Read Falam Chin 1 KORIN 5 Bible Online

1 KORIN 5 - Falam Chin bible

1 KORIN 5

¹Khawvel mi pawl hmanih ningzakza an timi nupa sualnak le hurnak cu nan lakah a um an ti ka thei. Mi pakhat tla cu a nu-ei thawn an pawl-aw tiah in sim.

²Nanmah cu nan va puarthau hrih lai sapbai! Riahsia in um ding nan si sawn lo maw? Cubangtuk milai cu nan bu sung ihsin nan suah dingmi a si.

³Ka taksa pumpi cu lamhla ah ka um naón ka thinlung cu nan hnenah a um ih cubangtuk thilsual a tuahtu parah cun, nanmah lakih a um taktakmi vekin Bawipa Jesuh hmin in thu ka ṭhen zo a si.

⁴Hmun khatih nan pumkhawm tikah kan hnenih a ummi kan Bawipa Jesuh ih huham thawngin nan lakah ka thinlung in ka lo umpi ve ih,

⁵hi pa cu Bawipa ih Ni ah a thlarau rundam suak a si theinak dingah a pumsa cu siatsuah si dingin Satan hnenah pe uh.

⁶Mihngal nan si hi a dik hrimhrim lo. Ṭongṭhimnak ih, “Thilnu malte in sanghlom zate in a thoter ṭheh,” ti nan thei dah a si lo maw?

⁷A thiangfaimi si dingah nan lakih a ummi thilnu hlun sualnak cu hlon ṭheh uh. Cuticun thilnu tel loin rawh tharmi sanghlom ah nan cang ding; nannih cu thilnu tel lo sanghlom nan si ti ka thei. Kan Lantak Puai tuufa a si mi Khrih cu raithawinak ih pek a si zo ruangah kan Lantak Puai cu a thok zo a si.

⁸Curuangah kan Lantak Puai cu thilnu hlun sualnak le ṭhatlonak thawn rawicih mi sanghlom thawn si loin thilnu tel lo thianhlimnak le thutak sanghlom thawn tuah uhsi.

⁹Nan hnenih ka rak nganmi ca sungah nupa sualnak tuah ih mi sualral pawl thawn kom aw hlah uh, tiah ka lo sim zo.

¹⁰Cuti ka lo ti hai tikah khawvel mi: mi sualral pawl, hamṭam pawl, rukru pawl le milem bia pawl kha kom hlah uh, ka ti duhmi a si lo. Annih pawl thawn kom awk lo ding ti a si ahcun hi leilung hi nan taansan lawlaw a ṭul ding a sisi!

¹¹Zokhal zumtu ti aw si ih nupa sualnak tuahtu pawl, hamṭam pawl, milem bia pawl, mi thangsiat duh pawl, zuri pawl le rukru pawl ka ti duhnak a si. Cubangtuk mi sualral pawl thawn cun rawl ei dingah a to hman to tlang hlah uh.

¹²Thungai in tile a lenglam mi thuṭhensak ding cu ka hnaṭuan a si lo. A lenglam mi cu Pathian in an thu a ṭhen ding.

¹³Sikhalsehla nan bu sungmi pawl cu an thu nan ṭhensak ding a si lo maw? Ca Thianghlim in, “Nan bu sung ihsin mi sualral pawl cu suah uh,” a ti.