Read Falam Chin 2 KORIN 3 Bible Online

2 KORIN 3 - Falam Chin bible

2 KORIN 3

¹Hitiih kan ti tikah mah le mah porh-aw kan bang sal pei maw? Mi ṭhenkhat vekin nan hnenah siseh, a si lole nan hnen ihsin siseh, lungkimpinak caken kan ṭul ve a si pei maw?

²Caken dang kan ṭul lo, nanmah hi kan ca nan si; mi hmuahhmuah theih ding le siar dingin kan thinlung ih nganmi ca nan si.

³Hi ca a ngantu cu Khrih amah a si ih kannih hi a phurtu kan si. Cuih ca cu cati in nganmi a si lo, a nungmi Pathian ih Thlarau in nganmi a si; lungpheng parih nganmi a si lo, milai thinlung sungih nganmi a si.

⁴Hitiih kan phuannak cu Khrih ih zaarah Pathian lamah ralṭhatnak kan neih ruangah a si.

⁵Hi hnaṭuan hi a ṭuan theitu kan si tiih phuan ngamnak kanmah taksa parah zianghman a um lo. Kan ṭuan theinak hmuahhmuah cu Pathian hnen ihsin a rami a si.

⁶Thukam thar a riantu kan si theinak cu Amah in thazaang in pek ruangah a si. Cuih thukam thar sungah ca in nganmi Thukham a um lo; Thlarau sawn a um a si. Thukham cun thihnak a thlenter, sikhalsehla Thlarau cun nunnak a pe.

⁷Thukham cu cafang pakhat hnu pakhat lungpheng parah nganmi a si ih cuih thukham pek a si laiah Pathian ih sunlawinak a lang. Moses mithmai parih a tleumi cu zamrangih a ziammi a si ko naón a tleumi a tleuzet ruangah Israel mi pawl in a mithmai cu hmaiton in an zoh ngam lo. Thihnak a thlenpitu thukham hman cubangtuk sunlawinak thawn a ra asile,

⁸Thlarau hnaṭuannak cu ziangtluk sunglawi sinsin in so a ra ding?

⁹Minung mawhphurh thuṭhennak thu hmanah cutluk sunlawinak a um ahcun, minung rundamnak a thlenpitu thu-ah cun ziangtluk in so a sunlawinak a tum sinsin ding?

¹⁰Hlanlaipi ih a rak tleuzet vemi sunlawinak cu atuih a tleu sinsinmi sunlawinak ruangah a tleunak a ziam zo ti ding a si thlang.

¹¹Tikcu tawite sung a tleumi kha a sunglawizet kan ti a si ahcun kumkhua a awhmi cu ziangtlukin so a sunglawi sinsinmi a si ding?

¹²Hi bangtuk ruahsanmi kan neih ruangah kan ral a ṭhazet.

¹³Kannih cu Moses vek kan si lo. Moses cun a mithmai tleu a ziam vivo kha Israel mi pawl in hmu thei hlah hai seh tiah a hmai cu puan in a khuh aw.

¹⁴Ziangti a si khalle an thinlung sangka cu a pit thotho a si. Tuihsun tiangin thukham hlun cabu an siar tinin an thinlung cu puan in a khuh lai a si. Minung cu Khrih thawn an pehzom awk tik lawngah cuih puan cu a hawk aw a si.

¹⁵Tuihsun tiangin Moses Thukham an siar tikah an thinlung cu puan in a khuh thotho lai.

¹⁶Sikhalsehla cuih puan cu hlonhlo a theih; Ca Thianghlim khal in, “Moses cu Bawipa lamih a her tikah a puan cu a hawk aw,” tiah a ti.

¹⁷Hitawk ih, “Bawipa,” a timi hi Thlarau a ti duhnak a si. Cule Bawipa ih Thlarau umnak kipah cun zalennak a um.

¹⁸Kannih tla cu kan zatein kan hmai puanih tuammi kan si nawn lo ruangah Bawipa ih sunlawinak hi thlalang bangin a langtertu kan si. Cuih sunlawinak cu Thlarau a si mi Bawipa hnen ihsin a rat ruangah kan nunnak hi sunglawi sinsin in le Amah bang sinsin in in thleng vivo a si.