Read Falam Chin GALATI 1 Bible Online

GALATI 1 - Falam Chin bible

GALATI 1

¹Galati kawhhran pawl hnenah tirhthlah Paul in ca ka lo kuat. Thuthang ṭha phuang dingih tirhthlah si dingah hin milai ih hrilmi le thlahmi ka si lo; Jesuh Khrih thihnak ihsin a thotertu Pa Pathian le amah Jesuh Khrih ih hrilmi le thlahmi ka si.

²Hitawkih a ummi unau pawl tla thawn Galati ih kawhhran pawl cibai kan lo buk a si.

³Kan Pa Pathian le Bawipa Jesuh Khrih in zaangfahnak le daihnak cu lo pe hram seh.

⁴Tuihsan sansia sung ihsin kannih luatter dingah Khrih cun Pa Pathian duhnak thlun in kan sualnak ruangah a nunnak a pe zo.

⁵Pa Pathian hnenah sunlawinak cu a kumkhua in um camcin hram seh! Amen.

⁶Ziang kar lote sungah Khrih zaangfahnak thawn a lo kotu cu nan dungtun ih Thuthang ṭha dang nan pan lohli ka hmuh tikah ka mang a bang ngaingai.

⁷‘Thuthang ṭha dang,’ a um ngaingai ruangih ka timi a si lo; nan thinlung a lo hnaihnoktu le Khrih Thuthang ṭha thleng a tum rerotu minung an um ruangih ka timi a si.

⁸Kanmah siseh, vancungmi khal siseh, nan hnenih kan phuan ciami Thuthang ṭha si loin thuthangṭha dang simtu an um a si ahcun camsiat si ko seh!

⁹Kan lo sim zo naón atu-ah ka sim sal ko pei: nan pom ciami Thuthang ṭha siarlo thuthangṭha dang simtu cu camsiat si ko seh.

¹⁰Hitiih ka ti tikah milai lungkimnak hawl rero ka bang maw? Ka tummi cu milai ih lungkimpinak a si lo; Pathian ih lungkimpinak a si sawn. Milai ih thangṭhatnak ka hawl maw? Mi hmaiih hminṭhatnak ka hawl a si ahcun Khrih ih hnaṭuantu ka si lo ding.

¹¹Ka u le ka nau tla, Thuthang ṭha ka phuanmi hi minung ih thokmi a si lo, tihi nan hnenah ka langter duhmi a si.

¹²Minung hnen ihsin ka ngahmi a si lo; milai zohmanih in zirhmi khal a si fawn lo. Jesuh Khrih amah in ka hnenih a phuanmi a si.

¹³Ka rak nuncan ṭheu daan cu nan thei thluh ko. Judah biaknak ka thlun laiah cun Pathian ih kawhhran pawl ka hremsiat ih cihmit dingah ka rak zuam ciamco.

¹⁴Judah biaknak thlun lamah cun ka khukṭhi lakah a fel bikmi ka si. Kan pupa daan thlun lamah cun a hleice in rinsan tlak taktak ka si.

¹⁵Sikhalsehla Pathian cun a zaangfahnak thawngin ka suah hlan hmanin i hril ih amah ih hnaṭuantu si dingah i ko.

¹⁶A Thuthang ṭha Zentail mi hnenih phuang dingah, a Fapa ka hnenih a run langter tikah milai zohman thuron dingah ka pan lo.

¹⁷Jerusalem ih a ummi ka hlanih tirhthlah a rak si zomi pawl khal ka pan lo. Zamrang in Arabia sawn ah ka feh ih Damaskas ah ka ra kir sal.

¹⁸Kum thum hnu lawngah Piter tong dingin Jerusalem ah ka feh ih a hnenah zarh hnih ka caam.

¹⁹Kan Bawipa ih naupa Jeim siarlo, tirhthlah dang zohman ka tong lo.

²⁰Hitiih ka nganmi hi thudik a si; thuphan a si lo ti cu Pathian Amah in a thei.

²¹Cuih hnuah Siria le Silisia ramah ka feh.

²²Culai ahcun Judea ram Khristian pawl cun pumpak in in thei hrih lo.

²³“In rak hrem rerotu in atu-ah cun siatsuah a rak tummi kan zumnak thuhla cu a phuang ciamco a si,” tiin mi ih an simmi an thei ih,

²⁴cutiin keimah ruangah Pathian an thangṭhat.