Read Falam Chin GALATI 4 Bible Online

GALATI 4 - Falam Chin bible

GALATI 4

¹Ka sim duhmi cu hiti in a si: fa pakhat cu a pa ih ro co ṭhehtu ding le ziang hmuahhmuah a neitu ding va si hmansehla nauhak a si laiah cun sal bangtuk in tuah a si.

²Nauhak a si sungah cun a pa ih tikcu a tinmi a kim hlanah cun a kilkhawitu le a thilri a tawlrel saktu an um.

³Cuvekin kannih khal thlarau lamih pitling kan si hlanah cun lei le vanih thuneitu thlarau pawl ih sal kan si.

⁴Sikhalsehla tikcu tinmi a thlen tikah Pathian in a Fapa a run thlah. Nunau sung ihsin a suak ih Judah daan hnuai ah a nung.

⁵Cumi cu Daan hnuai ih a ummi pawl tlen dingah le Pathian fa ih kan can theinak dingah a si.

⁶Cule a faale nan si langternak ah Pathian in a Fapa ih Thlarau cu kan thinlung sungah a run thlah. Kan thinlung ihsin, “Abba, ka Pa,” tiah a autu cu cuih Thlarau cu a si.

⁷Cuti a si ruangah sal nan si nawn lo; fa nan si zo! Cutiin a fa nan si ruangah Pathian in a rocotu ah a lo tuah zo.

⁸Hlanah cun Pathian nan rak thei lo; curuangah Pathian a si ngaingai lomi ih sal nan rak si.

⁹Sikhalsehla atu-ah cun Pathian nan thei ngah zo, a si lole Pathian in a lo thei ngah zo, kan ti pei; cuvek hnuah ziangtinso kha bangtuk thlarau ṭawnṭai le ṭhathnemnak nei lo pawl hnenih kir nan duh sal? An sal si sal ding cu ziangah so nan duh?

¹⁰Nannih cun ni hleice, thla hleice, caan hleice, le kum hleice nan nei ih ulh nan hmang.

¹¹Nanmah zawn ruat na-ah ka thin a baang. Nan hrangah zonzai ih kan ṭuanmi hmuahhmuah cu thulolak ah a cang ṭheh ding tihi ka phang a si.

¹²Ka u le ka nau tla, nanmah bangin ka um zo; nannih khal Daan ih thu ahcun keimah bangin um ve uh, tiah ka lo dil. Atu tiang ka parah siatnak nan tuah hrih lo.

¹³Nan hnenah a hmaisa bik Thuthang ṭha ka phuan ah khan ziangruangah a si ti cu nan ciing lai ding; ka nat ruangah a si kha!

¹⁴Ka harhdam lonak cu nan hrangah thilrit zet a si ko naón nannih in in hmuhsuam lo ih in dungtun siang lo. Cu ai-ah vanmi bangin siseh, Khrih Jesuh bangin siseh, in tlunter ih ṭha zetin in zoh.

¹⁵Culai ahcun nan lung a rak awizet hngin! Atu-ah cun hlanvek nan si nawn lo. Ziang nan cang ṭheh? A cang theimi sisehla nan mitmu hman phorh tahratin in pe siang ding ti cu keimah rori in ka sim ngammi a rak si.

¹⁶Atu-ah cun thudik ka lo sim ruangah nan ralah ka cang riangri maw si?

¹⁷Midang pawl in nan hrangah an lo ruatzet a bang naón an tumtahmi ngaingai cu a ṭha lem lo. An tummi cu keimah le nanmah hi ṭhenter ih nan hrangih zawnruahnak an neih vekin nannih khal in an hrangah zawnruahnak nei in anmah ṭantu si uhla tihi a si.

¹⁸Cubangtuk zawnruah awknak neih cu tumtahnak a ṭhat ahcun a ṭha zetmi a si. Nan hnenih ka um sung hrang lawngah si loin ziangtik khalah a ṭha ringringmi a si.

¹⁹Ka duhdawtmi ka faale pawl, nunau in nauhrinnat a tuar vekin Khrih hmuihmel nan sungih a seem hlanlo ka tuar sal hrih ding a si hi!

²⁰Atu-ah hin nanmah thawn umtlang sehla ka va duh so; cule ka aw-ka tla a dang deuh ding naón! Ka mang nan bangzet a si.

²¹Nanmah lakah Daan hnuai ih um duh hrih pawl thu ka lo sut hnik pei: Daan ih a timi hi nan thei ngah ngaingai lo maw?

²²Daan cabu cun, Abraham in fapa pahnih a nei; pakhat cu a salnu in a hrinsak ih a dang pakhat cu a luatmi nunau in a hrinsak a si, a ti.

²³Salnu ih hrinmi pa cu fa dang hrin keel vekih hrinmi a si; sikhalsehla a luatmi nu ih hrinmi fapa cu Pathian thukamnak ruangih neihmi a si.

²⁴Hi pahnih thu hi tahṭhimnak ih hman theimi an si. Nunau pahnih hi thukamnak pahnih can-ai an si. Saltannak ih fa a neitu Hagar cu Sinai tlang ih pek mi thukam a si.

²⁵Arabia ram Sinai tlang ai-ih a dingtu Hagar cu Jerusalem khawpi ai-awhtu a si ih a faale pawl cu saltannak sung ummi an si ṭheh.

²⁶Sikhalsehla vancung Jerusalem cu a luatmi nu a si ih amah cu kan zate ih nu khal a si.

²⁷Ca Thianghlim in, “Nang nucing, na lungawi aw! Nauhrinnat a tuar dah lo nu, lungawi aipuang in au aw! Ziangahtile tlansan zomi nu in a pasal thawn a umtlang ringring mi nu hnakin faate tam sawn a nei ding,” a ti.

²⁸Ka u le ka nau tla, atu-ah cun Isaak bangin Pathian thukamnak thawngih hrinmi Pathian ih faate nan si.

²⁹Culai ahcun minung daan vekih hrinmi fapa in Pathian Thlarau thawngih hrinmi fapa cu a hrem. Atu khalah cuvek thotho in a si.

³⁰Asinain Ca Thianghlim sungah ziangtinso a um? “Salnu le a fapa cu dawihlo aw; ziangahtile salnu ih fapa le a luatmi nu ih fapa cu an pa ih roco tlangtu an si thei lo ding,” tin a um.

³¹Curuangah ka u le ka nau tla, kannih cu salnu ih fa kan si lo, a luatmi nu ih fa kan si.