Read Falam Chin FILIPI 2 Bible Online

FILIPI 2 - Falam Chin bible

FILIPI 2

¹Khrih thawn nan pehzom awknak ruangah nan nunnak a hnget cuang ih a duhdawtnak in nan hna a lo ngamter. Thlarau thawn pawlkomnak nan nei ih pakhat le pakhat parah zaangfah lainatnak nan nei a si lo maw?

²Cuti asile hiti in ka lo forh duh: nan ruahnak hmunkhat seh, duhdawtnak khalah pakhat le pakhat duhdaw aw ton uh; nan thinlung le nan tummi khal bangrep aw sehla cuticun lungawinak ka neihmi hi nan kimter sinsin ding a si.

³Mi nahsuahnak nei in, mahih zawn lawng ruat ih, mahih hminṭhatnak lawng hawl in zianghman tuah hlah uh. Pakhat le pakhat tangdor awk tonnak thinlung nei uhla midang hnakin ka ṭha deuh tiah ziangtik hmanah ruat aw hlah uh.

⁴Nanmah duhnak lawng si loin midang in an hrangah a thupi bikih an ruahmi kha a hmuhzia thiam ve uh.

⁵Nan thinlung putdan cu Khrih Jesuh ih thinlung putdan vekin siseh.

⁶Khrih cu Pathian sinak a nei ringring; Asinain Pathian bang dingah hranhram in a tum dah lo.

⁷Cu ai-ah, Amah ih lungtho tein, a sinak hmuahhmuah a taansan ih, hnen-um sinak la tahratin, Minung ah a cang ih minung pianzia in a piang.

⁸Tangdornak thinlung a nei ih, Pathian thu thlun in, Thinglamtah thihnak tiangin a tuar.

⁹Curuangah a saang bik hmunah Pathian in a cawisaang ih, Hmin hmuahhmuah lakih cungnung bik hmin a pek.

¹⁰Cuti a si ruangah, Jesuh hmin upatnak pekin, Vancung ih a ummi hmuahhmuah in siseh, Leitlun le leihnuai ih a ummi[1] hmuahhmuah khalin siseh, an khuk an bilh ding ih,

¹¹Jesuh Khrih cu Bawi a si, tiah Pa Pathian sunlawinak ah an zate in an phuang ding.

¹²Curuangah, ka duhdawtmi ka rualle uh, nan hnen ka um laiih ka thu nan thlun ringring vekin le, cu hnak hmanin a thupi sawn mi cu, nan hnenih ka um lo caan khalah ka thu nan thlun ding hi a si. Rundamnak famkim nan ngahnak dingah ṭihzah le ṭhia phah in ṭuan rero uh.

¹³Ziangahtile amah ih tumtahmi duh dingah le nan tuahsuak dingah Pathian cu nan sungah hna a ṭuan a si.

¹⁴Ziang nan tuah khalah phunzai rero lo le el-aw rero loin tuah uh.

¹⁵Cuticun hi leilung tlun miṭha lo le misual pawl lakih a ummi nannih hi a famkim mi Pathian faate, mawh nei lo le mithiang ah nan cang ding. Van ih arsi tleu bangin leilung mi lakah tleu uh.

¹⁶Nunnak thu nan phuan laiah hin cubangtuk in tleu uh. Cuticun Khrih Ni ah hmaihngalnak ka nei dingih ka hnaṭuannak le taimak ka suahnak pawl hmuahhmuah hi a lak an si lo, ti a langter ding.

¹⁷Thahnak tuarin ka nunnak thisen hi nan zumnak Pathian hnenih raithawinak bangin nan pekmi parah toih a va si khalle cumi cu ka lungawinak a si ko ding ih nan zatein cuih ka lungawinak cu ṭawm ka lo duh hai a si.

¹⁸Cuvek thotho in nannih khal in nan lungawinak cu in ṭawm ve uh.

¹⁹Pathian in rem a ti ahcun, nan thuhla tla ka theihnak ihsin tha ka ngah ding tiah beiseinak ka neih ruangah a rei hlanah Timote nan hnenah rak thlah ka tum.

²⁰Amah lawnglawng hi ka thinlung i theitu le nanmah seherhnak taktak a neitu a si.

²¹Midang cu anmah ih hrang lawnglawng an ruat ciar ih Jesuh Khrih hrang an ruat lem lo.

²²Anih cu ziangtluk rinsantlak a si ti cu nanmah rori in nan theihmi a si: keimah thawn pa le fa bangin Thuthang ṭha hrangah hna kan ṭuan tlang, ti kha nan hmu zo.

²³Curuangah ka thuhla ahhin ziangbangtuk in thil a cang ding ti a fian vete in amah cu ka rak thlah ding ih,

²⁴keimah rori nan hnenah ka ra thleng cing thei ding tiah Bawipa rinsannak thawn ka um.

²⁵Cule kan unau Epafroditas hi nan hnenah rak thlah a ṭul tiah ka ruat. Amah cu keimah thawn hnaṭuan tlang le raldo tlang kan si ih keimah bawm dingah nan rak thlahmi a si.

²⁶A nat thuhla nan rak theihmi kha a thin nuam lonak ah a cang ih nanmah ra ton ding a hngakhlap zet a si.

²⁷A na ti meen ding hman a si lo, thizik ngaingai in a na. Asinain Pathian in a zaangfah; amah a zaangfah lawng si loin keimah khal i zaangfah ih ka hnenih riahsiatnak tum sinsin a thleng dingmi ihsin i luatter.

²⁸Curuangah nan hnenih rak kuat ka duh cuangnak cu a si ih amah nan hmuh tikah nan thin a nuam sal ding ih kei khal ka riahsiatnak a cem ve ding a si.

²⁹Amah cu Bawipa ih sungah kan unau a si ih lungawi aipuangte in rak cohlang uh. Amah bangtuk minung cu hmaizahnak pe uh,

³⁰ziangahtile Khrih hrang hnaṭuannak le nanmah in in pek thei lomi bomnak kha pe dingah a nunnak hman ruat loin a ṭuan ih a nunnak tiangin a cem zik a si.