Read Falam Chin EFESA 2 Bible Online

EFESA 2 - Falam Chin bible

EFESA 2

¹Hlanah cun nan ṭhatlonak le nan sualnak ruangah thlarau lamin mithi nan si.

²Culai ahcun khawvel daan sia siseh, van tlolak le lei khawvel karlakih thlarau lam huham neitu, Pathian thu ngai duh lomi pawl ih lakah hna a ṭuan rerotu thlarau siava ih thu siseh, nan rak thlun.

³Thungai in kan ti le kan zatein anmah vek thotho kan rak si; kan taksa hurnak thlunin kan rak nung, kan tisa le thinlung ih hiarmi poh kan rak tuah. Kanmah si daan te cekci ih kan rel ahcun kannih khal midang vek thotho in Pathian thinhengnak a tuartu ding kan si.

⁴Sikhalsehla Pathian ih in zaangfahnak cu a tlamtling ngaingai ih in duhdawtnak khal a tumzet ruangah,

⁵kan sualnak sungah thlarau lamin mithi cia kan si ko naón Khrih thawn nunnak ah in thoter sal zo. Pathian ih zaangfahnak thawngin rundammi nan si.

⁶Khrih Jesuh thawn kan pehzom awknak thawngin Pathian in Khrih thawn vancung ramih uk tlang dingah amah thawn in thoter sal zo.

⁷Hi bangtuk ih a tuahnak cu ziangdang ruangah a si lo; Khrih Jesuh sung ihsin kannih in duhdawtnak a tumzia kha kumkhua daih in langter a duh ruangah a si.

⁸Ziangahtile nannih cu Pathian zaangfahnak zaarah zumnak in rundam nan si. Hi rundamnak cu nan ṭuannak ruangih nan ngahmi a si lo, Pathian ih laksawng a si.

⁹Cuhrangah zo hman porh awk ding a si lo.

¹⁰Pathian in kan ṭuan ding hrangih a rak timtuah ciami hnaṭuan ṭha ṭuantu dingah Khrih Jesuh sungin kannih cu siamtharmi kan si.

¹¹Nan suahkehnak ihsin Zentail mi nannih tla cu Judah mi pawl in, “Serhtan lo phun,” tiih kawhmi nan si; anmah le anmah cu, “Serhtan pawl,” an ti aw. (Cumi cu an taksa par lala ah an langter mi khi a si.) Nannih Zentail mi pawl hlanlai ah ziangvek nan si, ti kha hngilh hlah uh.

¹²Culai ahcun Khrih thawn pehzom awknak nan nei lo. Mikhual nan si ih Pathian ih hril miphun lakah nan tel lo. Pathian in a minung pawl hnenah tiamkamnak a rak tuah ciami parah bun tahratih tuahmi thukamnak sungah covo zianghman nan nei lo. Hi leilung tlunah hin ruahsannak nei lo le Pathian nei loin nan rak tlang meen.

¹³Sikhalsehla atu-ah cun Khrih Jesuh thawn pehzom awknak ruangah a hlatzet ih a ummi nannih tla cu Khrih thisen luannak ruangah a naizetah kawh khawmmi nan si zo.

¹⁴Ziangahtile Judah mi le Zentail mi cu pumkhat ah in tuah zo ruangah Khrih amah cu kan remnak a si. Judah mi le Zentail mi pawl a ṭhentertu le ralih a tuahtu pharsonmi cu amah ih taksa pum rori in a bal ṭheh zo.

¹⁵Judah daan cu thukham le thupekmi pawl thawn a phiat ṭheh. Cutiih a tuahnak cu amah Khrih thawn an pehzom awknak ruangah miphun phunhnih cu miphun thar pakhat ih canter tahratin remnak umter a duh ruangah a si.

¹⁶A thihnak thawngin Khrih in an ral awknak kha a cemter ih a thinglamtah in miphun phunhnih cu phun khatah a kom ih Pathian hnenah a hruai kir.

¹⁷Cuticun Khrih in Pathian thawn a hlat zetmi nannih Zentail pawl hnenah siseh, Pathian thawn a naih zetmi nannih Judah mi hnen khalah siseh, remnak Thuthang ṭha a lo sim hai.

¹⁸Khrih ruangah Judah mi siseh, Zentail mi siseh, kan zatein Thlarau pakhat thawngin Pa kan nei thei.

¹⁹Cuti a si ruangah nannih Zentail mi pawl ramdangmi le khuatluang nan si nawn lo; Pathian ih miphun pawl thawn laikhat le Pathian innsang ih sungtel nan si zo.

²⁰Nannih cu tirhthlah le profet pawl in a hram an phun suakmi parih sakmi inn nan si ve zo ih a kiilih lungphum cu Khrih Jesuh a si.

²¹Amah cu inn pumpuluk a kaikhawmtu a si ih Bawipa ih biakinn thiangah cangsuak tiangin a ṭhantertu a si.

²²Amah thawn nan pehzom awknak thawngin nannih khal amah zumtu dang pawl thawn Pathian in a Thlarau a umnak dingih innah a sak cihmi nan si.