Read Falam Chin GALATI 2 Bible Online

GALATI 2 - Falam Chin bible

GALATI 2

¹Kum hleili hnuah Barnabas thawn Jerusalem ah ka feh sal. Titas khal ka fehpi ve.

²Pathian in i fial ruangah ka feh a si. Pumpak in Khristian hotu pawl ka tong ih Zentail mi hnenah Thuthang ṭha ka phuan thu an hnenah ka sim. Ka rak ṭuan ciami siseh atuih ka ṭuan rero laimi khal siseh thulolak ih cang ṭheh ding cu ka duh lo.

³Ka hnaṭuanpi Titas cu Grik mi asinain serhtan dingah zohman in kan hneek lo;

⁴serhtan seh titu khal an um. Mi ṭhenkhat zumtu ngaingai vekin an umter-aw ih kan lakah lutthup tahratin Khrih Jesuh thawn kan pehzom awknak ruangih zalennak kan conak thu hi thlingthlatu an um. Kanmah pawl hi salih cang sal dingah an duhmi a si.

⁵Sikhalsehla nan hrangah Thuthang ṭha felfai teih humhim kan duh ruangah kar khatte hman dung kan sip lo.

⁶Hotu bangtuk ih ruahmi pawl in ruahnak thar zianghman in pe lo. Pathian cun a lenglam thil a zoh lo ruangah cuih hotu pawl cu ziangbangtuk an si khalle ka hrangah cun a lamdangnak a um cuang lo.

⁷Ruahnak thar petu lam si loin Judah mi hnenah Thuthang ṭha phuang dingah Piter cu Pathian in ṭuanvo a pekmi an hmuh vekin, kei khal Zentail mi hnenah Thuthang ṭha phuang dingin Pathian in ṭuanvo i pek kha a hmutu an si.

⁸Ziangtin tile, Pathian ih huham thawngin Judah mi hnenah Piter cu tirhthlah a si vekin kei khal Zentail mi hnenah tirhthlah ka si ve.

⁹Hotu ih ruahmi Jeim, Piter le Johan pawl in hi hnaṭuan sunglawi hi Pathian in i pe ti kha an thei thiam; curuangah hnaṭuan tlang kan si ti langternak ah Barnabas thawn kan kut in kai. Cule keimah le Barnabas cu Zentail mi lakih hnaṭuan dingah le annih cu Judah mi pawl lakih hnaṭuan dingah lungkim tlangnak kan nei.

¹⁰In dilmi pakhat cu an lakih mifarah pawl hngilh lo ding kha a si ih cumicu taimak suah ih ṭuan rero kan duhmi a rak si ko.

¹¹Cule Antiok khua ih Piter a ra tlawn tikah misenpi hmaiah langhngan in ka mawhthluk, ziangahtile a mawh a si ti a fiang.

¹²Jeim ih a rak thlahmi pawl an ra thlen hlanah cun Zentail unau pawl thawn rawl an ei tlang ṭheu; asinain cu pawl an ra thlen hnu cun serhtan a ṭanpitu pawl a ṭih ruangah Zentail mi pawl cu a hrial ih an hnenah rawl a ei duh nawn lo.

¹³Judah mi kan unau pawl khal Piter vekin an ral a hrut ih dungah an siip. Barnabas tiangin an ralhruh cu an suan ve.

¹⁴Thuthang ṭha ih in hmuhsakmi lamzin ding vekin an thlun lo ti ka hmuh tikah Piter cu misenpi hmaiah, “Nang cu Judah mi na si naón Judah nundaan vekin nung loin Zentail mi vekin na nung. Cutiin asile ziangtinso Zentail mi pawl cu Judah daan vekin nung dingin na hnek thei ding?” tiah ka ti.

¹⁵Thungaite ih kan ti a si ahcun kannih cu kan suahthlak ihsin Judah mi kan si ih, ‘Zentail misual pawl,’ kan si hrimhrim lo.

¹⁶Sikhalsehla minung cu Jesuh Khrih rinnak ruang lawngin Pathian hmaiah thiamcoter a si; Daan thlunnak in a si dah lo, ti kan thei. Curuangah kannih khal Khrih kan rinnak thawngin Pathian hmaiah thiamcotermi kan sinak dingah Khrih Jesuh cu kan zum. Ziangtin tile Daan thlunnak thawngin milai zohman Pathian hmaiah thiamcoternak an ngah lo.

¹⁷Cule Khrih thawn kan pehzom awknak ruangin Pathian hmaiah thiamcotermi si dingih kan zuam rero tikah hin Zentail mi vekih ‘Misual pawl!’ tiih kawh kan co a si ahcun Khrih hi sualnak ih in fehpitu a si, ti a theih ding maw? Theih hrimhrim hlah!

¹⁸Ka bal ciami daan kha ka thlun sal a si ahcun Daan a buartu cu keimah ka si, ti ka langter a si.

¹⁹Daan thuhla ahcun kei cu mithi ka si; Pathian ah nung dingin daan in kei cu i that zo a si. A thinglamtah parah kei cu Khrih thawn thahmi ka si zo.

²⁰Curuangah a nungtu cu kei ka si nawn lo; ka sungih a nungtu Khrih sawn a si. Atuih ka nun hi cu i duhdaw ih ka hrangah a nunnak a petu Pathian Fapa rinnak in ka nung a si.

²¹Pathian ih zaangfah thinpemnak cu ka el thei lo. Minung cu Daan thlunnak ruang ih thiamcoter a si ahcun Khrih thihnak cu man nei lo ah a cang a si.