rak zoh uh, ziangahtile anih khal keimah vekin Pathian hrangah hnaṭuantu a si.

¹¹Zohman in rak nautat hlah uh; hnangamte in ka hnenih a ra thlen theinak dingah a khualtlawnnak ah khan rak bawm uh. Hitawkih a ra thlen ding cu zumtu unau pawl thawn kan hngakhlap zet a si.

¹²Kan unau Apollos ih thu-ah cun: unau dang pawl thawn nan hnen ra tlawng dingin ka forh ciamco ṭheu naón atuih rat ding cu a lung a kim thei hrih lo.[3] A remcaan deuh tikah a ra leh ding.

¹³Fimkhurte in um uh, nan zumnak sungah hngetzet in ding uh; ral ṭha le cakzetin um uh.

¹⁴Thil nan tuahmi hmuahhmuah kha duhdawtnak thawn tuah uh.

¹⁵Stefanas le a innsang pawl cu nan theihmi an si. Anmah cu Akhaia peng sungah Khristian hmaisa bik an si ih Pathian minung pawl hrangah an thinlung le an thazaang zatein an pek. Ka u le ka nau tla,

¹⁶anmah siseh, an hnaṭuanpi pawl siseh, mi an hruai daan hi thlun hram uh tiah ka lo forh.

¹⁷Stefanas le Fortunatas le Akhaikas an ra thlen ruangah ka lung a awi; nanmah nan um lo khal ka thei tuk lo.

¹⁸Nan thin an lo nomter vekin kei khal ka thin in nuamter ve. Hi bangtukmi cu lom tlak an si.

¹⁹Asia ramih kawhhran pawl in cibai an lo buk; Aquila le Prisilla le an inn ih a khawm-awmi kawhhran in Khristian duhdawtnak thawn cibai an lo buk.

²⁰Hitawkih unau pawl in cibai an lo buk a si. Pakhat le pakhat hnamnak thianghlim thawn cibai buk aw uh.

²¹Hitiin Keimah Paul in cibai ka lo buk a si timi hi ka kut rori in ka ngan a si.

²²Zokhal Bawipa a duhdaw lotu cu a parah siatcamnak thleng seh. Maranatha:[4] Kan Bawipa, ra thlang aw.

²³Bawipa Jesuh ih zaangfahnak cu nan hnenah um hram seh.

²⁴Khrih Jesuh thawngin ka duhdawtnak cu nan zate parah um ko seh. Amen.