Read Falam Chin EFESA 3 Bible Online

EFESA 3 - Falam Chin bible

EFESA 3

¹Cuti a si ruangah nanmah Zentail pawl hrangah Khrih Jesuh hmin in keimah Paul cu thawngtlapa ka si.

²Pathian in nan ṭhatnak dingah himi hnaṭuan hi a zaangfahnak in i pek zo ti cu nan thei ṭheh zo ko ding.

³Pathian in a thuthup cu a phuang ih ka hnenah a langter zo. Hi thu cu a tawizawng in ka ngan zo ih,

⁴cuih ka nganmi nan siar a si ahcun Khrih ih thuthup ka theih daan cu nan thei thei ko ding.

⁵Hlanah cun cuih thuthup cu milai hnenah phuan a si dah lo; sikhalsehla atu-ah cun Pathian in a thiangmi a tirhthlah le a profet pawl hnenah a Thlarau in a phuang zo.

⁶Cuih a thuthup cu hi bangtuk in a si: Thuthang ṭha a um ruangah Zentail mi khal Judah mi thawn Pathian ih thlawsuah cotu an si ve thlang; pumkhat sungih a telmi an si ih Khrih Jesuh thawngin Pathian thukamnak sungah covo an nei a si.

⁷Cuih Thuthang ṭha riantu ka si hi Pathian ih i pekmi laksawng a si. Cuih laksawng cu a cahnak huham ih hnaṭuanmi a si.

⁸Kei cu Pathian minung pawl lakih mi nauta bik hnak hmanin ka nauta sawn. Asinain sim cawk lo tiangin a tummi Khrih ih lennak Thuthang ṭha cu Zentail mi hnenah thlenpi dingah le,

⁹Pathian ih tumtahmi a thuthup cu ziangvekin a lang zo ti kha mi hmuahhmuah ih hmu thei dingin an mit vaangter dingah Pathian in ṭuanvo i pek. Ziangzongza Siamtu Pathian in kan dunglam san sung hmuahhmuah a thuthuuk cu a thup.

¹⁰Ziangah cutiin a thup tile a kawhhran thawngin vancungih vanmi uktu le thuneitu pawl in Pathian ih fimnak phunzakim kha tuihsan ah hin an theih famkim theinak dingah a si.

¹¹Cumi cu kumkhua tumtahnak a neihmi vekin Pathian in kan Bawipa Khrih Jesuh sungin a kimter a si.

¹²Khrih thawn kan pehzom awknak ruangah le Amah kan zumnak thawngin Pathian umnak hmunah ralṭha zet le ngamzet in luh theinak kan nei.

¹³Curuangah nan hrangih zonzaihnak ka ton tikah hin nan thin nau hram hlah uh, tiah ka lo dil; nan hrangih a ṭhami lawnglawng an si.

¹⁴Cumi ruangah kan Pa ih hmaiah khukbil in thla ka cam.

¹⁵Amah cu innsungsaang kipih a ummi le lei le van ih a ummi hmuahhmuah in an hmin an laknak hram a si.

¹⁶Sim cawk lo a sunlawi lennak sungin nan sunglam ih minung nan sinak kha a Thlarau thawngin cahnak huham lo pe dingah Pathian ka dil ih,

¹⁷nan zumnak thawngin nan thinlung cu Khrih in a umnak inn ah tuah hram seh, tiah thla ka cam. Thla ka cam beet hrih mi cu: nan hram le nan hramṭohnak cu duhdawtnak sungah bun uhla,

¹⁸cuticun Pathian ih minung pawl thawn thinlung khatin Khrih ih duhdawtnak a thuk ih a sanzia le, a sau ih a kauhzia kha theih theinak nan nei ding, tihi a si.

¹⁹Minung fimthiamnak ih a theih thluh thei lomi a duhdawtnak cu nan thei ko ding ih a famkimmi Pathian a sinak thawn nan nunnak cu a khat ding.

²⁰Kan sungah a huham in hna a ṭuantu cun kan dil theimi le kan ruah theimi hnak hmanih let tampi in a ṭuan thei a si.

²¹Kawhhran sung le Khrih Jesuh sungin amah Pathian hnenah thangṭhatnak cu kumkhua um camcin ko seh! Amen.