Read Falam Chin GALATI 3 Bible Online

GALATI 3 - Falam Chin bible

GALATI 3

¹Galati mi-aa rual! Zoso a lo polhtu? Jesuh Khrih thinglamtah parih a thihnak cu nan mit ah fiang zetin a cuang a sisi!

²Hi thil hi i simhnik uh: Pathian Thlarau nan comi hi Daan ih a lo fialmi nan tuah ruangah maw, a si lole Thuthang ṭha nan theihnak le nan rinnak in so nan ngah?

³Hi tluk lawmmam in nan aa maw si! A hram nan thok laiah cun Thlarau thawn nan thok; a net lam atu ahcun nanmah ih cahnak thawn netter nan tum maw si?

⁴Nan nunnak ih nan ton ciami hmuahhmuah thuphan ah maw a can ṭheh? Thuphan cu an si ṭheh lo ding naón!

⁵Pathian in Thlarau a lo pek ih nanmah lakah mangbangza a tuahmi kha Daan ih a lo fialmi nan tuah ruangah maw a si? a si lole Thuthang ṭha nan thei ih nan zum ruangah so a si?

⁶Abraham ih thu kha ruathnik uh. Ca Thianghlim ah, “Abraham in Pathian a zum ih cutiih a zumnak ruangah Pathian in miding ah a co,” tiah a um.

⁷Nan theih dingmi cu, Abraham ih tefa ngaingai cu zumnak neimi hi an si.

⁸Ca Thianghlim in, “An zumnak ruangah Zentail mi pawl cu Pathian in miding ah a co ding a si,” tiah a rak ti cia zo. Curuangah Abraham hnenah, “Nangmah thawngin mi hmuahhmuah Pathian in a thlawsuah ding,” tiah Ca Thianghlim in Thuthang ṭha cu a rak than.

⁹Abraham in a zum ruangah thlawsuahnak a co. Cubangtuk in zumtu hmuahhmuah cu thlawsuahnak an co ve ding.

¹⁰Daan thlunnak a rinsantu cu camsiatnak hnuai ih a ummi an si. Ziangahtile Ca Thianghlim in, “Zozo khal Daan cabu sungih nganmi vek rori ih a thlun ringring lotu cu Pathian ih camsiatnak hnuai ah an um a si,” tiah a ti.

¹¹Ca Thianghlim in, “Zumnak ruangih Pathian thiamcotermi lawng an nung ding,”[1] a ti ruangah Daan thlunnak in zohman thiamcoter an si lo, ti cu a fiang zo.

¹²Curuangah Daan le zumnak cu pehtlaih awknak an nei lo. Ca Thianghlim in, “Daan ih fialmi vek rori ih a tuah ṭhehtu cu a nung ding,” a ti.

¹³Sihmansehla Khrih cu kan hrangih camsiatmi a si ruangah Daan ih a thlenpimi camsiatnak ihsin in runsuak zo. Ziangahtile Ca Thianghlim in, “Zokhal thing parih thlai a si mi cu Pathian camsiatnak cotu a si,” tiah a ti.

¹⁴Cuticun Khrih Jesuh ih zaarah Pathian in Abraham hnenih a tiammi thlawsuah cu Zentail mi in an conak dingah le zumnak thawngin Pathian ih tiam ciami Thlarau kan conak dingah a si.

¹⁵U le nau pawl, nitin kan hmuh kan tonmi ihsin tahṭhimnak ka la ding: thu pakhatkhatah mi pahnih an lungkim in lungkimnak an tuah tikah zohman in an phiat thei lo ih an beet thei fawn lo.

¹⁶Cuvekin Pathian in Abraham le a tefa hnenah thutiamnak a tuah. Ca Thianghlim in, “Tefa pawl,” ti ṭongfang a hmang lo, “Tefa,” ti lawng a ti ih a sim duhmi cu mi pakhat a si ih cucu Khrih a si.

¹⁷Ka sim duhmi cu, Pathian in Abraham thawn thukamnak a tuah ih cumi cu thlunsuak dingah a tiam aw. Kum zali le sawmthum hnu-ih pekmi Daan cun Pathian thukam cu a phiat thei lo. A thutiammi khal a lakah a cangter thei fawn lo.

¹⁸Ziangahtile Pathian ih laksawng cu Daan ruangah a si, ti a si ahcun Amah ih thutiamnak thawngin a si lo, tiah a cang ding. Sikhalsehla Abraham hnenah Pathian in laksawng a peknak san cu a hnenah thutiamnak a tuah zo ruangah a si.

¹⁹Cuti asile Daan ih ṭhathnemnak ziangso a si? Daan cu sualnak timi hi ziangso a si ti langternak ah a si ih Pathian ih tiam ciami Abraham ih tefa a ra thlen tiang um ringring dingih pekmi a si. Daan cu vanmi pawl ih pekmi a si ih vanmi le minung karlakah palai pakhat a rak um.[2]

²⁰Asinain mi pakhat lawng hna a ṭuannak ahcun palai um a ṭul lo; Pathian cu pakhat lawng a si.

²¹Cuti asile Daan le Pathian ih thutiam cu an kalh-aw maw si? Kalh-aw hrimhrim hlah! Ziangahtile minung hnenah nunnak pe theitu daan rak um sehla, cuih daan thlunin Pathian hmaiah thiamcoter an si ṭheh ding.

²²Sikhalsehla Ca Thianghlim in, “Leilung pumpuluk hi sualnak huham hnuai ah a um,” a ti. Curuangah Jesuh Khrih rinsannak thawng lawngih tiam ciami Pathian ih kammi laksawng cu a zumtu hnen lawngah pek a si.

²³Asinain zumnak tikcu caan a thlen hlanah cun Daan in thawngtlami bangin in hrengtaar; cumicu rinnak a suah hlan sung a si.

²⁴Curuangah rinnak thawngin Pathian hmaiih thiamcotermi kan si leh-nak dingah, Daan cu Khrih a rat hlan sung in khortu a si.

²⁵Atu cu rinnak a ra thlen zo ruangah Daan cu in khortu a si nawn lo.

²⁶Rinnak thawngin nan zatein Pathian ih fa nan si ih Khrih Jesuh thawn nan pehzom aw zo.

²⁷Khrih thawn pehzom awknak sungih hnimmi nan si zo ih atu ahcun Khrih nunzia thawn nan thuam aw a si.

²⁸Curuangah Judah mi le Zentail mi tiah thleidannak a um nawn lo; sal le miluat karlakah siseh, nunau le mipa karlak khalah siseh, thleidannak a um nawn lo. Nan zatein Khrih Jesuh thawn nan pehzom awknak sungah pakhat nan si.

²⁹Khrih ta nan si ahcun Abraham ih tefa nan si ih Pathian thutiam cia vekin a ro cotu nan si.