Read Falam Chin 2 KORIN 11 Bible Online

2 KORIN 11 - Falam Chin bible

2 KORIN 11

¹Ka aat deuh hmanah a zawizia in thiam dingah ka duh! I zawi hrih hram uh!

²Pathian in a lo thiik bangin kei khal in ka lo thiik ve a si. Nannih cu Khrih amah thawn lawng ṭhi-aw dingah ka ham ciami fala thiang bangtuk nan si.

³Ka phan mi cu: rulpi in a depdetnak in Evi a thlem ngah bangin nan thinlung ṭhat lonak in a lo thlem ding ih kimzet le thiang zetih Khrih nan thlunnak hi nan tanta pang ding tihi a si.

⁴Ziangahtile kannih ih kan phuanmi Jesuh si loin Jesuh dang deuh thu a phuangtu nan hnenih an rat khalah lungawi thatho zetin nan rak zawi thei. Kan hnen ihsin nan ngah ciami Thlarau le Thuthang ṭha si loin thlarau dangpi le thuthang dangpi an ra sim tik khalah nan rak pom vivo fawn ruangah a si.

⁵Nannih in, “Tirhthlahmi hleice” tiah nan timi pawl hnakin malte hman niam cuangin ka ruat aw ve lo.

⁶Thusim lamah cun a thiam lo khal ka si ding; sikhalsehla theihnak lamah cun ka niam cuang hrimhrim lo. Ziangtik khalah le zo hnen khalah hi thu cu fiang zetin kan lo sim a si.

⁷Pathian Thuthang ṭha nan hnenih ka sim tikah sim man zianghman ka la lo. Nanmah sawn thupitter duh ah kei cu hnuai ah ka thla aw. Cutiih ka um cu ka mawh maw?

⁸Nan hnenih hna ka ṭuan laiah khan kawhhran dangdang in in cawm. Nanmah bomnak ah an thilri ka long ka ti pei cu!

⁹Cule nan hnenih ka um sungah khan paisa hman ding ka ṭulzet khalle nannih cu ka lo hnaihnok lo; Masidonia ihsin a rungmi kan unau pawl in ka poihaimi hmuahhmuah in run suum ṭheh a si. Tuihhlan vek thothoin hmailam khalah nan phurh lo rittertu cu ka si lo ding.

¹⁰Hitiih ka porh awknak hi Akhaia peng sung khuazakip ah zohman in an daiter lo ding tiin ka sungih a ummi Khrih ih thutak in ka kam a si.

¹¹Ka lo duhdawt lo ruangah hiti in ka ṭong a si maw? Ka lo duhdawt ti cu Pathian in a thei ko.

¹²Tirhthlah kan si ve a ti awmi pawl in, “Anmah vek thothoin hna kan ṭuan ve a si,” tiah an porh awk thei lonak dingah atu ka tuahmi hi pehzom in ka tuah vivo ding.

¹³Annih tla cu tirhthlah taktak an si lo, tirhthlah deu an si. An hnaṭuanmi thu-ah thuphan an per ih Khrih tirhthlah ngaingai bangin an ti awter.

¹⁴Cumi cu mangbang ding zianghman a um lo; Satan hmanin tleunak vancungmi bangtuk in a tuah aw thei a si.

¹⁵Curuangah Satan hnaṭuantu a hnen-um pawl khal in dingnak hnaṭuantu pawl vekin an tuah awkter a si khalle an hrangah thil olte a si. A netnak ahcun an hnaṭuan daan vekin an tuar leh ko ding.

¹⁶Ka nolh sal ding: zohman in miaa ah i ruat hlah hai seh. Asinain nannih in in ruat asile mi aa vekin i cohlang uhla malte tal ka porh aw thei ve ding.

¹⁷Hi bangtuk ih ka ṭongmi hi Bawipa in i ṭongter duhmi an si lo; porh awknak thu-ah cun mi aa vekin ka ṭong a si.

¹⁸Sikhalsehla milai tisa thu-ah a porh awmi an tamzet ruangah hin kei khal ka porh aw ve ding.

¹⁹Nannih cu mifim zet nan si ruangah mi aa pawl nan zawi thei!

²⁰Amah ih thuthu in nunter a lo duhtu, a lo bum ih a lo hlawktu, thang in a lo awktu, a lo hmuhsuamtu le nan biang a lo bengtu pawl khal nan zawi thei!

²¹Kannih pawl cu kan ṭih a hrut tuk ih cubangtuk cun kan tuah ngam ve lo tiih phuan ding hi ka ning a zak. Sihmansehla zokhal thil pakhatkhat thu-ah a porh awk ngam a si ahcun, kei khal mi aa bangin ka ṭong ding, amah tluk tein ka ral a ṭha ve ding.

²²Hebru mi an si maw? Kei tla ka si ve. Israel mi an si maw? Kei khal ka si ve. Abraham ih tefa sin an si maw? Kei khal ka si ve.

²³Khrih riantu an si maw? Kei hi miaa ka bang, asinain thungaite in annih hnak cun Khrih riantu ṭha ka si sawn. Annih hnakin ka hnaṭuan a khung sawn; voi tam sawn thawng thlakmi ka si; voi tamsawn vuak ka tong, cule voi tampi thi dok nungngaan in ka tuar.

²⁴Judah pawl in voi sawmthum le voikua in ṭum nga rori in thawi.

²⁵Rom mi pawl in voithum in thawi, cule lungto dennak voikhat ka tuar. Tangphawlawng siat voithum ka tong, voikhat tla cu nazi kul hluanli sung tifinriat parah ka taang.

²⁶Voi tampi khual ka tlawnnak ah tilik le suamhmang ruangah thinphannak ka tong ih ka phunpi Judah mi hnen in le Zentail mi hnen khalin ṭihnungza ka tong. Ṭihnungza a phunphun khawpi sungah le hramlakah siseh, tifinriat parah le rualpi deu ka neihmi hnenin siseh ka tong ringring.

²⁷Hnaṭuan khung cat loin a um ih voi tampi ihnak caan nei loin ka um; rilrawng le tihal in ka um; voi tampi beunak nei lo, ei ding rawl khopkham nei lo le hnipuan nei loin ka um.

²⁸Cule thildang thu rel loin kawhhran zawn ka ruahnak hrimhrim in nitin thilrit bangin i nen.

²⁹Mi pakhatkhat a ṭawnṭai asile kei khal ṭawnṭai in ka thei aw ve; pakhatkhat sualnak sungih a bah asile thinharnak in ka khat.

³⁰A porh aw ding ka si ahcun ka derdainak a langtertu thil parah ka porh aw ding.

³¹Bawipa Jesuh ih Pa le a Pathian kumkhua in a hmin cu thangṭhat si ko seh; Amah in thuphan ka per lo ti a thei.

³²Damaskas khawsungih ka um laiah Siangpahrang Aretas kuthnuai ih mangki bawi in khawpi kulhnak kotka kipah keimah kai dingin palik a ret.

³³Sikhalsehla ong pakhat ihsin a lengah bawm in in thlak ih cutin ka luat.