Read Falam Chin 2 KORIN 5 Bible Online

2 KORIN 5 - Falam Chin bible

2 KORIN 5

¹Kan umnak hi leithlam kan ruangpum hi bal ṭheh hmansehla milai kutih sak lomi Pathian in kan hrangih a tuahmi kumkhuadaih vancungah inn kan nei ti kan thei.

²A tu ahcun baangzet in kan hui rero; vancung kan inn thawn in thuam hai sehla ti kan hiar tuk ruangah cutiih kan huinak a si.

³Cutiih vancung thuam hruktermi kan si tikah taksa ruangpi nei loin kan si lo ding.

⁴Hi leilung puanthlam sungih kan um sungah cun kan zin a fee ih kan hrum kan ai. Cutiih kan hrum-ainak cu hi kan leithlam hi hlonhlo kan duh ruangah a si lo; sikhalsehla kan ruangpum hi vancung thuam hruktermi si nungla cuticun a thi theimi hi nunnak hi a thi thei lomi in dolh ṭheh sehla ti kan duh tuk ruangah a si.

⁵Hi bangtuk thleng awknak hrangah in timtuah saktu cu amah Pathian a si. Cule kan hrangah a khawlciami hmuahhmuah kan ngah ding ti ih aamahkhan ah amah ih Thlarau in pek.

⁶Curuangah thinlung hngetkhoh in kan um ringring. Leilung taksa thawn hnangam ih kan um sungah cun Bawipa ih inn thawn kan hla aw a si, ti kan thei.

⁷Kannih cu rinnak in kan nung ih hmuhnak in kan nung lo.

⁸Ralṭhatnak in kan khat; cule mah ih duh vekin cang thei sehla hi kan leilung taksa hi taanta in Bawipa ih inn ih um kan hril sawn ding.

⁹Ziangkhal sisehla leilung kan inn ih kan um ah siseh, khitawk kan inn ih kan um ah siseh, ziang hmuahhmuah hnakin amah kan lungawiter ding kha a thupi bik a si.

¹⁰Ziangahtile thuṭhen dingah kan zate in Khrih hmai ah kan ding leh ding. Zozo khal a ṭha siseh, a sia siseh a nunsung ih a tuahmi vek cekci in a ngah ding.

¹¹Pathian ṭih cu a tican ziang a si ti kan theih ruangah midang tla kan sawm vivo. Pathian in kan thinlung cu a thei ṭheh. Cubangtuk in nannih khal in nan thinlung cun in thei ve ding tiah ruahsannak ka nei.

¹²Nan hnenah kan ṭhatnak langter kan duh sal ruangah a si lo; kanmah ih ruangah hmaihngalnak nan conak dingah a tikcu ṭha nan hnenih pek ding kan zuammi a si sawn. Cuticun mi ṭhenkhat sunglam ziaza zoh loin a lenglam hmuh theimi thu-ah a porh awmi pawl kha an thu nan let thei ding a si.

¹³Miaa kan si ngaingai maw? Kan va si khalle Pathian ih ruangah a si. Mifim teh kan si maw? Kan si a si ahcun nanmah ruangah a si.

¹⁴Mi pakhat cu mi hmuahhmuah aiah a thi ih cuih a thihnak sungah cun zozo khal kan tel ih kan ṭawm ve a si, ti kan theih ngah hnu-ah cun Khrih ih duhdawtnak in in uk a si.

¹⁵Khrih cu mi zate hrangih a thih ruangah zozo khal mahih bul hrang lawngah nung ding an si nawn lo; an aiah a thi ih a nungsal mipa hrang lawngah nung ding an si sawn.

¹⁶Atu-ah cun milai sinak zoh in zohman thu kan rel nawn lo. Caan khat khatah Khrih cu milai sinak zoh in a thu rak rel hman nungla atu-ah cun kan rel nawn lo a si.

¹⁷Zozo khal Khrih thawn an pehzom awk tikah cun mithar a si; a nun hlun cu a cem ih nun thar a thok zo.

¹⁸Hi hmuahhmuah hi Pathian ih tuahmi an si ṭheh; a ral a si mi kannih cu Khrih thawngin Amah thawn in remter zo ih midang khal Amah thawn remter dingah ṭuanvo in pek.

¹⁹Kan phuanmi thu cu: Khrih thawngin leilung mi hmuahhmuah cu Pathian in Amah thawn a remter zo, ti a si. Pathian in an sual khumnak cazin a ret nawn lo; cule cuih rualremnak thuthangṭha sim dingah ṭuanvo in pek.

²⁰Curuangah kannih cu Khrih palai kan si. Pathian amah rori kanmah sungin thu a sim vek khin thu kan sim. Khrih ih hmin in kan lo sawm: Pathian thawn rem-aw uhla a ral sinak in a rualpi ah cang hram uh.

²¹Sikhalsehla kanmah ih ruangah Pathian in sualnak zianghman a nei lomi Khrih kha sual ah a canter ih cuticun amah ih zaarah Pathian ih dingnak kan ṭawm venak dingah a si.