Read Falam Chin FILIPI 1 Bible Online

FILIPI 1 - Falam Chin bible

FILIPI 1

¹Khrih Jesuh ih sal a si mi Paul le Timote in, Khrih Jesuh thawn a pehzom awmi Filipi khua ih Pathian minung a ummi hnenah le nan kawhhran sungih hruaitu le upa pawl hnenah ca kan lo kuat.

²Kan Pa Pathian le Bawipa Jesuh Khrih in zaangfahnak le daihnak lo pe hram seh.

³Nanmah ka lo ruah tinte in ka Pathian parah ka lung a awi.

⁴Nan zate hrang thla ka cam tinte in lungawinak thawn thla ka cam,

⁵ziangahtile Thuthang ṭha hnaṭuannak ah hin a thokpekte ihsin tuihsun tiang nanmah cu i bawm ringringtu nan si.

⁶Curuangah nanmah sungih hnaṭuan ṭha a thoktu Pathian in Khrih Jesuh ih Ni a ra thlen tikah cumicu a ṭuansuak ding tiah ka thei fiang.

⁷Nanmah cu ka thinlung sungah nan caam ringring. Nan parih hi bangtuk thinlung ka neihmi hi nei ding mawi ka si. Ziangahtile atu thawng sungih ka um laiah siseh, luatzetin Thuthang ṭha ka ṭanpi ih cuih Thuthang ṭha hngetkhoh sinsin dingih ka ṭuannak ah siseh, Pathian zaangfahnak ruangih ka comi ṭuanvo ahhin nan zatein nan tel ringring ve a si.

⁸Khrih Jesuh ih zaangfah thinpemnak sungah ziangtlukin ka lo ngai hai, timi thudik ka simmi i theihpitu cu Pathian a si.

⁹Pakhat le pakhat nan duh awknak cu theihnak dik le thu thleidan thiamnak thawn a ṭhanso vivonak dingah thla ka cam a si.

¹⁰Cuti in nan ṭhang asile a ṭha bikmi kha hril nan thiam ding. Cule Khrih Ni ahcun borhhlawhnak le mawhthluknak hmuahhmuah ihsin nan thiangfai ding.

¹¹Jesuh Khrih lawngih pek theihmi ziaza ṭha taktak cu nan nunnak ah a khat ding ih cumicu Pathian thangṭhatnak le sunlawinak ah a si ding.

¹²Ka u le ka nau pawl, ka parih a ra thlengmi thil pawl hi Thuthang ṭha karhzaitertu riangri ah an cang, tihi nan theih dingah ka duh a si.

¹³Hi thil ruangah hin, siangpahrang inn kilvengtu hmuahhmuah le hitawk ih midang pawl khal in Khrih sal ka si ruangah thawngah in thlak kha an thei ṭheh a si.

¹⁴Cule thawng ka tlaknak hin kan unau tam sawn cu Bawipa an rinsannak a hngetkhohter ih an ral a ṭha sinsin ih ngamzetin thu an sim.

¹⁵Mi ṭhenkhat cun in iksiik ruangah le thu-el duh pawl an si ruangah Khrih thu cu an sim ngai; sikhalsehla a hrek cu thinlung tluangtlammi an sinak in Pathian thu an sim.

¹⁶Cupawl cu duhdawtnak an neih ruangah an sim, ziangahtile Thuthang ṭha a ṭantu dingah Pathian in ṭuanvo i zem hi an hmu.

¹⁷Mi hrekkhat pawl cu thinlung tluang zetin Khrih thu sim loin anmah hamṭam zawnruahnak thinlung thawn an sim. Thawng ih a um laiah hin harsatnak betcih vivo uhsi tiin an ruat.

¹⁸Zianghman a poi lo. Ka lung a awizet ko; thinlung ṭha lo thawn an simah siseh, thinlung tluangih an sim khalah siseh, Khrih thu an sim poh ahcun ka lung a awi thotho ko ding.

¹⁹Ziangahtile nanmah ih thlacamnak le Jesuh Khrih ih Thlarau hnen ihsin a rami bomnak thawngin luatter ka si ding, ti ka thei.

²⁰Ka duh bikmi le ka hngakhlap zetmi cu ṭuanvo ka neihmi hi tuahsuak hram ningla, cule ziangtik caan khalah le a hleice in atu fang hrimhrim ahhin, ralṭhatnak thawn khat tahratin ka nunah siseh, ka thihah siseh, ka thinlung ka taksa zate thawn Khrih hi upat hmaihngalnak pe thei ningla, tihi a si.

²¹Nun timi hi ziangso a si? Kei ka hrangah cun nun cu Khrih a si. Curuangah thih khalle a hlawk sinsin.

²²Sikhalsehla nungin thil man nei deuh ka tuah thei a si ahcun khuimi sawn ka hril ding ka thei lo.

²³Ka thinlung kaa hnih ah a feh. Hi nunnak hi tlansan ih Khrih thawn um cu ka duhzet; cumicu a ṭha deuh ngaingai.

²⁴Sikhalsehla ka nun hrih ding cu nan hrangah a rak ṭulzet fawn.

²⁵Cumi cu fiangtein ka theih ruangah ka nung hrih ko ding. Zumnak sungah nan ṭhansonak le nan lungawinak kha a lo betbawmtu si dingah nan hnenah ka nung rei hrih ding a si.

²⁶Cuticun nan hnenih ka ra thlen sal tikah, Khrih Jesuh thawn nan nunnak cu a pehzom awk ruangah, keimah parah hmaihngalnak tampi nan nei ding.

²⁷Atu laiah a thupimi cu Khrih Thuthang ṭha ih duhdan vekin nan nuncan cu si thei sehla, cuticun ka ra lo ton thei ah siseh, ton thei lo khalah siseh, tumtahmi pakhat nei in fektein nan ding ih Thuthang ṭha hrangah hmun khatah thinlung rualtein ral nan dotlang ti kha ka thei ding a si.

²⁸Nan ral pawl kha ṭih hlah uh. Ralṭha zetin um uh. Cumi cun annih an sung ding ih nannih nehtu nan si ding ti kha a langter ding; ziangahtile nehnak a lo petu cu Pathian a si.

²⁹Khrih nan zumnak lawngah si loin amah ih hrang nan tuarnak khalah covo zemmi nan si hi mi vannei nan si.

³⁰Curuangah atu cun raldonak sungah ka hnenah nan tel thei ve ding. Cumi ral cu kan dung khalah ka rak do zo ti nan hmu ih, atu khalah nan theih vekin ka do rero lai a si.