Read Falam Chin 1 KORIN 7 Bible Online

1 KORIN 7 - Falam Chin bible

1 KORIN 7

¹Atu cu ca thawn in rak sutmi thu ka sim ding. Mipa cu nupi ṭhi loin a um le a ṭha.[2]

²Asinain nupa sualnak a tam ruangah mipa in amah ih nupi lawng nei sehla, nunau khal in amah ih pasal lawng nei seh.

³Mipa in pasal a sinak ṭuanvo cu kimter sehla nunau khal in nupi a sinak ṭuanvo cu kimter ve seh; an pahnih in an ṭulnak fingfingah diriamter ton-aw hai seh.

⁴Nupi in amah ih taksa ruangpi hi a uk lo, a pasal in a uk; cuvek thothoin pasal in amah ih taksa ruangpi hi a uk lo, a nupi in a uk a si.

⁵Caan tawite sung thlacamnak ka duh tiah nan lung a kim tlaang hmasa ti dah lo ahcun khat le khat nan duh hiarnak kha el aw hlah uh. Cu ṭheh hnuah nupa in um sal uh. Cuti a si lole suup awk thei lo ruangah Satan sual thlemnak sungah nan tla pang ding.

⁶Hitiin ka ti tikah thukham ka lo pek hai a si lo, nanmah ruah ah ka timi a si.

⁷Thungai ih ti ahcun nan zatein keimah vek hin um uhla ka duh; sikhalsehla Pathian hnen ihsin kan ngahmi laksawng cu an dang aw fingfing a si.

⁸Cule atu cu nupi le pasal nei hrih lo le nuhmei pahmei pawl hnenah ka sim duhmi cu: keimah vek hin nanmah lawngte in hmei uhla ka duh.

⁹Sikhalsehla nan duhnak nan suup thei lo ahcun nupi pasal nei ko uh: nupi pasal neih cu taksa hiarnak thawn um ringring hnakin a ṭha sawn.

¹⁰Nupi pasal a neitu pawl hnenah keimah ih thupekmi si loin Bawipa ih thukham ka lo pek hai: nupi in a pasal kha a taan lo pei.

¹¹A taan asile amah lawngin hmei seh; cutiin a si lole a pasal thawn rem-aw sal seh. Cule pasal in a nupi maak hlah seh.

¹²A dang pawl hnenah (Bawipa ih thupekmi si loin keimah ih timi) ka sim duhmi cu: Khristian in Pathian zum lo nupi a ṭhit ih cuih a nupi cun amah thawn umtlang ding a duh ko a si ahcun maak hlah seh.

¹³Cule Khristian nunau pakhat in Pathian zum lo pasal a nei ih cuih a pasal in amah thawn umtlang ding a duh ko a si ahcun a taan lo pei.

¹⁴Ziangahtile a nupi thawn an kom awk ruangah cuih Pathian thei lo pasal cu Pathian hnenah cotlakmi ah a cang; cuvek thotho in Khristian pasal thawn an pehzom awk ruangah Pathian thei lo nupi cu Pathian hnenah cotlakmi ah a cang. Cutiin si lo sehla an faale pawl cu khawvel faale ah an cang ṭheh ding; sikhalsehla atu-ah cun Pathian cotlakmi an si.

¹⁵Cule Pathian zum lo nupi maw pasal maw in Khristian nupi maw pasal maw kha a ṭhen duh a si ahcun ṭhen-aw ko hai seh. Cuvek ahcun Khristian nupi maw pasal maw cu a luat, kham ding zianghman a um lo. Remte ih um dingah Pathian in a lo ko a si.

¹⁶Khristian nunau, ka pasal ka runsuak thei hrimhrim lo ding tiah ziangtinso na ti thei? Khristian mipa, ka nupi ka runsuak thei hrimhrim lo ding, tiah ziangtinso na ti thei?

¹⁷Zokhal Pathian laksawng nan ngahmi vekin le a lo kawh laiih nan sidaan vekin um ko uh. Cubangtuk in kawhhran dangdang khal ka zirh.

¹⁸Pathian kawhnak kha serhtanmi pa in a pom a si ahcun a serhtannak hmaphe kha hlo dingin ngaihtuah duh hlah seh. Pathian kawhnak kha serhtan lomi pa in a pom a si ahcun a serh kha tan duh hlah seh.

¹⁹Ziangahtile serhtan le tan lo kha a thupi nawn lo; a thupimi cu Pathian thukham thlun kha a si.

²⁰Zozo khal Pathian kawhnak nan rak cohlan laiih nan sidaan vek khan um ko uh.

²¹Pathian ih a lo kawh laiah sal nan si maw? Nan va si taak khalle poisa duh hlah uh! Asinain miluat sinak caan ṭha nan ngah ahcun luat tum ve mai uh!

²²Ziangahtile Bawipa ih kawhmi sal cu Bawipa ih miluat a si. Cuvek thotho in miluat cia Khrih ih a kawhmi cu Khrih sal a si.

²³Man pekin Pathian ih leimi nan si; curuangah milai ih salah cun cang nawn hlah uh.

²⁴Ka u le ka nau tla, Pathian in a lo kawh laiih nan umdaan vek thotho in Pathian thawn pawlkomnak sungah um ko uh.

²⁵Nupi pasal a nei hrih lomi pawl thu-ah cakuat in in sutmi thu-ah cun Bawipa ih thupekmi ka nei lo; asinain Bawipa ih zaangfahnak thawngin rinsantlak a si mi keimah in ka pumpak ruahmi ka lo sim hai.

²⁶Atuih harsat caan ruah tikah hin mipa cu tuihhlan a um keel vekin um sehla a ṭha tiah ka ruat.

²⁷Nupi na nei zo maw? Na nei zo asile maak tum hlah. Nupi nei hrih lo na si maw? Na si le nupi hawl duh hlah.

²⁸Sikhalsehla nupi na nei a si ahcun na sual lo; fala khal in pasal a neih le sualnak tuah a si lo. Asinain nupi pasal nei pawl ih nitin an ton mi phurrit ihsin nan luat ding ka duh a si.

²⁹Ka u le ka nau tla, ka sim duhmi cu hihi a si: caan a rei nawn lo ding ruangah atu ihsi thokin nupi nei pawl in a nei lo vekin nung hai seh;

³⁰a ṭapmi pawl in riahsia lo vekin um hai seh; a hni pawl in lungawi lo vekin um hai seh; thil lei pawl in an leimi kha anmah ih ta si lo vekin um hai seh;

³¹leilung thilri a ngaihtuahtu pawl in leilung thilri lawng a buaipi lo vekin um hai seh. Ziangahtile hi leilung hi atu vek a si ahcun rei a awh nawn lo ding.

³²Thinlung donharnak in luat uh ti ka lo duhsak a si. Nupi nei lo pa cun Bawipa ih lungawinak lawng kha a tummi a si ruangah Bawipa ih hnaṭuannak lawng kha a ngaihtuah.

³³Asinain nupi nei pa cun a nupi lungawinak kha a duh ruangah leilung thilri thu kha a ngaihtuah;

³⁴cuticun amah cu kap hnih ah a dir-aw a si. Pasal nei lo nunau, a si lole fala pawl cun Bawipa ih hnenah an taksa le an thinlung pek an duh ruangah an thinlung taktein Bawipa ih hna cu an ṭuan; asinain pasal nei nunau cun a pasal lungawiter a duh ruangah leilung thilri ah a buaipi a si.

³⁵Hitiih ka tinak cu nan hrangih ṭhathnemnak ka duh ruangah a si. Kham ka lo duh ciamco hai ruangah a si lo. A ṭhami le a mawimi nan tuah dingah ka duh ih zianghman suupmi nei loin Bawipa ih hnaṭuannak ah nan ziangzongza pe thluh uhla ka duh a si.

³⁶Ṭhi aw dingin a ham aw ciami fala kha kan ṭhi aw sal lo ding, a titu-ih thu ahcun hiti in um hai seh: mipa in a fala parah zoh rem loin ka um, tiah a ruat aw ih a taksa duhnak kha a cah tuk ruangah kan ṭhi aw sawn pei tiah a ruah a si ahcun a duh vek cun ṭhi-aw ko hai seh. Sualnak a si lo.

³⁷Sikhalsehla mipa in zohmanih hneek loin, a ruat ciamciam hnuah ṭhi lo dingin a thinlung a ṭhen ngah ih a duhnak thinlung ṭhatein a uk aw thei ih a tuah dingmi le a thlun dingmi pawl ṭhatein a ruahcat ngah a si ahcun a fala cu ṭhi loin a um le a ṭha ko.

³⁸Curuangah nupi a ṭhitu in thil ṭha a tuah; asinain a ṭhi lotu in thil ṭha sinsin a tuah a si.

³⁹Pasal nei nunau cu a pasal a dam sungah cun a luat lo. Asinain a pasal a thih a si ahcun a duhmi pasal nei dingah miluat a si; sikhalsehla Bawipa ih hmin lawngin tuah ding a si.

⁴⁰Hi khal ahhin amah lawngte in um sehla a nuam deuh ding tiah ka ruat; hiti in ka ti tikah Pathian Thlarau ka nei ve tiah ka ruat aw.